Октябрьданул 8-нний Къизлардал райондалийсса Аверьяновка шяраву хьунни «Дагъусттаннал кулпат» тIисса щаллагу республикалул хъуннасса байран. Ва Кулпатрал шинал шадлугъирттал лагрулий сакин дурну дия Дагъусттан Республикалул ХIукуматрал, ЗахIматрал ва социал хьхьичIуннайшивурттал министерствалул, Культуралул министерствалул. Къизлардал райондалул администрациялул чIарав бацIаврийну.
Байрандалийн бувкIуна Дагъусттан Республикалул ХIукуматрал председатель Аьбдулмуслим Аьбдулмуслимов бакIчисса хъунмасса делегация. Ва хьунабакьин бувккуна Къизлар шагьрулул мэр Александр Шувалов ва Къизлардал райондалул администрациялул бакIчи Аким Микиров. Бусравсса хъамаллурал хьхьичIун цIу-ччатIущал бувккун бия Къизлардал Терский казачий ансамбльданул артистътал. Аь. Аьбдулмуслимов цащалвасса уртакьтуращал увккунни циняв гьурттучитурацIух, бунни вайннащал яхши-хаш, ххал дунни майшандалий дирхьумур.
Байрандалийн оьвкуну бия 5 ва ххишаласса оьрчIру бусса, ятинсса оьрчIру хъуни буллалисса кулпатирттайн, СВО-рал гьурттучитурал кулпатирттайн ва 45 шинаяр ххишалану цачIу оьрму бутлатисса лас-щарнийн. Вайннан наградартту ва бахшишру дуллунни премьер-министрнал.
Аверьяновка шяраваллил Культуралул центрданул лагма-ялттусса майданнив бивщуну бия 18 муниципалитетрал чятирду. Шикку ккаккиялун дирхьуну дия халкьуннал усттартурал каруннил дурмур, халкьуннал янна-ус, ичIура ишла дувайсса матахI, миллатирттал дуки-хIачIия.
Яла хъинмур хъамалушиннану дия цIарай бувсса пулав ва цIарайсса хъуни самовардавасса чяй.
Байран хьуна тяхъасса ва дакIний личIансса. Ва щаллу хьуна республикалул районнал ва шагьрурдал творчествалул коллективирттал хIадур дурсса концертрал хъуннасса программалийну.
ДакIнин бутан, «Дагъусттаннал кулпат» цIанилусса цалчинмур байран хьуссар ва шинал августрай Табасараннал райондалий. Ваний гьуртту хьуссар Кьиблалул Дагъусттаннал 14 райондалиясса инсантал. КIилчинмур байран хьуссар сентябрь зуруй Хъунзахъиял райондалий. Шикку гьуртту хьуссар зунттал 19 райондалиясса инсантал.
Бадрижамал Аьлиева
