Вай гьантрай МахIачкъалалив, «Лотос» издательствалий був­ккунни ГьунчIукьатIрал шяравасса Абусупияннул арс Зиябу­ттин ХIажимирзаевлул чивчусса «Вертикаль моей жизни» тIисса лу.

Дагъусттаннал Транспортрал ва ххуллул хозяйствалул министерствалул отделданул хъунаману зузисса Дагъусттаннал лайкь хьусса строитель, ПаччахIлугърал чIярусса наградарттал заллу, ЗахIматрал ветеран Зиябуттин ХIажимирзаев ххуйну кIулссар лакран акъа­ссагу, щалагу Дагъусттаннал миллатирттал дянив. Ванал цIа хъиннура машгьур хьунни дунияллул яла бюхттулми зун­ттал мицIайн лавхъсса альпинист хIисаврайгу.
Цала оьрмулул ва захIматрал ххуллия, зунттурдал мицIайнсса тачIав хъама къабитансса аьрххирдая чивчуну бур авторнал луттираву.
Зиябуттин ур Занналва гьарица чулухасса гьунар буллусса инсан. Ванал лу итабакьаврил цучIав махIаттал къаувхьун­ссар тIий бура. Зиябуттиннущал хIала-гьурттуминнан нукIува кIулссар ванаву чичул гьунаргу бушиву. Му хъиннува аьч хъанай бур авадансса мазрай, ус­ттарну чивчусса автобиографиялул журалийсса ванал лу ккала­ккисса чIумал.
ХьхьичIмахъ чивчуну бур Дагъусттаннал Технический университетрал чил билаятрал мазурдил кафедралул хъунмур, филологиялул элмурдал кандидат, профессор Жанна Абуевал. Ва бур луттирал редакторгу. «Вертикаль моей жизни» сакин хьуну бур пролограя, 11 бутIуя ва эпилограя.
Гьарта-гьарзану луттираву бивщумуния ва цува авторная бусанну презентация дурну махъ.
Зиябуттиннун чIа тIий буру цIуллушиву ва гьарица дуллалимуниву тIайлабацIу. Оьрмулул ххуллий так бюхттулшивуртту ва хьхьичIуннайшивуртту.
Андриана Аьбдуллаева