Ва нюжмардий МахIачкъалалив дайдирхьунни «Русская сцена» тIисса VIII-мур дунияллул халкьуннал дянивсса оьруснал театрдал фестиваль.
Ва лахъи лагантIиссар октябрьданул 9-ннийн дияннин.
Ваний гьуртту хъанай бур Аьрасатнавасса, Азирбижаннавасса ва Къазахъисттаннаясса театрал коллективру.
Фестиваль тIитIлатIисса шадлугъ хьунни октябрьданул 1-нний М. Горькийл цIанийсса Оьруснал драмалул театрданул Хъунмур залданул сахIналий.
Республикалул бакIчи Сергей Меликовлул цIания хъамал ва театрал магьирлугърал оьрмулуву агьамсса иширан ва ца хъуннасса байрандалун ккаллисса иширащал барча бунни Дагъусттаннал культуралул министр Зарема Буттаевал. Ванил кIицI лавгунни, республикалун аьдатсса фестиваль гьашину хъанай душиву Дагъусттаннал театрал магьирлугърал ттугъ лавсун нанисса Оьруснал театр хIасул хьуния шиннай 100 шинал юбилейран хасну.
«Гьамин, Оьруснал театрданул барачатсса коллективраву чIярусса шиннардил хьхьичI хIасул хьуссар ва ххаллилсса проект, цувгу тания шинмай республикалул магьирлугърал оьрмулуву ца яргсса иширан ккаллину бацIан бан лайкьсса.
Цала ттуршукулул юбилейрал хьунийн Оьруснал театр мяйлчин хьунабакьлай бур «Русская сцена» фестивальданул хъамал.
Фестивальданул программа ккалли дан бучIир Аьрасатнал цIанихсса театрал коллективирттал яргсса кацIлин. Мунил лагрулий дагъусттаннал тамашачитураща бюхъантIиссар ххал бан ххаллилсса спектакльлу театрал магьирлугърал ишккаккултран тIурча хьунтIиссар дакIний личIансса хьунабакьавуртту», – увкунни министрнал.
Ванил мукунма кIицI лавгунни фестиваль сававну гьарза-гьарта хьунтIишиву магьирлугърал дазурду, цIакь хьунтIишиву миллатирттал дянивсса арарду, Оьруснал театрдануща тIурча бюхъан тIий бушиву аьрасатнал магьирлугърал дунияллий циятува баян бан.
Фестиваль тIиртIунни Ермоловал цIанийсса Москавуллал драмалул театрданул «Приглашение на казнь» тIисса спектакльданийну.
Фестивальданул программалуву мукунма бур Баку, Караганда, Иркутск, Пермь, Саратов, Назрань ва Черкесск шагьрурдаясса театрдал постановкарду.
Му бакъассагу, театр ххираминнан сакин дурну дур Аьрасатнал халкьуннал артист Евгений Князевлущалсса ва Дагъусттаннал лайкь хьусса артист Михаил Морозовлущалсса хьунабакьавуртту.
Фестивальданул ца яла агьамсса ишну хьун тIий бур Р. ХIамзатовлул «Остров женщин» тIисса пьесалиясса Оьруснал театрданул спектакльданул премьера.
Гьашину М. Горькийл цIанийсса Оьруснал драмалул театрданул кIицI лаглагисса юбилей, Дагъусттан Республикалул бакIчи Сергей Меликовлул Указрайн бувну, лайкьсса даражалий кIицI лагантIиссар.
Шиккува дакIнин бутан, «Русская сцена» тIисса дунияллул халкьуннал оьруснал театрдал фестиваль Дагъусттаннай дансса сиптачину увкссар Оьруснал театрданул хъунама режиссер, Аьрасатнал магьирлугърал лайкь хьусса ишккакку Скандарбек Тулпаров ва цалчинсса фестиваль хьуссар 2007 шинал. Тания мукьах кIира шинай цал МахIачкъала кIурабаяйссар театрал магьирлугърал Маккалийн.
Зулайхат Тахакьаева
