Октябрьданул 30-нний шадлугърал тагьарданий хьунни Дяъвилул ттугъ хушчитурал «Каспий» батальондалухьхьун тапшур баврил церемония.

Республикалул каялувчинал тIимунийну, Дяъвилул ттугъ (Боевое знамя) – му хъанахъиссар Аьра­сатнал саллатIнал цIакьшиврул ва биялалул бакIщаращи.
– Му ттугълилу, саслан дикIайссар аьраличунал хасият, цIакь шайссар гуж ва ссавур, ганал адаврал гьану, – кунни региондалул бакIчинал.
– Дяъвилул ттугъирдалу жула буттахъал ва ттаттахъал ккаккан байсса бивкIссар бюхттулсса гьунарду, дуручлай бивкIссар Ватан. Миннал ххассал дайсса диркIссар ва аьралуннал яхIлил лишан дяъвилул цIараву, цалла жаннугума хIайп къадурну. ХIакьинусса ва Дяъвилул ттугъ тапшур бавугу хъанахъиссар лавгмургу, цIанамургу, ялун бучIантIимургу цанницIун ца базлазисса ххалну. Ва хъанахъиссар Дагъусттан Республикалул ва щала Аьрасатнал хьхьичI ласласисса жаваблувшиву дакIний личIансса ишну , – лаивзунни региондалул бакIчи аьралитурайн.
Сергей Меликовлул батальондалул хушчитал ккалли бунни Дагъусттаннал пахрулун, миннал дяъвилул ххуллу тIурча – чIявучинсса эбратран.
– ХIакьину, ва ттугъ зуйн тапшур буллай, жу дакI дарцIуну буру ттугъ вихшаласса кIунттиву бикIаншиврий. Жула батальондалул бусравну ва чувшиврий биттур буллай бур циняв хьхьичI бивхьусса задачартту, кьянкьану бавцIуну бур Аьрасатнал къаралданий. Жун бувчIлай бур зу бигьасса ххуллу язи бувгьун бакъашиву, амма зу, циняв СВО-лийсса аьралитурал кунма, дакIний битияра, щалла республика зущал душиву, – кунни региондалул бакIчинал.
Дагъусттанлувтурал цIанияту Сергей Меликовлул барчаллагь кунни циняв аьралитурахь ва миннал кулпатирттахь кьянкьашиврухлу ва дакI тIайлашиврухлу.
Сергей Меликовлул шадлугърал тагьарданий булунни Дяъвилул ттугъ хушчитурал «Каспий» батальондалухьхьун. Ттугъ тапшур бунни батальондалул командир Табир Маликовлуйн.
– Буруччара батальондалул ттугъ. ЦIакьну бугьияра ва кIунттихь! Чувшиврийну буруччара жула Буттал кIану. Зул ттугълий чивчуну бикIувча «Ххувшаву» тIисса махъ! Барчаллагь зуйн къуллугърахлу Заннащал архIал!, – лаивзунни республикалул бакIчи аьралитурайн.
Церемониялий Дагъусттаннал бакIчинал батальондалул цаппара аьралитуран дуллунни паччахIлугърал наградартту.
Аьраличунал бурж биттур байни ккаккан дурсса чувшиврухлу ва жандалий хIайп къаучаврихлу «Каспий» батальондалул шама аьраличунан дуллунни медаль «За проявленную мужество».
Дагъусттаннал бакIчинал наг­рада дуллунни старшина Азамат Кьадировлун ва сержант Табир Маликовлун. Ильямин Аьбдуллаевлун награда дуллунни ивкIуну махъ. Ванал медаль дуллуссар аьра­личунал щащар Альбина Арслангереевахьхьун.
«Каспий» батальондалул аьра­литурал цIанияту ванил командир Табир Маликовлул барчаллагь кунни Республикалул бакIчинахь, Халкьуннал Мажлисрал депутатътурахь, региондалул ХIукуматрал члентурахь, Дагъусттаннал Муфтиятрахь, республикалул циняв ялапарлувтурахь СВО-лийсса аьралитуран гьарца чулуха буллалисса кумагирттахлу.
– ХIакьину жун ляличIисса кьинир. Жухьхьун ва Дяъвилул ттугъ булаву – му жун хъунмасса хIурмат бавур ва жаваблувшивур. «Каспий» батальондалул дяъвилул ххуллу дахьва байбивхьуссар, амма хIакьину жу буру зул хьхьичI бавцIуну, ттугъгу кIунттихьну. Ва хъанахъиссар жул Ватандалущалсса дахIаву дакъасса, Да­гъусттаннал талаталтрал уссушивугу. Жун мудангу асарну бикIай зу буллалисса кумаг, зул суждарду ва дуаьрду, – кунни Табир Маликовлул.
Ванал махъ буллунни, батальондалул циняв хушчитурал Дагъусттан цIанихну чIалачIи буллай бушиврий Аьрасатнал Федерациялул Ярагъбу гужирдал составраву, ккаккан дуллай бушиврий чувшиврул ва къучагъшиврул эбрат.
– ДакI дарцIуну ура хасъсса аьралий операциялул лагрулий АьФ-лул Президентнал, Верховный главнокомандующий Владимир Владимирович Путиннул бивхьусса задачартту бартбигьинтIишиврий», – кунни комбатнал ва региондалул каялувчинан дуллунни цIа чирчу­сса шеврон.

ХIадур бувссар
ХI. Аьдиловлул