Дагъусттаннал ХIукуматрал председатель Аьбдулмуслим Аьбдулмуслимовлул Буйнакск шагьрулий дунни шагьругу, районгу щинал дузал баврил масъала чулийн буккан баврил хIакъиравусса батIаву.

Премьер-министрнайн ва масъала ххал бигьин тапшур бунни Республикалул бакIчи Сергей Меликовлул. Масъала ххал бигьаврий гьуртту хьунни шагьрулул ва райондалул каялувчитал, ДР-лул БакIчинал виваллил политикалул ва кIанттул цилакаялувшиврул управлениялул, Республикалул БакIчинал Контрольданул управлениялул, Республикалул Строительствалул министерствалул каялувчитал, «Дагводоканал» ГУП-лул вакилтал ва цаймигу.
Аьбдулмуслим Аьбдулмуслимовлул бавтIминная тIалав бунни Буйнакск шагьру ва райондалийсса шяраваллурду щинал дузалшиндарал тагьарданун тIайласса кьимат бищун ва мукунма тагьар тIайла дацIан даншиврул бан-битан аьркинмур бусан.
ЦIанасса тагьар укунсса дур: сентябрьданул 23-нний «Чиркей насосная» станциялий зия хьуну дур электродвигатель. Дуллай бур оборудованиялул ремонт, мукунма дузал буллай бур цIусса насос ласаврил масъала.

ХIадур бувссар ХI.Аьдиловлул