Украиннал аьрщарай нанисса хасъсса операциялуву гьуртту хъанахъисса ЦIуссалакрал райондалиясса чIивима сержант Зубаир Мусаев лайкь хьунни ПаччахIлугърал ларайсса наградалун. Операциялул иширттаву цала даража ккаккан баврихлу Зубаирдун дуллунни Александр Суворовлул медаль.
Зубаир увну ур ТIюхчардал шяраву. Шяраву школагу къуртал бувну, лавгун ур аьралуннаву къуллугъ бан. Дуклакисса шиннардийгу Зубаир спортраву итххявхсса, школалул жяматийсса иширттавух чялишну гьуртту шайсса оьрчI ивкIун ур. ДакI-аьмал хъинсса, кумаграх мюхтажнал чIарав ацIан хIадурсса ушиврийн бувну, бусравну ивкIун ур аьралитурал дянивгу. Аьралий къуллугъ буллай ивкIун ур Росгвардиялуву «Урал» машиналул шупIирну. Низам дусса, жаваблувсса аьраличу цимилгу лайкь хьуну ур командованиялул чулухасса Барчаллагьран. Аьралуннава зана хьуну махъ Ханкалалий контрактрай къуллугъ буллай ивкIун ур. Тичча Зубаир гьан увну ур хасъсса аьралий операциялий гьуртту хьун. Украиннаву хасъсса операция байбивхьусса цалчинсса гьантрая шихунай Зубаир уссар Ватандалул мурадру буручлай.
«ЧиваркIуннал буржри Ватан дуруччингу, мунил цIаний жан дулунгу», – тIисса бур ванал девиз.
Зубаир цувагу цалчинсса гьантрайва къизгъинну аьралий ишру нанисса кIанттурдайн агьну ур. Ва ивкIун ур боеприпасру духхайсса отделениялул командирну.
Буниялагу, хIакьинусса кьини Украиннал аьрщарай хъанахъисса иширттал вац-ццах бутлай бур. Оьрмулун хъуннасса нигьачIаву дусса ишру нанисса Запорожскаллал областьрай лайкьсса даражалий аьралий бигарду бартбигьлай бур Зубаир ва ванащалсса аьралитал.
Укунсса жагьилтал буссаксса, билаятрал бучIантIимур чаннасса бушивриясса цукунчIавсса нигь дакъар.