25 шинал хьхьичI, 1999 шинал, хар-хавар бакъа ЦIуссалакрал райондалийн дунияллул террористътурал кьюкьри ххярхсса тарихрал иширан хасну кказитрай рирщусса язи-язими макьалартту.

1999-ку шинал сентябрь зуруй ЦIуссалакрал аьрщарайн ххявхсса террористътал ххит бувну 25 шин шаврин хас дурсса мероприятиярттал лагрулий ЦIуссалакрал шяраву тIивтIунни тай шиннардий райондалул прокуратуралий зий ивкIсса ЖахIпар Буттаевлул аьпа абад буллалисса ула.
Ришлай буру та чIумал ванал бакIрачIан бувкIмуния бусласисса макьала.

ЦIуссалакрал райондалул гьарица шяраву тай дяъвилул иширттацIун бавхIусса цала-цала хаварду, бусаларду бур. 1999 шинал сентябрь зурул 5-нний ЦIу­ссалакрал шяравун боевиктал ххявхсса чIумал, райондалул прокуратуралул следователь ЖахIпар Буттаевлул бакIрачIан бувкIмур бавнал ниттил лякьлува гьухъуву увксса ивкIун ур учай. Бавссия ивкIуну ур тIий кьаивтсса ЖахIпар бивкIулул ххяппурттава увксса хавар жунгу. Мунащал хьунабакьин ччай мадара хIалъя. Цанма ЖахIпардун муния гъалгъа тIун къаххирар, ци чулийгу, му иширал хIакъираву цIухху-бусу буллай, ва кулпатрал бакIрачIан бувкIмур балжину кIул бан бювхъунни.
Та кьини дакIнин рутлай, кувний хъяй, кувний хъювсул буклай, цинма ккавкмур буслай бия ЖахIпардул кулпат Шавлукьгу.
Та бигьалагай кьини ЖахI­пар, цала дустуращал ва арснащал авлий лавгун, кIюрххицIун зана хьуну ур шавай.

— Ва дахьа шанавун лавгсса чIумал, кьатIату биту-ххитулул чIурду баллан бивкIуна. Анавархъиндарай хялатгу ялун руртун, кьатIув бувкра. КIичIираву лахъисса чIиртту бусса, камуфляж янналувусса боевиктал ххал хьунни. Гъан хьуну, зу цару, ци аьркинни тIисса ттухь, вил къуллугъ цир, насу му бакIрайн карщи рути, — увкунни на кьатIув бувксса куц ххуй къабивзун, — буслай бур Шавлукь. — Зана хьуну, ЖахIпар изан уллан бивкIра. — Ити шану лахъан, му кIюрххицIунай ув­кIуннича, чIурду къабаян, бакI­райн ци-дунугу рути, — тIий дур дугьарасса ттулла нинугу.

Ахиргу, чантI учин увну, бусав шяраву боевиктал бушиву. Му чIумал жул къатрал магъуйн ккулларду щилащисса чIурдугу бур баллай.
Иш-тагьар дурчIусса ЖахIпар анаварну телефондалучIан ххявххун ур. Кулпатрал бувсун бур цуппагу оьвтIий бивкIшиву, амма райотделданий щилчIав гьаз буллай бакъашиву. Лув-ялув оьвтIий, ахиргу, ЖахIпардуща милицанащал дахIаву дан бювхъуну бур. Дежурныйнал бувсун бур райотделданул лагма рургьуну бушиву, хIатталлил чулуха минометирттава битлай бушиву.

14 шинавусса хъунама арснахь, ичIувамигу бувцуну, шярава насу куну, машиналул кIуллигу дуллуну, ЖахIпар, цала ярагъгу лавсун, райотделданийн авчуну ур. Ххуллийх ванан хьунаавкьуну ур цала машиналий най нукIува райком комсомолданул 1-ма секретарьну ивкIсса МахIаммада. Райотделданийн иян ува куну, щяивкIун ур.
БачIи ххуллу битаннин вай боевиктурайн бакIрайн багьну бур.

— ШанбачIулий ца бала боевиктурал бия, кIиттуршаксса инсан. Амма жухь цичIав тIисса цучIав акъая. СсихI къадур­ккун, миннал жу жула ххуллийх гьан бивтру. РайотделданучIан гъан хьун шайсса иш бакъая. ЦичIав информация бакъая. Мичча кIурабавну, азарханалул чулийнмай бавчуру. Ххуллий кIира кьюкьа боевиктурал дия, зувияксса инсан. Азарханалул хIаятгу миннала дурцIуну дия. Боевиктал Хасавюртуллал чулухунмайгу битавуртту дуллай бия, жу шалклуву кунма буру. АзарханалучIату бачайхту, бацIан бувара тIий, амру бунни боевиктурал. Ттун бувчIунни, утти, нукIу кунма, жува жула ххуллийх гьан къабитаншиву. Щак багьунни, нава цу уссарив кIулхьухьунссар вайннан куну. Миннал куннал куннащалсса дахIаву ххуйсса дия, — буслай ур ЖахIпар.
КIивагу чулуха бас хьуну, боевиктурал вай бусса машина вив ласун кьаст лархIуну дур. Тагьар дурчIайхту, ЖахIпардул МахIаммадахь увкуну бур: «Ба­цIангу мабав, лихъангу мабав, му инава нанисса куццуй вила ххуллийх ачу», — куну.

Вайннал бацIан къабуллан бивкIукун, боевиктал битлан бивкIун бур. Машиналул салондалувух ккулларду лехлан бивкIун бур. Шалклува личайхту, МахIаммадал газ буллуну, кIийннайсса заправкалул махъун увххун авцIуну ур. Боевиктурал цивппа мукун бигьану итакъабакьиншиву бувчIусса ЖахIпардул МахIаммада машина лещан бан къаивтун ур. Вайннайн тIайлану, ххуллул лулттучулий бивкIун бур колхозрал ТОК-рал дарваза. Шлагбаумрал машиналул магъи ласун данссар, дарчагу, бу­сса гужирай гивун бувххун гьанну, гичча багъирдавух ли­хъан,- тIисса пикри хьуну бур вайннан. Му ппурттуву дарвазалучIа бав­цIуну бивкIун бур 3-4 шяраватусса арамтал — Шавлукьлул ниттиуссу Миха (МахIаммад Юсупов) ва мунал арсгу, Сяъдуллагь тIисса шиччавасса угьарасса чачангу. Гихунмай хьумур ЖахIпардун миннал бусласимунийну кIулну бур. Заправкалуха бувккун нанисса машина хъирив лавсса боевиктурал биту-ххиту бувну бур. БакIрайн ккулла щусса ЖахIпар рульданух­сса МахIаммадал каруннайх ивщухьунссия, машина дарвазалул чIаравсса ттурцIайн щуну бавцIуну бур. Щавурду дирсса ЖахIпаргу, МахIаммадагу боевиктурал кьатIув бивчуну, ттупанграл къуннагъру ришлай башттан бувну бур. Бусса гужирай боевиктурал лажиндаравух рирщусса къуннагърал ЖахI­пар­дул ккарччив кьатI дурну дур. Яла ттупанграл вяра кьацIливун ливкIуну битан нанисса боевик Сяъдуллагьлул ацIан увну ур.

Мунал чачан мазрай увкуну бур: «Ми укунмагу сагъну бакъар, му давугу ссан аьркинну дуллай буру, битияра цивппа»,-куну. Му чIумал тинай авцIуну ивкIун ур, цала лахъисса чIирттарал мицIгу кIиссурттах ккюрнутIай буллай, вайннал хъунама — аьраб. Сяъдуллагьлул тIутIимур цахьва таржума бувкун, ганал, кьабитияра тIий, ка галай дурну дур. ХIасил, ми мяйжаннугу ливтIусса ххай кьабивтун бур. Ва азарханалийн иян уван аьркинни тIий, леххаву тIисса Михахь та ца боевикнал, хIатталугу ккаккан дурну, увкуну бур: «Мунан азарханалийн аьркинну бакъарча, кIиккун аьркинну бур»,- куну. Оьттувух увксса ЖахIпар Шавлукьлул ниттиуссил гайминнал кумаграцIух гай цивппа бивкIсса машиналуву ивхьуну ур. Та машинагу, цинявннал къуч бувну, азарханалул хьхьичIун биян бувну бур. ЖахIпар, ивкIуну ур тIий, азарханалувунагу уххан къаувну ур. Му ппурттуву, ласнал бакIрачIан бувкIмуниягу хавар бакъа, шярава гьаннин бугьарасса цила нину-ппугу буцин, миннал хъирив гава азарханалул чулийнмай лавгсса Шавлукьгу боевиктурайн тIайла бавцIуну бур.

— Жул машина бацIан бувну цIухла бихьлан бивкIунни. Боевиктуран кIулну бия га органнал зузалал машина бушиву. Машиналуву цIухла бихьлахьисса боевикнал ттухьва зул судья ивкIуссар увкукун, на мунихгу къулагъас къадав, мугу ттула ласная тIутIишиву ттул бакIравун бухлай бакъар. ХьхьичIра ласнал машиналуву рация диркIун дур. Му ттунмавагу къакIулссия, гайннан кIулну бия.

Рация чув дур, шиву рация дикIан аьркинссар тIий, жугу кьатIув буккан бувну, цимурца ппив дурна. Багажник тIивтIусса чIумал, ттун ми та дирхьуссияврагу къакIула, 9 шинавусса душнил Дагмарал цила янналул буцIин бувну лявкъунни багажник. Боевиктурал цIухла бихьлахьийни, щяв багьуна душнил шуба, ганил каххурттава кьатIув дагьуна душнил лултту янна. Му чIумал на ссавурданува бувккунав, ттявх учин бувну багажник лакьав.
— Битияра жу жула ххуллийх гьан, зун ци аьркинну дур — учав. — Жун ислам аьркинну дур, чуври зул ислам? — увкунни гайннал. Ттун най бунува бакIравун къабувххун, на бура, цукунчIавсса Ислам къакIулли, жучIа Ислам акъар тIий. — Дакъашиву чIалай бур, зун чапуртуращал ххуйну бунуккар, — увкунни ганал. Яла бувчIуну, нагу кьянкьану жаваб дулав: «Исламгу дуссар, Аллагьгу кIулссар, ва машиналуву щябивкIсса бугьарасса ттул нитти-буттал цавагу чакгу лях гьан къабитайссар», — куну. Аваралийсса жух ххуллул тия чулий авцIуну уруглай ия ца кагу гьухъул вив лиркIусса чIирттара­щалсса боевик. Яла махъ ттухь бувсуна га Хаттаб ивкIшиву. Ганал барткарив, кIисририв ба­къасса бур, мунияту ца ка мудан гукун гьухъул вив дургьуну икIайсса ур, куну. Яла ттула ниттиуссугу, гъан хьуну, тIун ивкIунни: «Зу арамтал бакъарув, зун ми инсантурая ци аьркинну дур, зу миннахь ци дулара тIий буру».

Боевиктуравасса цаннал чачан мазрай гаманахь увкунни: «Жухьва агьали азурда мабулларду увкуннихха, гьан бити цала ххуллийх», — куну.
Утти хъяхъаву лачIлан ди­кIай дакIнин багьувкун, дуниял ялун дагьну, боевиктурал ххуллу къабуллай, цибанссарив къакIулсса ттучIангу гъан хьуну, чIумуй шярава дуккан къархьусса чIаххувщар Аьйшат дур кьювчуну най: «Нагу му зула машиналуву щябити, лажинни, на макьабитара», — тIий. Бачу, щябикIу куну, гагу щябитав. Ахиргу, мадара инжитгу бувну, жу итабавкьуру. Дахьва сукку хьусса, ни­ттиуссил бувсунни: «Ина чунмайра, ЖахIпар ивкIуну урхха», — куну.
Му хавар бавукунгу на, циваннив, гьуя-гьарай тIий, аьтIий бакъара. Аллагьу Тааьланал ттухьхьун ца аьжаивсса ссавургу, кьянкьашивугу дуллуну дия таний. ОьрчIахьгу зула ххуллийх насияра куну, машиналува бувкра. ОьрчIру, на кьабивтун гьан къаччай, сукку къахъанан бивкIунни.

— Зун на ттаттал хъирив бувккун ччай бухьурча, ва цIана ши­чча насияра, акъахьурча на, бу­ттагу кьаивтун, бучIанна, учав.
ОьрчIру ва нину-ппугу тIайла бувккун, Шавлукь ЖахIпардул хъирив бувккун бур. Дахьва гуж-къиялий цалва ххяппурттаща итххявхсса Шавлукь махъунмай най ххал хьувкун, ва щарсса дуллай ци дур тIисса кунма буруглай бивкIун бур боевиктал. ЖахIпар ишинсса машиналух луглай лечлачисса Шавлукьлухь азарханалул зузалт бивкIун бур, мунал иш къурталлича, муналсса къабуллай, вила бакI ххассал бува тIий. Амма, увтун адаминагу кьаивтун, цила бакI ххассал буллан ванил яхIирал кьамул къабувну бур.
— Мунан утти ина кумаг къабара, му къуртал хьуну ур, — тIисса боевиктурахьгу ванил увкуну бур: «Къуртал хьуну ухьурча, ттун ва аьдатрай уччин аьркин­ссар»,- куну. Мукун аварасса Шавлукьлуйн бакIрайн агьну ур азарханалий зузисса цала кулпатрал хъирив нанисса Ккулатусса МахIаммада. КIинналагу ЖахIпаргу машиналуву ивхьуну, бавчуну бур Хасаврайн.

— Ца ппурттуву, — буслай бур Шавлукь, — ЖахIпардул ттул канивусса ка сукку дурна. — МахIаммадай, ва сагъну ур учав. Ттул ххаришиву кIидачIлай, МахIаммадалгу, ттул дакI дан, хъярч бунни:
— Яр, ми органналминнан мишанну дуллан кIулссар, — куну.
Хасаврай духтуртал щавурду дирми кьамул буллай булувкьуну бия тIар. ГацIана дурур­ххуну дур ЖахIпардул щаву. Яла кIул хьуну бур Шавлукьлун, цивппа азарханалучIату лагайхту, ЖахIпар цу ивкIссарив кIул хьуну, боевиктал мунал хъирив бувкIун бивкIшиву.
Та азарханалийсса хьхьугу Шавлукьлун хъинну захIматсса хьуну дур. Щаллусса хьхьуну бувцуну букIлай бия тIар захIматсса щавурду дирсса оьруснал саллатI. Миннай язугъ хъанай аьсив буклай бивкIра, тIий бур Шавлукь. Хъирив кьини вай бувцуну бур МахIач­­къалалив. Барз ххишалагу бувну бур азарханалий. Вай бакъа­ссаксса хIаллай хъямала дурну дур вайннал къатри. Битлати­сса ттупал къатрал ца ххярагьала ппив дурну дур.

— Къатри ччуччаву, хъус дацаву цичIар дакъар. Дяъви хьу­ссар оьрчIру ливтIунан, — тIий бур Шавлукь.
Азарханалия зана хьу­сса ЖахIпардухь 4 шинаву­сса арс ивкIун ур: «Буттай, ина ивкIусса чIумал нагу, Дагмарагу оьну аьтIий буссияв. Тти жува тачIав личIи къахьунну»,- тIий. ЖахIпар азарханалия увксса чIумалгума, вайннаннийн ЖахIпардух жижара бан букIлакIисса бивкIун бур.

Андриана Аьбдуллаева