Октябрьданул 1-нний «Дагъусттан» РИА-лий хьунни халкьуннал художествалул сянатирттал щалагу Аьрасатнал лагрулийсса «Творчествалул лахъшивуртту» («Вершины творчества») тIисса фестивальданул хьунийнсса пресс-конференция. Фестиваль хьунтIиссар октябрьданул 3-6-нний МахIачкъалалив Оьрус учительницан дацIан дурсса гьайкалданучIа.

Фестивальданийнсса хIадур­шиннарая, ванил гьурттучитурая, фестивальданул лагрулий хьунтIимуния бусан бувкIун бия Дагъусттан Республикалул Туризмалул ва халкьуннал художествалул сянатирттал министерствалул управлениялул начальник Рустам Арабханов, фестивальданул СМИ-лущалсса даврил куратор Жамилат Ибрагьимова, Дагъусттан Республикалул «Центр поддержки гражданских инициатив» АНО-рал социал проектирдал куратор Самир Капуров ва «Дагъусттаннал халкьуннал художествалул сянатру» тIисса жяматийсса организациялул председатель АьлихIажи Хурдаев.

Фестиваль дуллалиссар ларай кIицI ларгсса организациялул, Дагъусттан Республикалул БакIчинал коммерциялул да­къасса организациярттал граждан сиптардал чIарав бацIаврил Грантрайн бувну.

Фестиваль тIитIлатIисса шадлугърайсса батIаву хьунни октябрьданул 3-нний МахIач­къала шагьрулул тарихрал музейрачIа. Шикку бивщуну бия 40 чятир, ккаккиялун дирхьуну дия халкьуннал усттартурал каруннил дурсса эмаратру, миллатирттал дукрарду. Ва кьини хьунни халкьуннал къавтIавурттал ва балайрдал коллективругу гьурттусса концерт.
Фестивальданул лагрулий гихуннай хьунтIиссар элмисса ва практикалул конференция, личIи-личIисса выставкарду, мастер-классру, творчествалул конкурсру ва цаймигу шадлугъру.

Фестивальданул гьурттучитуран куну сакин бувантIиссар республикалул музейрдавун­сса экскурсиярду, Бархъаллал ва Оьргърал шяраваллавунсса аьр­ххирду.
Фестивальданий Узбакисттаннавасса усттартурал, Аьрасатнал личIи-личIисса субъектирдаясса 60-нния ливчусса сянаткартурал ккаккан дувантIиссар цалла карунних дурсса затру, цалва бюхъу-гьунар. Мукунма Да­гъусттаннаяминналгу. Укунсса фестиваллал личIи-личIисса сянаткартурал цала даврил опыт кIибачIинсса каширду ххи дуллалиссар, уртакьшиврийсса зузавриву мюнпат хьунсса цIу-цIусса арарду щаллу хъана­хъиссар.
Фестиваль дайлитIунтIиссар октябрьданул 6-нний дакIний личIансса шадлугъирттайну ва концертрайну.

Бадрижамал Аьлиева