Октябрьданул 1-нний Гъумук хьунни МухIаммад Идавс (с.аь.в.) дунияллийн увксса мубараксса Раби-уль-авваль зурун хасъсса, Украиннал аьрщарай ватандалул ххуллий чувшиврий жанну дуллусса аьралитурал ниттихъан цIа кусса мавлуд.
Ва иширал сиптачитал ва сакиншинначитал хьунни Лакрал райондалул бакIчи Юсуп МахIаммадов, ДР-лул Халкьуннал Мажлисрал депутат Марат Илиясов ва М. Илиясовал цIанийсса «Дараччи» фондрал хъунмур Гульшан Хасаева.
Шиккува кIицI бан, Юсуп МахIаммадов ччянияцIава пикрилий уссия Лакку билаятрая бувксса, паччахIлугърал мурадру буруччаврил ххуллий чувшиврий жанну дуллусса чиваркIуннал ниттихъащалсса хьунабакьаву дан, амма му чув, цукун дарча хъинавав, тIий. МадикIарача МухIаммад Идавс (с.аь.в.) дунияллийн увксса мубараксса Раби-уль-авваль зуруй, аьпабиву Надир Хачилаевлул мукъурттийну учин, аьрщи-ххюлдануяр вирттал чIявусса лакку аьрщарай, Дагъусттаннай ислам ппив шаврил дякюруну хьусса, исламрал элму ппив даврил цIанихми аьлимтурал ватанну хьусса Гъази-Гъумук мажлисрайн батIаврияр хъинссагу, ххуйссагу савав цамур.
Ниттихъащал ва мажлисрайн бувкIун бия «Дараччи» фондрал вакилталгу. МахIачкъалалия Гъумукун къулайсса транспорт щаллу дурну дия лакрал радиолул редактор Тамара Закарьяевал.
Цалчинсса ликкаву дуруна миллатрал виричу Хан-Муртазааьлил гьайкалданучIа. Кьини дия гъилисса, ссав дия пар-пар тIий някIну. Дагъусттаннал агьулданул чувшиврул лишанну хьусса гьайкалданучIа дуаь дуллалисса ниттихъал ялтту лехлай бия барзулт – ватандалул ххуллий чувшиврий жанну дуллусса вайннал арсваврал рухIру ва кьини барзултраву дирхьусса кунмасса асар бия. Лакку билаятрай бизайсса наслу Хан-Муртазааьлил дакI ва чувшиву дусса бизаннав, духкъалаганнав лакрал чиваркIуннаву чувшиву, амма къадукканнав Лакку билаятрайн чувшиву ккаккан дуллансса кьини, хIакьину паччахIлугърал мурадру буруччаврил ххуллий хасъсса аьралий операциялий талатисса лакрал ва Дагъусттаннал чиваркI сагъну-саламатну цала ужагъирттайн зана бикIаннав тIий дуаьрттай, Хан-Муртазааьлил гьайкалданучIату хъамал лавгуна ПартIу ПатIимал гьайкалданучIан – ца ттигу чувшиврул лишан.
Мичча хъамал лавгуна Дагъусттаннай ца яла хьхьичIавамунин ккаллисса Гъумучиял Хъун-мизитравун. Шикку Лакрал райондалул имамтурал бувсуна мизитралгу, аьмну лакку билаятрай ислам ппив шаврилгу тарихрая. Мизитраву ахттайн чакгу бувну, хъамал лавгуна Сурхай-ханнал мизитравун, Гъази-Кьаландардул Зияратрайн.
Муния махъ Лакку билаятрай ца яла цIанихмунин ккаллисса Шакиратлул кафелуву ниттихъан тIивтIуну бия авадансса ссупра.
Юсуп МахIаммадовлул ниттихъахь, аьла-ссаламгу бувну, барчаллагь увкуна виртталсса арсру тарбия баврихлу.
Муния махъ райондалул Магьирлугърал къатраву хьунни МухIаммад Идавс (с.аь.в.) дунияллийн увксса зурул савлугърансса мажлис.
Микку ихтилатру бувна Лакрал райондалул администрациялул бакIчинал хъиривчу Явсупи ХIамзаевлул, Дагъусттаннал муфтиятрал вакил АьлиасхIаб Разакьовлул, Лакрал райондалул имам ХIабиб Батталовлул, «Память гор» организациялул Лакрал райондалийсса отделениялул хъунама Юнус Эфендиевлул, СВО-лул цалчинсса Виричу НурмахIаммад ХIажимахIаммадовлул ниттил Сапижат Мазаевал.
Ахирданий «Дараччи» фондрал хъунмур Гулшан Хасаевал бюххансса ихтилатрай барчаллагь увкуна вирттаврал ниттихъахь:
«ХIакьину на икрамрай бура зуйн гьарцаннуйн, Вирттал тарбия бувсса хIакьсса ниттихъайн! ХIайранну бура зул ссавурданий, аькьилшиврий, чумартшиврий, кьадарданул зунна дуллусса дард ва хIасрат лайкьну духIлахIисса зул дакIнил кьуватрай. Зул гъюжу дурксса дакIру дазинсса махъру ляхълай лякъин къахьунссар, амма жун ччай бия, зул дакIру чансса духьурчагу тирх учинхьуви тIисса ниятрай, ва мубараксса зуруй зула аьзизсса лакку аьрщарай зу цачIун батIин, зущал жап учин».
Гьарца ниттихь бакIра-бакIрах барчаллагьгу куну, руртуна ниттихъайн чалагъай лачакру, арсваврах дягъулун лархсса лухIи лачакру ликкаву мурадрай.
Ликканшиву къакIулли арсваврах лархсса лухIи лачакру, амма чалагъайрттуми ядантIиссар вайннул кIа, мяйжаннугу, цахъис духьурчагу, дакIру тирх учин дурсса, кьинилиясса хъамакъабитулул, мажлис сакин бувминнал дакIнихтунусса аякьалул ва къулагъасрал лишан хIисаврай.
Инсан фондрал чулухагу дия бахшишру кIа мажлисрай гьуртту хьусса гьарцаннан.
Мажлис къуртал бувна хасъсса аьралий операциялий ватандалул ххуллий чувшиврий жанну дуллуминнал рухIирдаяту алхIам буккаврийну ва хIакьину ватандалул мурадру буруччаврил ххуллий талатими сагъ-саламатну цала ужагъирттайн зана хьуннав тIисса лабизаврийну.
Ниттихъул дакIнихтуну барчаллагьрай бия ва мубараксса зуруй цивппа Лакку билаятрай цачIун батIин савав хьуминнайн.
Зулайхат Тахакьаева
