Дагъусттаннал каруннай бияврил (по рукопашному бою) цачIундур командалул цалчинмур кIану бувгьунни Владиккавкказрай хьусса Щалагу Аьрасатнал турнирданий.

Буттал бусласимунийн бувну, Нариман чIивинияцIава спорт ххирасса, сивсусса оьрчI ивкIун ур. МуницIун ва ххуйну дуклайгу ивкIун ур. ОьрчIал дянив сий дусса уну мудан классрал старостану увчIайсса ивкIун ур. Школалий дуклакисса шиннардийва личIи-личIисса спортрал бяст-ччаллаву гьуртту хьуну, цалчинсса кIанттурду бугьайсса бивкIун бур.
– Гьар кIанай, авцIу-авцIуний ттуплий уклай уну, ванал гъира чIалай Маркаровлул школалийн занази увссия. Миккугу жагьилтураву цинявннаяр гужну уклай, жагьилнал гьунар чIалачIисса Маркаровлул увкуну бия цащала дусшиву дусса Абхазнал спортрал министрнахь (хьхьичIвасса футболист): «Ва гужну уккайсса оьрчI ур, цахъи хьхьичIунай ан ччива», – куну. Мукун Сухуми шагьрулийн увцуну ивкIссар хъиннува итххяххан ан. КIира шинай лув-ялув Абхазиянал чемпион хьуссар, Абхазнал футболданул тарихраву хьхьичIунсса бомбардирнал цIагу кьариртссар. Тийх уклакисса чIумал ва Дагъусттаннал технический университетраву дуклай уссия. Тиха учIайссия Дагъусттаннайн Технический университетрал командалухлу уккан. Яла ватандалийн зана хьун багьну, шийхсса клубирттаву уклан ивкIссар», – буслай ур Нариманнул ппу МахIаммад.
Абхазнава лавгун махъ «Сумгаит» клубраву Азирбижаннал высшая лигалуву уклай ивкIун ур.
Дагъусттаннайн зана шайхту, чIярусса личIи-личIисса республикалул турнирдай гьур­тту хьуну Нариманнул цимилагу чемпионнал ва хьхьичIунсса бомбардирнал цIа ларсун дур.

Шанна шинай личIи-личIисса клубирттаву уклай, шамийлагу Дагъусттаннал чемпион хьуну ур. Так ца ва ур шамийла Да­гъусттаннал чемпион хьусса футболист. МуницIун, сайки циняв турнирдай яла гужма бомбардирнал цIагу ласайсса дур. Ца тIуркIулуву 9 гол бавкьуссагума чIун хьуну дур. КIийлва лавсун бур Дагъусттаннал кубок. Футболданий уккаврицIун Нариман гужсса лечугу ур. ЧIявусса бяст-ччаллаву гьуртту хьуну, цалчин увккун ур. Ца-кIира шинал хьхьичI МахIачкъалалив кулпатирттал дянивсса лечаврил турнирданий цалчинсса кIану бувгьуну бур.
Нариманнул ппугу зирангсса, бюхъу-хъит бусса, спортраву итххявхсса ур. Оьтту-ттурчIавух буллусса гьунар бухьунссар арснавугу.
Цувагу кару мусилсса, захIмат ххирасса, гьарнал чIарав ацIан, кумаг бан ччисса жагьил ур.
Ванал бур ххаллилсса кулпат, кIива душ.
Чемпионнал цIанищал барчагу уллай, чIа тIий буру Нариманнун уттиния тихуннайгу чIярусса бюхттулсса ххувшавур­тту ва хьхьичIуннайшивуртту.

Андриана Аьбдуллаева