Дагъусттаннал Туризмалул ва халкьуннал художествалул сянатирттал министерствалий хьунни диндалул туризм хьхьичIуннай даврин хас бувсса ккуркки стол.
Шикку гьуртту хьунни республикалул туризмалул ва халкьуннал художествалул сянатирттал министр Эмин Мерданов, Дагъусттаннал Муфтиятрал вакил Умар Абакаров, МахIачкъалаллал ва Грозналлал архиепископ Варлаам, Республикалул Туризмалул ва халкьуннал художествалул сянатирттал министерствалучIасса Жяматийсса советрал председатель, Аьрасатнал паччахIлугърал туризмалул ва сервизрал университетрал МахIачкъалаливсса филиалданул директор Зюльмира Ханбабаева, информациялул турданул лагрулий жулла республикалийн 15 шагьрулия (Москав, Владимир, Кропоткин, Астрахань, Нижний Новгород, Арзамас, Владикавказ, Красноярск, Самара, Екатеринбург, Киров, Челябинск, Баку, Минск) бувкIсса православный епархиярдал вакилтал ва цаймигу бусравсса хъамал.
Ккуркки столданул давривух видео-конференциялул журалий гьуртту хьунни Оьруснал Православ Килисалул Комиссиялул председатель митрополит Матфей Псковский ва Порховский ва «Развитие внутреннего и выездного паломничества» тIисса цIанилусса зузи группалул каялувчи игумения Михаила.
БавтIминнал хьхьичI ихтилат буллай, Эмин Мердановлул увкуна:
– Республикалий ччяния шинмайва нахIуну, бавкьуну ялапар хъанай бур дунияллул шанна диндалул вакилтал. Ва кIану тасттикь буллалиссар жучIавасса хъинну чIявусса диндалул объектирдал, исламрацIун, ххачпараснацIун ва иудаизмрацIун бавхIусса тарихрал ва культуралул объектирдал, – куну.
– Дагъусттан хьун бюхъайссар диндалул туризмрацIунсса машгьурсса кIанттуну. Шикку, Дарбант шагьрулий, бур Аьрасатнал ца яла хьхьичIавамур храм, мукунма бур ххачпараснал дянивмур аьсрулул Датунский храм – Шамильский райондалий, дур караматсса цаймигу гьайкаллу, – увкуна архиепископ Варлаамлул.
Ккуркки столданул цайми гьурттучитурал бувми ихтилатругу бия региондалий диндалул туризм лядуккан давриясса, Дагъусттаннал рувхIанийсса ва культуралул аваданшиврущал кIул хьун ччисса щаллагу дунияллиясса хIажчитурансса ва туристътурансса шартIру щаллу давриясса.
«Этнотревел» ООО-рал генеральный директор Саъдулла Оьмаровлул бавтIми кIул бувна жулла республикалийсса тIабиаьтрал, культуралул ва диндалул объектирдайнсса шанна кьинисса турданущал.
Бадрижамал Аьлиева
