МахIачкъала шагьрулул клиникалул азарханалул лор отделениялул заведующий, ЦIуссалакрал райондалийсса Аьхъардал шяравасса Ясудара АхIмадовлул цал архIал мукьва захIматсса операция бунни Луганскаллал клиникалул азарханалул къашайшалтрай.
Луганскаллал региондалий лавайсса даражалул технологиярттайн бувсса операцияртту цалчинни буллалисса. Операцияртту бувсса мукьагу къашайшала вичIилуву оьцIуцIаву хьусса, анаварсса мутталий хъин ан аьркинсса ивкIун ур.
ХIакиннал бусаврийн бувну, отит чIявусса инсантурай хьунадакьайсса, вичIаву кьакъабагьайсса аьлагъужа бусса, бакI гьанан бикIайсса лишанну дусса, ххуй дакъасса азар дусса дур. Ва азар хъин къадарчан, инсан бюхъайссар къюкI хьун, ягу отит менингитрайн кIура даейссар.
Операция буллалисса ппурттуву Ясударал Луганскаллал коллегахъан ккаккан дунни уттизаманнул методру ва микрохирургиялул техника ишла дайсса куц. Луганскаллал клиникалий бувсса мукьвагу операция къашайшалтран захIмат къавхьуну къуртал хьунни.
ЦIанасса ппурттуву Ясудара ухлай ур Луганскаллал региондалул тIалав бувсса «Южный» тIисса медициналул бригадалувун.
ЧIал къавхьуну хIакин уттигу гьан тIий ур Луганскаллал Халкьуннал Республикалийн. Шикку ванах ялугьлай ур операцияртту бансса 25 къашайшала.
«Ттул хъунмур ххаришиву дикIай операцияртту бувну, къашайшалт рязи бан шавриясса. Мяйжаннугу, хIакин хьхьичIа-хьхьичI икIан аьркинну ур цала иттав бурувгсса къашайшалтрай дакI цIимисса ва личIлулсса аякьа дуллалисса. Ттула давриву яла хъунмур кьиматрангу ккалли бара къашайшалтрал чулухасса барчаллагьру», – тIий ур хIакин.
Имара Саидова
