ХIакьину хасъсса аьралий операциялий Ватандалул мюхчаншиву дуручлачиминнаву чансса бакъар кIирисса точкардай дяъвилул иширттал сасан бувмигу. Миннавасса ца ур ТIюхчардал шяравасса МахIаммад ХIажиевгу. Укунсса аьралитурал кIибачIин аьркинссар цала опыт уттинин дяъвилул иширттаву гьуртту къавхьусса жагьилминнащал.
МахIаммад чIивинийва дирисса, захIмат ххирасса, Ватандалух ччаву дуну тарбия хьусса оьрчI ивкIун ур.
Школа къуртал бувну махъ личIи-личIисса давурттай зийгу ивкIун, 2006-ку шинал лавгун ур аьралуннаву къуллугъ бан. Къуллугъ буллай ивкIун ур танковый полкраву. 2008-ку шинал аьралий буржгу лавхъун зана хьуну ур. 2011-ку шинал, контракт чирчуну цIунилгу аьралуннавун лавгун ур. Къуллугъ буллай ивкIун ур Сириянаву, Таджикнаву. Махъсса шиннардий хасъсса аьралий операциялий ур. ЦIубутIуй хьхьугу, кьинигу талатавуртту най, я оьвчин, я чагъар чичин къахъанай, захIматсса шартIирдай ивкIун ур. Мукьийлла щаву дирну дур МахIаммадлуйн, цал – хъинну захIматсса. Хъин хъанай, реабилитациялий госпитальлайхгу ивкIун, цIунилгу частьравун зана хьуну ур.
МахIаммадлун пахру бур цува Аьрасатнал аьраличу ушиврия. Хаснува цIана, жула билаят неонацизмалущал талатисса чIумал.
ХьхьичI ххуттай авцIусса МахIаммадлун ххуйну бучIи ляхълай бур дяъвилул иширттаву салкьи хьусса опыт. Аьраличу хIисаврай, ванан щиннияргу ххуйну бувчIлай бур цукунсса шартIирдай талан багьлай буссарив жула оьрчIан. Цаятува учай: «На аьраличура, аьраличуну личIангу тIиссара». Аьраличунал пиша бур ляличIисса, кьянкьасса низам тIалав дуллалисса. МахIаммадлун цала пишалул ххуллий ххуйну дучIи ляркъуну дур оьрчIний ларсъсса тарбия: захIмат ххирашиву, чувшиву, яхI бушиву. Яла-яла, жандалий хIайп къаувкуну Ватан дуруччин хIадуршиву. МахIаммад лайкь хьуну ур чIярусса паччахIлугърал ва ведомствалул наградарттан. Ва хъанай ур кIира Къучагъшиврул ордендалул заллу.
