Октябрьданул 29-нний, Ккуллал райондалий Хъусращиял шяраву, бусравсса хъамалгу бавтIун, лахъа-хъунсса даражалий Ватандалул мурадру буручлай 

бивкIсса вирттаврал аьпа абад буллалисса мажлис хьунни.

Тахакьа АхIмадовлул цIанийсса Хъусращиял школалул чIирайн лархъунни хасъсса аьралий операциялий къучагъшиврий жанну дуллусса МахIаммад-Мирзал арс Рашид Оьмаевлул ва МахIадлул арс Кьурбан Кьурбановлул аьпа абад буллалисса мармарчарил ултти. Шикку гьуртту хьун бувкIун бия Ккуллал райондалул бакIчи Шамил Рамазанов, Хъусращиял шяраваллил администрациялул бакIчи Арсен Алларазуев, Ветерантурал советрал хъунаманал хъиривчу, отставкалийсса майор, аьралий иширттал гьурттучи Щамхал Хизриев, «Защитники Отечества» тIисса Аьрасатнал фондрал координатор Шамил Рамазанов, МахIачкъала шагьрулул Советский райондалул администрациялул жяматийсса мюхчаншиву дуруччаврил отделданул хъунама Мавлудин ХIалимов, дуклаки оьрчIру, учительтал, Вирттаврал ниттихъул ва гъан-маччами. Мажлис тIитIлай ихтилат бунни Шамил Рамазановлул.

 

– ЧIярусса шиннардий оьбалартту бухIлай бивкIсса Донбассуллал агьали неонацизмалия мурахас буллай, цалчинсса гьантрая байбивхьуну, СВО-лул иширттаву виричушиву ккаккан дунни цикссагу жула жагьилтурал. ХIакьинусса кьини жула цинявппагу жагьилталтурал цала оьрмурдан хъуннасса нигьачIаву дунугу, махъаллил къавхьуну цала аьралий бурж лайкьну биттур буллай бур.

Билаятрай хасъсса операция баян буллалисса тагьарданиву, Рашидлул ва Кьурбаннул исват бувссар цивппа Ватандалул мурадру хьхьичI ххуттай бивхьусса хIакьсса патриотътал бушиву. Къуллугърал бурж бартбигьлай ккаккан дур­сса чувшивурттахлу Рашид Оьмаевлун ва Кьурбан Кьурбановлун аьпалул хьуну махъ дуллуну дур Къучагъшиврул орденну.
БувчIлай бур хIакьинусса кьини цуксса захIматсса кьинирду лахъан багьлай буссарив СВО-лий гьуртту хъанахъисса жула жагьилтуран ва миннал нитти-буттан, кулпатирттан. Шикку дуклакисса оьрчIан тачIав хъама къабитантIиссар жула паракьатшиврул цIаний жан дуллусса Рашид ва Кьурбан, – увкунни Шамил Рамазановлул.
Хъирив ихтилат бувна Мавлудин ХIалимовлул.
– Ватандалийн кьини дурксса чIумалли адаминал къириятгу, чувшивугу ккаккан дайсса. Жува цинявппа цачIун хьурчанни ччясса мутталий душман ухлаган ан хьунтIисса. Ттул намусрал кьамул буллай бакъар, аьралий иширттавух гьуртту хъанахъисса жагьилтурал чIарав къаацIаву, – тIий цала кьамул бувсса хIукмулия буслай ия Кьурбан. БувчIлай бия Ватан дуруччаврил цIаний кьамул бувсса хIукмулул хьхьичI цичIар къадацIайшиву. Кьурбан ва ванаха лавхьхьусса патриотътал буссаксса умудгу, вихшалагу цIакь хъанай дур ххувшаву жула чулий душиврий, – увкунни ванал.

– ХIакьину жува бувкIун буру жула паракьатшиву дуруччаврил цIаний жанну дуллусса вирттаврал аьпа абад буван. Жула аьралитурал исват бунни, иш багьний Ватандалухсса ччаву оьрмулияр ялтту дуккайшиву. Аьралий иширттал ветерантурал чулуха барчаллагь тIий ура къучагъсса арсру тарбия бувсса нитти-буттахъахь, учительтурахь. Вирттал сагъссар, ми дакIний буссаксса, – увкунни Щамхал Алхулаевичлул.
Школалул директор Щайх­ахIмад АхIмадовлул цала ихтилатраву кIицI лавгунни Ватан ххирасса унгу-унгусса патриотътал тарбия баврил давриву хъунмасса бияла бушиву учительтурахь ва нитти-буттахь.

– Вай мудангу эбратну би­кIантIиссар ялун нанисса ни­ки­ран , – увкунни ванал.
Хъирив ихтилат бувна Рашидлул буттауссу Кьурбанзабиуллагь Оьмаевлул.
– Барчаллагьрай ура хIакьину вай кIиягу виричу, вайннаяр хьхьичI аьпалул хьусса цаймигу дакIнин бичин бувкIсса цинявппагу инсантурахь. ХIайп, хасъсса аьралий операция уттигу къуртал хьун бувар, жула жагьилтуран Ватандалул мурадру буручлай жанну дулун багьлай бур. Ниттихъахьхьун ссавур дулуннав. Ватандалул мурадру буручлачисса цинявппагу аьралитал цIуллуну-сагъну зана хьуннав ссавур дакъа цахва ялугьлагьисса ичIувациринначIан,– увкунни ванал.
Къучагътурал оьрмулия бусласисса ихтилатру бувна дуклаки оьрчIал.

Рашид Оьмаев увну ур 1978-ку шинал Хъусращиял шяраву. Школа къуртал бувну махъ дуклан увххун ур МахIачкъалаллал пишарду лахьхьин байсса 17-мур училищалувун. Вагу хьхьичIунну къуртал бувну, къуллугъ буллай ивкIун ур Аьрасатнал аьралуннаву. СВО-лий Рашид най унува агьну ур къизгъинну талатавуртту нанисса кIирисса точкалийн. Къуллугъ буллай ивкIун ур Донецкаллал Халкьуннал Республикалийсса Артемовский райондалийсса Клещеевка тIисса шяравусса 1307-мур полкрал 78567-мур аьралий частьраву. КутIасса чIумуй гьуртту хьуну ур Рашид агьамшиву дусса объектру мюхчан дуллалисса талавурттавух. Ванал чувшиврун бюхттулсса кьимат бишлай, АьФ-лул Президент Владимир Путиннул хIукмулийн бувну, аьпалул хьуну махъ «Къучагъшиврул орден» дуллуну дур Рашид Оьмаевлун.

Рядовой Кьурбан Кьурбанов увну ур 1994-ку шинал Къизилюртуллал райондалийсса Аверьяновка тIисса шяраву. Ялапар хъанай ивкIун ур ЦIуссалакрал райондалийсса ЦIуссаккуллал шяраву. Кьурбаннул нину ХIами бур Хъусращиял шяравасса, ппу МахIад Ваччиял шяравасса.

2023-ку шинал сентябрь зурул 9-нний Кьурбан хушрай контрактгу чирчуну лавгун ур хасъсса аьралий операциялий гьуртту хьун. Декабрь зурул 12-нний Донецкаллал Халкьуннал Республикалий аьралий буржру бартбигьлай жан дуллуну дур ванал.
Ватандалул мурадру буручлай, хасъсса аьралий операциялул иширттаву ккаккан дурсса къучагъшиврухлу аьпалул хьуну махъ Кьурбан Кьурбановлун дуллуну дур «Къучагъшиврул орден».
ХIайп, чувшиву ялтту дурксса арсурваврацIа хьунни вайннал аьзизсса ниттихъул, кулпатру, оьрчIру.
Аьралитурал аьпа абад буллалисса давуртту лайкьсса даражалий тIайла дуккан хъунмасса захIмат бивхьуну бия Хъусращиял школалул учительтурал ва дуклаки оьрчIал.
Мажлис къуртал хьуну махъ, мероприятиялий гьуртту хьун бувкIминнахь барчаллагь увкунни Рашидлул ниттил Рабият Оьмаевал ва Кьурбаннул ниттил ХIами Кьурбановал.