Вай гьантрай «Дагестанская правда» кказитрал редакциялий хьунни Дагъусттаннал Росгвардиялул управлениялул хъунаманал хъиривчунан кIанайсса, ЦЛРР-нул (Центр лицензионно-разрешительной работы) хъунама, полициялул подполковник Зураб Баккуновлул пресс-конференция.
Ванал бувсунни агьалинахьхьун ярагъ ласун ихтияр дулаврил, ярагъ ласун ччиминнаясса тIалавшиннардал хIакъираву, жавабру дуллунни журналистътурал суаллахьхьун.
— Ярагъ къабулайссар оьрмулул 21 шин къархьусса, данна тIий дурсса тахсиркаршиврух танмихIрайн кIункIу увну ивкIсса (судрал танмихI баву ялату къаларгсса) инсаннахьхьун, мукунма минначIа ярагъ ласун бучIи буллалисса медициналул заключение дакъахьурча. Судрал танмихI ялату лавгсса ухьурчагу (погашенная судимость) ярагъ къабулайссар, агана ляличIинура оьхIалсса тахсиркаршиву дурсса, закондалул ххуттава увккун ярагъ патронну ва пIякь учайсса затру ишакаш дурсса, терроризмалул ва экстремизмалул иширттацIун дархIусса тахсиркаршиву дурсса, балугъравун къабивминнай гуж-къия дурсса ухьурча, мукуна кIийла-шамийла танмихI кьувкьусса, шинал лажиндарай кIилчин административ жавабрайн кIункIу увсса ухьурча.
Ярагъ къабулайссар мудана ялапар хъанахъисса кIану бакъасса, судрал хIукмулийну ярагъ ласунсса ихтияр зерххусса ухьурча.
Оьрмулул 21 шин къархьуну дунугу ярагъ ласунсса ихтияр дулайссар аьралуннаву къуллугъ буллалисса, мукунма паччахIлугърал ва аьралий организациярдай къуллугъ буллалисса, аьралий чин дусса инсантурахьхьун.
Газрал ва спортрал ярагъ, авчинал ттупанча ва цаппара цаймигу журалул ярагъ ласун ихтияр дуссар 18 шин шайхту.
Граждан ярагъ бусса инсантурал лицензиялул ва ихтиярданул чIун къуртал хьун ца зурул хьхьичI булун аьркинссар миннул чIун лахъи даврил хIакъиравусса аьрза. ЦачIавасса ярагъ инсаннал ябан аьркинссар цува яхьусса кIанттурдай, цаманахьхьун къабириянсса куццуй – кьункьула дишайсса сейфраву ягу муххал къуршилуву. Машиналуву — кьункьула дирхьусса бардачокраву. КIанттул виваллил иширттал органнал зузалтрахь ихтияр дуссар агьалинал ярагъ ябуллалисса шартIру ххал дан.
Цала кIунттихьсса ярагъ инсаннаща ишла бан бюхъайссар цала оьрму мюхчан бан багьлагьисса тагьарданий.
Ярагъ ишла бан аьркинссар чIарахманан зарал къахьунсса куццуй.
ЦукунчIав къабучIиссар битан хъаннийн, мушакъатсса, балугъравун къабивсса инсантурайн.
Ярагъ ишла бувсса чIумал залуннал га цIана (суткалияр ххишаласса чIун гьаннин) баян бан аьрикнссар виваллил иширттал органнайн.
Ярагъ бусса инсантуран къабучIиссар му лавсун занан хIарчIсса чIумал, мажлисирттай, митингирттай ва цаймигу чIявусса халкь бавтIсса кIанттурдай гьуртту хьун нанисса чIумал.
Зураб Баккуновлул мукунма бувсунни ярагъуннил заллухъруннаща цала ярагъ СВО-лун кумагран булун бюхъайшиву. Мукунсса инсантураща Росгвардиялул управлениялийн бувкIун, аьралуннан кумагран тIий ккаккан бувну, кьабитан бюхъайссар ярагъ, тичча тIайла буккайссар ми СВО-лийн.
ЦIанасса чIумал мукунсса 200-нния ливчусса аьрзри бур. Биян бувну бур 20-нния ливчусса ярагъ.
Андриана Аьбдуллаева
