Сентябрьданул 28-нний ШавкIрав хьунни исламрал цалчинсса журналист, 2008 шинал ва зуруй дунияллия шагьидну лавгсса Аьбдуллагь Аьлишаев дакIнин утлатисса аьпалул мажлис.
Ва республикалий вагьабизмалущал талатисса ца яла цIакьмая. «ТВ-Чиркей» исламрал телеканалданий тамансса передачарду дачин дурмагуя, авторгуя. «Дакьаву зул къатлун» тIисса исламрал передачагу дачин дурну уссия. Цила чIумал биялсса аваза бувтссия ва уртакьну хIадур дурсса, вагьабизм дащуй дихьлахьисса документал журалул киносуратирттал.
Аьбдуллагь цукунсса журналистну, инсанну дакIний ливчIссарив бусан, ванал рухIиран мюнпат хьуннав тIисса мурадрай кьулгьу-кьуран буккин бавтIун бия даврил уртакьтал, дустал, мачча-гъанми, шяраваллил агьлу. Мероприятиялул ахирданий ШавкIуллал шяраваллил хъунаманал бувсунни Аьбдуллагь Аьлишаевлул цIа шяраваллил цания-ца кIичIираваллин дизансса пикри бушиву. Аьбдуллагьлул уссил, ванала ххуллийх нанисса АхIмадлул барчаллагь увкунни уссил аьпа уттава бувансса даву дуван дакIний бушиврухлу, кIицI лавгунни, ШавкIуллал шярава кIичIирттан цIарду дизан лайкьсса цаймигу хьхьичIунсса инсантал бувкшиву.
ПатIимат Рамазанова
