Награда ларсун дур Аьрасатнал Вирттаврал 20 буттал, премиялул лауреатътал хьуну бур билаятрал личIи-личIисса регионнаясса 11 ппу. Вайннавух бур хасъсса аьралий операциялул вирттаврал, Донбассрай ва дазуцIухсса регионнай волонтёрталну зузиминнал ппухълу.

«Барчаллагь тIий буру хIакь­сса вирттал, ватан дуруччулт тарбия бувминнахь! Гьарца медальданул махъ буссар кулпатрал тарих. Вай кулпатругу ккаллиссар жула билаятрал багьа бакъасса ххазналун. Вирттаврал цIа ларгсса Аьрасат никирая никирай дуллай бур Ватандалухсса ччаву тарбия даврил аьдатру.
Жува ялапар хъанай буру жапасса чIумуву. Амма хIакьину аьлтта чIалай бур Буттал кьини кIицI лагаврил мяъна-мурадрал агьамшиву», – увкунни «Единая Россия» партиялул генсоветрал Ниттихъул ва оьрчIру буруччаврил ва кулпатран кабакьу баврил комиссиялул хъунмур Анна Кузнецовал.
«Отцы России» тIисса щалагу Аьрасатнал жяматийсса ккурандалул правлениялул хъунама, «СаллатIнал ппу» награда дулаврил сиптачи хьусса Анд­рей Коченовлул кIицI лавгунни 2 награда дулаву цачIун дан­сса багьана хаварбакъулий къавхьушиву.

«Жува цинявппа хIакьину ца командалуву гъан дуллай буру аьмсса ххувшаву: фронтрайсса вирттал ва вайннал кулпатру, къинттуллухсса волонтёртал, властьрал органну ва жяматийсса ишккаккулт. Наградартту дагьссар ялун нанисса 2 шинал жула билаятрай мяърипатрал ва аьдатрал гьанурду цIакь баврил ххуллий дан ккаккан дурсса ХIукуматрал мероприятиярттал сияхIравун», – увкунни ванал.
Буттахъан «СаллатIнал ппу» премия дуллалисса шад­­лугърай гьуртту хьунни СВО-лул цалчинсса Аьрасат­нал Виричу НурмахIаммад ХIа­жи­ма­хIаммадовлул ппу Энгельс ХIа­жимахIаммадовгу.
ДакIнин буттанну, Энгельс цувагу цалчинминнавух лайкь хьуссар ва наградалун. Тти тIурча, Виричунал буттал кIунттива ва ларайсса награда ласлай бур Вирттаврал цайми ппухълуннал.

Зулайхат Тахакьаева