Вай гьантрай МахIачкъалалив «Дусшиврул къатраву» лахъа-хъунсса даражалий хьунни «На страже по
жарной безопасности» тIисса цIанилусса Аьрасатнал цIу лещан дайсса ва ххассал байсса къуллугъран 375 шин шаврин хас дурсса выставка
Шикку гьуртту хьунни Республикалул ведомствардал вакилтал, вузирдал ва колледжирттал преподавательтал, студентътал ва дуклаки оьрчIру.
Мероприятиялул сакиншинначитал хьунни ДР-лул БакIчиначIасса администрация ва ДР-лийсса Аьрасатнал МЧС-рал управление.
Выставкалун хас бувсса шадлугърал мажлис тIитIлатIисса ихтилат бунни «Дусшиврул къатрал» каялувчи Ильгама Загировал.
– ЦIу ларчIсса ягу нигьачIаву дусса цайми иширттахьхьун биривсса инсантал ххассал бан мугьлат бакъа бучIайсса инсантал бушиву му хъунмасса затри. Барчаллагь ас-намус ва ларайсса къирият дусса къучагъсса пиша язи бувгьусса МЧС-рал зузалтран, – увкунни ванил.
ДР-лийсса Аьрасатнал МЧС-рал хъунаманал хъиривчу, виваллил къуллугърал полковник Сабир МахIмудовлул цала ихтилатраву кIицI лавгунни, цIу лещан дуллалисса ва ххассал буллалисса къуллугърай зузисса инсантурал гьарица кьини чувшиву ккаккан дуллалишиврун ккаллишиву.
Ванал мукунма кIицI лавгунни, Аьрасатнал МЧС-рал къуллугърай зузисса инсантурал мурад цIу лещан даву бакъассагу, инсантурал оьрмурду ххассал баву хъанахъишиву. Ккаккан дунни хIакьинусса кьини цIу лещан дуллай ишла дуллалисса уттизаманнул технологияртту.
Выставкалий дия нигьачIаву дусса шартIирдай зузисса Дагъусттаннал пожарниктурал ва ххассал бувултрал даврил лахIзарду ккаккан буллалисса суратру. Вай суратирттайну исват хъанай бия пожарниктурал ва ххассал бувултрал пиша язи бувгьуми, нигь-ццах дакъасса, къучагъсса инсантал бушиву.
Выставкалийсса пожарниктурал хьхьичIарасса костюмирдайн бувну, чIалай бия цIанасса чIумал цIу лещан дуллалими мюхчан бан ишла дайсса яннардал ва технологиярттал даража лавай хьуну бушиву.
«Дусшиврул къатрал» хIаятраву дия Дагъусттаннал пожарниктурал ишла дайсса уттизаманнул тIалавшиннардал дузалсса цIу лещан дайсса ва инсантал ххассал байсса техника.
Дагъусттаннал инсаннал ихтиярдал вакил Запир Алхасовлул, МЧС-рал къуллугърал зузалт пишалул байрандалущал барча буллай, кIицI лавгунни цума-цагу инсан хьхьичIа-хьхьичI цала мюхчаншиву дуруччаврил ялув ацIан аьркиншиву. Ванал мукунма агьалинайн оьвчаву дунни, ичIува, кьатIув ва давурттай мюхчаншиву дуруччаву мурадрай явкIмулну бикIияра тIий.
– КIулну бикIан аьркинссар мюхчаншиву дуруччаврил чулухуннай пикри бакъашиву даврийну, цацIунма цайми инсантурангу зарал бияйшиву. ЛичIлулну бикIаврийну инсантураща цала оьрмурдугу бурувччуну, чIявусса балардугу байщун бан бюхъайссар, – увкунни Алхас Запировлул.
Юбилейран хас бувсса мажлис наниссаксса хIаллай концертрал программа ккаккан дунни Республикалул Граждан обороналул колледжрал студентътурал.
Имара Саидова
