Капремонтрал программалул лагрулий МахIачкъалалив Ю. Акаевлул цIанийсса кучалий дирхьусса чIявуквартирарду бусса къатрал (№9) лажинчул ва электросеть цIу дуккан дунни.

Давуртту кьамул дуллали­сса мажлисрай гьуртту хьунни Дагъусттаннал строительствалул министрнал хъиривчу Салам ХIасайниев, Дагъусттаннал Капремонтрал фондрал хъунама МахIаммад Аьлиев, МахIачкъалаллал администрациялул бакIчинал хъиривчу Хаким Ашиков.
Утти къатрал лажинчул яба­цIа­нну бур. Токрал система даххана даврийну тIурча, къатраву ялапар хъанахъиминнан бигьа-рахIатшиву хьуссар.
ООО «Строитель» подрядный организациялул зузалтрал цIу дуккан дунни токрал ххаллу ва подъездирттавусса щитру.
– Вай къатран 50-нния лирчусса шинну хьуну дур, ттигу цикссагу шиннардий яхьунссар. Къатраву ялапар хъанахъиминнал чIумуй дуллай бур капремонтрахсса взносру. Взносру дулаву вайнначIа аьмну щала республикалийнияр 70% ххишалану дур, – увкунни МахIаммад Аьлиевлул.
Ванал бувсунни 2018-ку шинал вай къатраву, капремонт дурну, магъи цIу дуккан дуршиву, ряхра шин ларгун дунугу, магъул тагьар ххуйну душиву, цалагу кIукI дурксса иш къавхьушиву.
Ва кьинисса мажлисрай подрядный организациялул вакилтуран ва цаппара квартирардал заллухъруннан буллунни Капремонтрал фондрал чулухасса Барчаллагьрал чагъарду ва грамотарду.
Квартирардал заллухърунналгу буллунни Барчаллагьрал чагъар МахIаммад Аьлиевлун къатри дакьин дан хIарачат бувну тIий.

Андриана Аьбдуллаева