Аьрасатнал Федерациялул ДУМ-рал председатель, щайх – муфти Равил Гайнуттиннул «За заслуги» тIисса Аьрасатнал бусурмантурал чулухасса медаль тапшур дунни Рамазанова Бадуржигьан ХIамидовнан.

Равил Гайнуттиннул барчаллагь увкунни Украиннал аьрщарай хасъсса аьралий операция байбивхьуния шинмай аьралитуран кумаг буллалисса къучагъсса хъамитайпа, Каспийск шагьрулий ялапар хъанахъисса, ЧIяйннал шяравасса Бадуржигьан Рамазановахь. Ванал кIицI лавгунни цува пахрулий ушиву рувхIанийсса давурттавух чялишсса гьурттушинна дуллали­сса хъамитайпалия.
«Ттун вил чумартсса кумаграяту чIявусса бавссар. Ина кунма­сса ниттихъул махъ буссаксса, ххувшаву ласунсса вихшалагу хъиннура цIакь хъанай дур. Жулва халкьуннал дугъришиврул, ка-кумаг бан хIадуршиврул, вайннал дуллалисса чумартсса тIуллал гьавас бутлай бур аьралитуравун. Дунияллийсса оьрмулул дуцин хъинбала-хъиншивурттайнур дайсса. Барчаллагь вил чумартсса каруннан, ина Хъунасса Аллагьнал ябаннав!», – увкунни Равил Гайнуттиннул.
ДакIнин бутанну, Бадуржигьан Рамазанова чIявучин кIулшиву ччя-ччяни аьралитуран кумаг буллалаврийну. Ванил цила дакIнил гъилишивугу, чанигу цимилгу биян був­ссар СВО-лий гьуртту хъанахъисса аьралитурачIан. Бадуржигьан лайкь хьуссар аьралитуран кумаг буллалисса инсантуран дулайсса «Команда Путина» тIисса ларайсса наградалунгу.
Дуки-хIачIиялийну гьашиву къадурну, аьралитуран ванил тIайла дуркссар гъилисса жуларду, шанийхдихьулт, кIараллу ва кIараллал къатри. Аьралитурансса кIараллугу цила каруннах бурувххуну бия. Бакъухъ, аьрайнгьавккуртту жула ужагъирттай дуллангума бигьа дакъа­сса дукрарду дур. Вай дукрардугу Бадуржигьаннул, кIу къабивзун, хьхьуния кьини дурну дуллай бур.
Ванищал хIала-гьурттуну зий бур Дагъусттаннал «Народный фронтрал» отделениялул вакилтал.
«Жува бакъа тайннан кумаг щилли бантIисса. Жула аьралитуран кIулну бикIан аьркин­ссар цахва ялугьлай бушиву ни­ттихъул, ссурвал, уссурвал, оьрчIру ва маччами. Жува буржлувссару тайннал чIарав бацIлан, шайсса куццуйсса ка-кумаг буллан», – тIий бур Бадуржигьан.

Имара Саидова