Итникьини Къумукьнал театрдануву хьунни «Восславим Героев» тIисса акция, цувгу Украиннал аьрщарай нанисса хасъсса аьралий операциялий жанну дуллусса ватанлувтурал аьпалун хас бувсса. Ванил сиптачи хьунни Къумукьнал театрданул актер ва режиссер, Аьрасатнал лайкь хьусса артист Байсолтан Осаев.

Акциялий гьуртту хьунни Дагъусттаннал цинявппагу театрдал артистал. Ватандалул мурадру буруччаврил ххуллий чувшиврий жанну дуллусса вирттавраха вайннал бувккунни шеърирду, увкунни балайрду.
Дагъусттаннал халкьуннал артистка Луиза Шагьдиловал хасъсса аьралий операциялий ватандалул ххуллий чувшиврий жан дуллусса Аьрасатнал аьралий гужирдал чIавама сержант Алик Гъазиевлул ниттин, СахIи Гъазиеван, хас бувсса балай увкунни. Ва балайлул махъру чивчуну бур Миясат Муслимовал, лакку мазрайн бувцуну бур Роза Эльдаровал. Макьан чирчуну дур Дагъусттаннал культуралул бусравсса зузала Амрет ХIусайнаевлул, аранжировка Дагъусттаннал лайкь хьусса артист Арслан Шагьмардановлул.
Миясат Муслимовал Алик Гъазиевлул аьпалун хас дурну чирчусса цамур назму дурккуна Лакрал театрданул актриса Жаннат Гянжеевал. Руслан Лариннул дурккунни Константин Симоновлул «Архсса дуснан» тIисса назму.
Акция бачин бувми буслай бия хасъсса аьралий операциялий жанну дуллусса вирттаврал къучагъшивурттая, чувшивурттая. Макь дайгьин хъанай бакъая гьарца талаталал кьадар асар хъанахъисса тамашачиталгу.

Зулайхат Тахакьаева