Каспийскаллал флотилиялул ва «Каспий» батальондалул хьхьирил бахьттагьалтрал 177-мур гвардиялул полкрал аьралийтуращал хьунаавкьусса чIумал талаталтран дуллунни мототехника, тепловизиондалул прицеллу, дронну ва цамургу аьркинлугъ.
СВО-лий хьхьичIунну талатисса аьралийтуран Сергей Меликовлул дуллунни наградарттугу.
«Ттун зухь цинявннахь барчаллагь чин ччай бур зу Ватандалул хьхьичI къучагъну, дакI марцIну биттур буллалаврихлу зула бурж.
На зун чIа тIий ура тIайлаба­цIуртту ва хьхьичIуннайши­вуртту. Зун цинявннан бувчIин аьркинссар жу ялугьлай бушиву зу ххувшаврищал зана хьунни. Жу зущал буссару, республикалул ттинияр тихунмайгу зунгу, зул кулпатирттангу бюхъайсса кумаг буллантIиссар», – кунни Дагъусттаннал бакIчинал.
Ванал кIунттища наградартту ларсунни СВО-лий цала аьралийтурал бурж дакI марцIну биттур буллалиминнал бакъасса, пишакаршиврул ва инсаншиврул бурж биттур буллалиминналгу. Миннавух бур «Каспий» батальондалул имам МухIаммад Мукьошдибиров ва Дагъусттаннал журналист ХIусайн ХIусайнов,
Республикалул бакIчинал бувсунни ми иширттаву хъунмасса хIарачат буллай бушиву муниципал сакиншиннал каялувчитурал. Ми муданма лагайсса бур цала ватанлувтурачIан, миннан байсса бур аьркинсса кумаггу.
Сергей Меликовлул хъунма­сса кьимат бивщунни Аьрасатнал ПрезидентначIасса Дагъусттаннал даимансса вакилханалул хIарачатирттангу, мунил муданма гуманитар кумаг буллай бур Дагъусттаннал аьралийтуран.