Октябрьданул 16-нний Сергей Меликов хьунаавкьунни хасъсса дяъвилул операциялул ветерантуращал. Мероприятиялий гьуртту хьунни СВО-лул Ветерантурал ассоциациялул координациялул советрал председатель генерал-полковник Сергей Макаров. Региондалул бакIчи ванащал хьунаавкьуну, ххал бивгьунни СВО-лия зана хьуминнал агьамшиву дусса масъалартту.
Сергей Меликовлул барчаллагь куна циняв батIаврий гьуртту хьуминнахь – ми бур 150-ннахъаха ливчусса ветерантал.
«ЦIанасса ппурттуву жула билаятрайн дирну дур бигьа дакъасса кьинирду, чIявуми жула ватанлувтал ярагъгу кIунттихьну дуручлай бур Ватан, жула бурж бур жущава шаймур бувну, Ххувшаву гъан даву, жула Ватан дуруччайминнан, миннал мачча-гъанминнан кумаг баву. СВО-лий гьуртту хъанай бур жула ватанлувтал, миннавасса чIявуми фронтрайн лавгссар хушрай. Миннал цинявннал ккаккан дуллай бур чувшиву, ларсун дур наградартту, орденну ва медальлу. ХIакьинусса кьини АьФ-лул лавайсса даражалул Виричунал цIа ларсун дур 12 дагъусттанлувнал. Цуксса хIайпнугу, миннавасса 6 дуллуну дур ливтIуну махъ. Жува миннан икрам булаллиссару. Миннал жанну дуллуссар жула билаятрал чаннасса ялун бучIантIимунил цIаний, неонацизмалущал талай», – куна Сергей Меликовлул.
Дагъусттаннал бакIчинал бувсуна дяъвилул операциялия зана къавхьусса аьралитурал ва цIана талатиминнал мачча-гъанминнан буллалисса кумаграл хIакъираву.
СВО-лул гьурттучитуран федерал даражалийсса социал кумаграяр ххишала, ккаккан бувну бур региондалулмур социал кумаггу.Сергей Меликовлул тIимунийну, кумаг бартбигьлай бур цила чIумал ва щаллуну. Арцуйнусса кумаг буллай бур «Циняв цачIу» фондрал. Ларгсса шинал июньдалия шийнмай Дагъусттаннай зий бур мукунма билаятрал Верховный Главнокомандующийнал сипталийну дузал бувсса «Ватан дуруччайми» фондрал филиал.
Региондалул бакIчинал тIимунийну, хъуннасса даву дуллай бур СВО-лул гьурттучитурал щахъаннил, хъаннил, ниттихъал.
Региондалул каялувчинал личIинува бувсуна СВО-лул гьурттучитурал цала сакин дурсса «Память гор» жяматийсса сакиншиндарал хIакъираву. ХIакьинусса кьини мунил отделенияртту сакин бувну бур республикалул циняв муниципалитетирттай.
Сергей Макаровлул бувсуна СВО-лул Ветерантурал ассоциациялул давурттая. Ванал личIинура кIицI дурна дяъвилул ишру хъанахъисса регионнайсса оьрчIан Дагъусттаннай сакин дурсса оьрчIансса бигьалагаву.
БатIаврий махъ лавхъуна мукунма «Память гор» сакиншиндарал председатель МахIач Шамиловлулгу.
ХIадур бувссар
ХI. Аьдиловлул
