Вай гьантрай Дагъусттаннал халкьуннал шаэр, классик Сулайман Стальскийн 155 шаврин хасну республикалий тамансса мероприятияртту хьунни. Дагъусттаннал паччахIлугърал медициналул университетравугу хьунни ванан хас дурсса литературалул вечер

Вечер дачин дурну ия жула лаккуоьрчI, гьунар бусса балайчи, кIицI лавгсса университетрал студент Даниял Шабанов. Мероприятиялий шаэрнал творчествалун лахъсса кьимат бишлашисса ихтилатру бувна Дагъус­ттаннал Чичултрал союзрал председатель, халкьуннал шаэр Марина АхIмадова-Колюбакинал, халкьуннал шаэртурал Файзуттин Нагиевлул, Аминат Аьбдулманаповал, Щайхт-Ханум Алишевал, Лакрал литературалул секциялул хъунама Супиян Оьмаровлул, Табасаранналмур секциялул хъунмур Сувайнат Кюребековал, Дагъусттаннал Журналистътурал союзрал хъунама МахIаммад Ибрагьимовлул, проректор Ринат Кьурбанисмяиловлул. Цила назмурду дур­ккуна жагьилсса автор Мариям ХIасановал.

Ва мероприятиялий гьур­тту хьусса бусравсса лаккучунал, Аьра­сатнал Чичултрал союзрал член Супиян Оьмаровлул кIицI лавгуна, халкьуннал шаэртурал творчествалия республикалул вузирдал студентътурахь бусласи­сса даву миллатирттал литература яшаврил ххуллийсса ца агьамсса даву душиву.