РАСУЛЛУЛ АРС ОЬМАРОВ МАХIАНМАД
Вай гьантрай, хар-хавар бакъа ялун дирсса лавмартсса цIуцIаврища ххассал къавхьуну, дунияллия лавгунни 1-мур ЦIувкIратусса Расуллул арс Оьмаров МахIанмад.
Увссар ва 1965 шинал. 1988 шинал Дагъусттаннал политехнический институтгу къуртал бувну, МахIачкъалалив Сепараторду бай заводрай зий ивкIссар инженерну. 1997 шинал Астраханнай къуртал бувссар хьхьирил лаваймур училище. Зий ивкIссар жамирдай. 1999 шиная шинай зий уссия кьай духхай жамилул капитанну, кьатIаллил билаятирттайнгу лагайссия ччя-ччяни.
Зузиссаксса хIаллай ванал ккаккан бувну бур даву цила кIанайн руртун дувайсса пишакаргу, хъунамагу ушиву, муниятугу хъуниминнал дянивгу, уртакьтурал дянивгу хъинну кьимат лахъну уссия. Ххирассия ва шяраваллил жяматрангу. МахIанмад школалий дуклакинийва дарсирдалгу, гьарца чулухагу итххявхсса, хъярч-махсара ххирасса икIайссия. Ванал усттарну, цIу буну бувайсса хъярчирдал ваначIан агьали кIункIу бувайва, ванал бусласимуних гъирарай вичIи дирхьуну бикIайссия. МахIанмад цувагу дакI-аьмал хъинсса, гьарцаннан бусравсса уссия. Кулпат Ажищал, лайкьсса тарбиягу дуллуну, ларайсса кIулшивурттугу ласун бувну, чивун уккан увссия кIия арс. Оьмардул, Волгоградрай медициналул институтгу къуртал бувну, ккарччал хIакинну зий уссар, Камиллул МГУ-лул юрист шайсса факультет бувккуссар. Къаивтунни МахIанмад вайннал ташурду баннин, мюрщулт карав бишиннин.
МахIанмад дунияллия лагаврил хъуннасса кьурчIишиву кIидачIлай, жижара буллай буру кулпатрахь, арсурваврахь Оьмардухь ва Камиллухь, уссурваврахь Сулайманнухь, Супияннухь, Будайчихь, ссихь Эльмирахь, вайннал наслулухь, щалвагу агьлу-авладрахь.
МахIанмадуд рухI бигьаний дишиннав, алжаннул ххари аннав, арсурваврал, гъан-маччаминнал оьрмурду лахъи баннав.
1-мур ЦIувкIуллал жямат
Уссил МахIанмадлул аьпалун
Уссай, щичIа кьабитав
Мудан мурччайсса пишру,
Цуманайн тапшур бував
Къуртал къашай махсартту?
Дурус буттал бувтссаксса
Оьрму бусса кIулссияв,
Жандалий рахIму бакъа
Хьхьу-кьини зисса цанъяв?
Циванъя щащар байсса
Ччаврих машан лавс кулпат,
Арсваврал тIутIал дакIру
Гъюжу дуккан дувайсса?
Ца бакъа бакъа ссугу
Аьсивну кьабивтунни,
Ласналмур дард дурхIуну,
Вилмур духIлан багьунни.
ЧIивима уссу уна
Яувангу къавхьунна,
ОьрчIний, чIивиний куна,
Хъазамрайн чIувин увну.
ДакIниймур бартбигьиннин,
Заннал хьхьичI лергъ чивияв,
Леххаврий хьхьичIа лавгун,
Жу махIрум къабавияв…
Супиян Оьмаров
Дагъусттаннал Чичултрал союзрал правлениялул цIанияту ва «Илчилул» коллективрал цIанияту жижара буллай буру бусравсса лаккучу, Дагъусттаннал Чичултрал союзрал лакрал литературалул секциялул хъунама, Поэзиялул театрданул хъунаманал хъиривчу, Расуллул арс Оьмаров Супияннухь, ванал ххирасса чIивима уссу
МахIанмад Оьмаров
дунияллия лагаврийн бувну.
Имандалий лавгун хьуннав, гьав нурданул дуцIиннав, махъсса цинявннал оьрмурду лахъи баннав.
Дагъусттаннал Чичултрал союз, «Илчилул» коллектив
Хъуннасса кьурчIишиву кIидачIлай, жижара буллай буру жула бусравсса дус Супиян Оьмаровлухь, ванал ххирасса чIивима уссу
МахIанмад
аьпалул шаврийн бувну. Цал бунагьирттал аьпа баннав.
Имандалий лавгун хьуннав, гьав нурданул дуцIиннав, махънал оьрмурдай барачат бишиннав.
Ваччиял жямат, дустал, гьалмахтал
