Лакрал райондалул администрациялул актовый залдануву хьунни Учительнал кьинилун хас дурсса шадлугъ.

Учительтал барча бан бувкIун бия администрациялул ва райондалул идарарттал зузалт, дуклаки оьрчIру.
Райондалул бакIчи Юсуп МахIаммадовлул цIания кIулшиву дулаврил зузалтрахь пишакарсса байран барча дунни ванал хъиривчу Явсупи ХIамзаевлул. Ванал кIицI лавгунни хъун хъанахъисса ник тарбия давриву кIулшиву дулаврил зузалтрал бихьлахьисса захIмат.

«ХIакьину жула райондалий оьрчIан кIулшиву дулаврил ва ми тарбия баврил ххуллий зий ур кIиттуршунния ливчусса педагог. Чансса бакъар вайннал дянив цала дакI тIайласса захIматрайну, язи бувгьусса пиша ва дуклаки оьрчIру ххирашиврийну так ца дуклаки оьрчIан бакъасса, вайннал нитти-буттан ва жяматран бусрав хьусса. Вайннава сайки бачIиксса бур хъун хъанахъи­сса никиран кIулшиву дулавриву ва тарбия бавриву бивхьу­сса тIайлабацIусса захIматрахлу Аьра­сатнал КIулшиву дулаврил министерствалул наградартту, «Почетный работник общего образования РФ» тIисса лишан ва «Дагъусттаннал лайкь хьусса учитель» тIисса цIа хIалал дурсса.

На дакI дарцIуну ура жула педагогтурал пишакаршиврул даража ва усттаршиву ларайсса душиврийну дуклаки оьрчIал дуккавриву­сса хьхьичIуннайшивуртту аьлтту хъанай душиврий личIи-личIисса конкурсирттай. Учительнал пиша бигьасса бакъассар. Инсаннал бюхъулийн, гьунарданийн вихну ушиврул кумаг буллалиссар ванан хъун хъанахъисса никиран лайкьсса кIулшивугу, тарбиягу дулун. Якъадуцаннав му вихшала зуяту, хIурмат бусса педагогтал! Хаснува барчаллагь учин ччай бур 40 — 50 шин ялун нанисса никиран кIулшиву дулаврил ва ми тарбия баврил ххуллий захIмат бихьлай харж дурсса ветерантурахь».

Хъирив кIулшиву дулаврил зузалт барча бувна райондалул КIулшиву дулаврил управлениялул каялувчи Муртазааьли Аьлишаевлул.
«Зул пиша ца яла чара бакъа аьркинмур, жяматран бусравмур ва тIалавмурди. Гьамин, зури оьрчIан кIулшиву дуллалисса, вайннаву ххуйми хасиятру тарбия дуллалисса, вайннан пикри буллан ва захIмат буллан ла­хьхьин буллалисса. ХIакьину райондалул кIулшиву дулаврил аралуву зий ур 219 педагог. Вайннава сайки кIиттуршуннийн бив­ссаннал дур ларайсса кIулшиву.

КIицI бан ччива, щала Дагъусттаннай яла лахъмур процент ларайсса кIулшиву дусса педагогтурал бур жула райондалий. Ва хъунмасса интеллектуал потенциалди. Жула райондалул учительтал даингу хьхьичIунсса ххуттай бивкIссар, чIумул тIалав­шиннардащал архIал ша лавсун най бивкIссар. КIулшиву дулаврил цIусса технологиярттугу ишла дуллай, буттал кIанттул педагогикалул школалул аьдатругу хъамаритан къаритлай зий буссар хIакьинугу, республикалийсса конкурсирттай ва олимпиадарттай хьхьичIунсса кка­ккияртту хьун дуллай», – увкунни ванал.

Педагогтал барча бунни Гъумучиял школалул директор Соня Макьаевал, дуклаки оьрчIал нину Диана ХIажиевал.
Аьдатрайн бувну, ларгсса дуккаврил шинаву хьхьичIунну зий бивкIсса кIулшиву дулаврил зузалтран дуллунни ларай­сса наградартту – «Почётный работник сферы образования РФ» тIисса цIа ва КIулшиву дулаврил зузалтрал профсоюзрал чулуха­сса Барчаллагьрал ча­гъарду ва премияртту.
Учительтал барча бан шеърирду бувккунни ШавкIуллал школалул дуклаки оьрчIал.
Концертрал программа кка­ккан дурунни райондалул магьирлугърал зузалтрал.

Зулайхат Тахакьаева