Дагъусттаннал мазурдил ва культуралул кьини, октябрьданул 21-нний республикалий ниттил мазурдийсса диктант чирчунни. МахIачкъалаливмур диктант чирчунни Дагъусттаннал педагогикалул университетраву, дагъусттан филологиялул факультетрай.
АцIния мукьва мазрайсса диктант чирчунни шикку 300-нниха ливчусса инсантурал. Ниттил мазрал кIулшивуртту ххал дигьин бавтIцири барча буллай, Дагъусттаннал национал политикалул ва диндалул иширттал министр Энрик Муслимовлул кIицI лавгунни, ниттил мазру буруччаврил ххуллий ца агьамсса даву вагу хъанахъишиву. «Маз –миллатрал вирдакIри, жула республикалий дагьайкунсса къулагъас дуллай буссару ниттил мазурдийсса луттирду ва учебникру итабакьаврих. Жунма бувчIлай бур, оьрус мазрал бияла личIисса бушиву, бакъа чара бакъасса маз бушиву. МуницIухва, ниттил мазурдих ва республикалул халкьуннал культуралухгу къулагъас хIура дуккан дуван къабучIиссар. Ва педуниверситетрал ректорнайнгу барчаллагьрай буру, даву ххуйсса даражалий тIайла дуккансса хIарачат буваврихлу.
Гьашинумур диктант ацIилчинссар, шиная шинайн диктантру чичлачиминнал аьдад хъунна хъанай дур, ва иширалгу исват буллалиссар ниттил мазру ябан аьркиншиву бувчIлачIими чансса бакъашиву. Диктантрай ххуйсса гьурттушинна дурми, жу Миннацрал ва ДГПУ-рал чулухасса бахшиширттайну барча буванну», – увкунни министрнал. ДГПУ-рал ректор Нариман Асваровлул бувсунни университетраву Дагъусттаннал культура ккаккан дуллалисса майданну бушиву, шикку мазру ва культура гьаз дуваву мурадрайсса мероприятияртту шайшиву».
Бусанна университетрал хIаятраву диктант чичин наниминнал дакIру шад дуллалисса музыкалул программагу диркIшиву, миллатирттал лаххиялул выставка, миллатирттал дукиягу мукунна. Мероприятиялул ахирданий университетрал преподавательтуран дуллунни наградарттугу. Лакралмур диктантрал хъар дия ДГПУ-рал дагъусттан мазурдил кафедралул доцент, Щамхаллул душ Саадуллаева Римлянай. Ванил укун бувсунни «Илчилул» корреспондентнахь: «Диктант чирчунни 12 инсаннал. Текст МахIаммад Башаевлул «Бавцусса душ» тIисса кьиссалувасса бутIа бия. Ва текст жучIан гьан бувну бия Дагъусттаннал КIулшиву дулаврил ва элмулул министерствалул. Шиккува кIицI лаганна, диктант яла ххуйну, гъалатI бакъа чирчусса студенткал цIагу. ДГПУ-рал дагъусттан филологиялул факультетрал студентка, Сиражуттиннул душ Чавтараева Аьйшат».
