«Единая Россиялул» жяматрал кабакьаврил штабравугу кIицI ларгунни Буттал кьини. Ва мероприятие дурну дия Штабращал уртакьну зузисса Дагъусттаннал буттахъал союзращал ва «Гуж цашиврувур» ДРОО-лущал архIал.
Ваний гьуртту хьунни Халкьуннал мажлисрал депутат Даитбаг Сайпов, Дагъусттаннал Хъаннил союзрал хъунмур Интизар Мамутаева, ОьрчIал ихтиярдалсса буллалисса уполномоченный Марина Ежова, Аьрасатнал Виричу НурмахIаммад ХIажимахIаммадовлул нину Сапижат Мазаева.
БавтIцири видеолийну барча бунни ПаччахIлугърал Думалул депутат, Аьрасатнал Виричунал МахIаммад НурбахIандовлул ппу НурбахIанд НурбахIандовлул. Штабрал хъунаманал хъиривчу Зайнаб Аьлимирзаевалгу буттахъул барчагу бувну, махъ буллуна Буттахъал союзрал каялувчи, «ЦIакьсса кулпат» проектрал координатор Заур Амираьлиевлухьхьун. Ванал «СаллатIнал ппу» тIисса медальлу дуллуна Аьрасатнал Вирттаврал буттахъахьхьун, Шамил МахIаммадовлул ппу Набибуллагьлухьхьун ва Руслан Кьурбановлул ппу Маркизлухьхьун, мукунма СВО-лий гьуртту хъанахъисса аьралитурал буттахъахьхьун.
СВО-лий ттуршунниха ливчусса щавурду дирми ххассал бувсса, цайми ххассал буллай унува захIматсса щаву дирну ччаннацIа хьусса лейтенант МахIаммад ГитинамахIаммадовлун Барчаллагьрал чагъар буллуна Сапижат Мазаевал. Барчаллагьрал чагъарду буллуна мукунма Аьрасатнал Пенсионертурал союзрал региондалулмур отделениялул хъунама АьбдурахIман Кьурбановлун, «Память гор» ДРОО-лул хъунама МахIач Шамиловлун, СВО-лул гьурттучи Мурадлун ва ванал буттан Аьбдулжабир Чечилбиевхъан, Кизилюрт шагьрулиясса, шанма миллион арцул СВО-лийн аьркинмур ласун бавтIсса оьрчIал Ашахан Хазанатовлул буттан МахIаммадханнун.
Яла СВО-лий гьуртту хьуминнал оьрчIал дурккуна, аьрай жанну харж дурсса буттахъан хас дурсса дюххансса назмурду. ОьрчIан ккаккан бувна роботехникалул мастер-классру, ккаккан дурна мультикругу.
ПатIимат Рамазанова
