Дагъусттаннал парламентрал спикер Заур Аскендеровлул дагъусттанлувтал барча бунни агьамсса тарихрал кьинилущал.

«ХIакьину билаятрал летописьрай бур цIанихсса тарих.1943 шинал октябрьданул 9-нний совет аьралуннал къуртал дур­ссар Ккавкказуллахлусса талатаву, фашистътурал Германиянал аьра­луннаяр ххув хьуну.
Совет саллатIнал чувшиврийну ва виричушиврийну душман ххит уккан увну, дардагъил увссар Ккавкказуллал аьрщарая.
Жура тачIав къахъамаританну дагъусттанлувтурал виричушиву, миннал гьурттушиву дур­ссар ца яла хъуннасса агьамшиву дусса ва хъунмасса хIаллай лахъи ларгсса Буттал кIанттул цIанийсса талатавриву.
Хъуннассар жула ватанлувтурал бихьлай бивкIсса захIматгу, дяъвилий ккаккан буллай бивкI­сса гьунардугу дакIний битаврил мяъна. Жува жущава шаймур буван аьркинссар вирттаврал аьпа никирая никирайн дакIний битаншиврул.
Жула инсантал мудангу итталун багьайсса бивкIссар виричушиврийну, ккаккан бай­сса бивкIссар, захIматсса чIунну дуркIукун, Ватандалул цашиву дуруччин хIадурну бушиву. ХIакьину, билаят нацизмалущал талатисса чIумал, дагъусттанлувтал Аьрасатнал цаймигу халкьуннащал цачIу, жаннугу хIайп къадурну, талай бур хасъсса дяъвилул операциялий. Ватандалул цашиву ва мурадру буручлай. Дагъусттаннай мукун бивкIссар, мукун бигу бикIантIиссар!» -тIий бур лабизаврий.
ХIадур бувссар
ХI. Аьдиловлул