Ябара буттал улча

Бюхттул зунттаву къалай,
Жул Буршиял ххаллил щар,
Жул барачатрал кIиний,
Тирххандарал гьайчалий.

Буршиял ххаллил арсрув,
Ас бусса зунттал оьрчIрув,
Мадитару, лажинни,
Жулла щар оьну личIан!

Нани, кIарчI къаданнуча,
Нани, захIмат баннуча,
Ххаллил Буршиял цIагу
Цал ттигу гьаз даннуча.

Жул зунттай мусил кюруй,
Гьунар ххи аврдал минай,
Ина хъамакъадитан,
Илагьий, жулгу тавбар.

Зунтту-арду чIярусса,
Уртту-тIутIив дюрхъусса,
Хъамал хъинну ххирасса
Буршиял ххаллил жямат!

Щарнил хьхьичIух дирхьусса
Майдансса тIутIал арив
Гъинтнил шанмагу зуруй
Чятирду чан къашайссар.

Вил вирттал гьарза баннав
Аллагьнайн иман ххисса,
Вий барачат бишиннав
Та хIажлил къатлуйуксса.

Амсар, хъунма барчаллагь,
Хъин-хъинсса вил давурттан.
Гъумучиял ххуйшиву
Ххишала дуллалисса.

Юсуп, вин оьрму була,
Оьмуния уруччу,
Ина хIарачат бунни
Жул шяравун ххуллу бан.

Му къуллугърай ттинингу
Цимиягу уссия,
Лакку улклул цIуцIанпир
Так ца ина гьаз бунни.

Ялунмайгу, ялагу
Яллагь, чан къабуваннав
Ва жула Лакку кIану
Утта буккан буванми.

УрчIцIалла шинавусса
Ххадижат ХIамзатова,
ш. Бурши

На ссалам булунна

На ссалам булунна
Нава ччинахьхьун,
ТIиртIусса ттула ка
Дугьан кIулнахьхьун.

Пахрулий ччатI канай
Аьдат къавхьура,
ХIалалмунил тIингу
Ччянива кIулли.

Бичлайгу ура на
Дуллу аьрщарай
КIа Заннал буллусса
Бувккусса гьантри.

Лахъишиву хьхьуттал
ХIисав къадурну,
Кьадарданул къарду
Мукьавгу лахъав.

ХъачIунттайсса цIуртти
ПартIий бунугу,
БакI ссукIа дургьуну,
Шару къаласав.

Хъазамрай медальлу
Гьарза хьунугу,
Хъуру аьгъу буллай,
Лякьа хъун къадав.

ЧIивиний лавхьхьуну,
Инсантал кIулну,
ХIалалсса ччатI канай
Оьрмугу бутав.

Ччаву дував душних
Бусала хьунну.
Бювхъуссаксса щащав
Оьрмулул кюру.

Шеъри – му багъри

Шеъри – дакIнил багъри,
ТIутIайх бичайсса,
Инттухуннай циняр
Ялун личайсса.

Шеъри – му байрахъри,
Лахъну бищайсса,
Ватандалул цIагу
Лахъну гьаз дайсса.

Шеъри – му даруври,
Гьарнан булайсса,
Къумасса дакIурдин
Чаран лякъайсса.

Шеъри – му ккуллагур,
Душман утайсса,
Иш багьний, вирттаврал
Ишла бувайсса.

Шеъри – му балайри,
Мажлис ххуй байсса,
Мурадрайн къабивми
Биян бувайсса.

Ташулул ххуллу

На вил арснал хъатIуй
КъавтIун изанна,
Хъамал тяхъа буван
Къиссу дуванна.

Яла, ссапа буллай,
Гьухъа итанна,
Бахшишран бувцIусса
Кьуру хIачIанна.

Тямаданал чIарав
ЦIакьну авцIуну,
Булурчан ттухьхьунма,
Махъгу лахъанна.

Учинна, бияннав
Ина мурадрайн,
ТалихIрал бувччуну,
БакIуйн букканнав.

Инишиял Залимхан

На бучIанна вичIан

На бучIанна вичIан
Ссутнил гъаравух,
КIинтнил дякъивухгу,
Интнил тIутIайхгу.
На бучIанна вичIан
ЧIун дакъа чIумал,
Ттул ххирасса буттал
Леркь шяравалуй.

ЗахIматсса бунугу
Ттуща ша ласун,
ХIаллицIух бачинна
КIюла ххуллурдайх.
БучIанна на вичIан,
Вийн икрам буван,
Ттул ххирасса буттал
Леркь шяравалуй.

Хьурдай ттухьра каши,
ЦIу лаган дуван…
Магъив дакъа къатри,
БачIвасса чIиртту.
Ччива вичIан батIин
Щарнил агьлугу,
Ттул ххирасса буттал
Леркьсса шяравун.

Бювхъусса вил къурду,
ТIутIал ларс сунну,
Ччива зана буван
Циняв вил агьлу,
Тамашагу буван
Вил тIабиаьтрай,
Ттул ххирасса буттал
Леркь шяравалуй.

Хъамариртун дур тти
Щарнил хIатталу,
Акъар зияратрайн
УчIайсса цучIав…
Ттурлу даркьу хханссар
Лагма-ялттугу,
Ттул ххирасса буттал
Леркь шяравухгу.

ХIабибат Магьдиева,
ш. Тiюхчар

Мудан бюхълай личIаннав
Шалласуха

Жул лакрал лайкьсса илчий,
«Илчилулгу» цIакьсса дус.
Бивзний шагу бакьайсса,
Шалласухъал Шалласуй.

Тухумрал бусравсса арс,
Ххаллил наслулул ттаттай,
Мажлисирттал тямада,
Дустурал чумартсса дус.

Ттул уссилгу ххуйсса дус,
Аькьилсса насихIатчий,
Гьарнал чIарав ацIайсса,
ЧIяйннал пахруй, Шалласуй.

Я Аллагь, ина вила
ДакIнин ччикун итаннав,
Заннал буллу оьрмулий
Мудан бюхълай личIаннав!
Заза, ш. Бархъал

Ццахлил ясир
къаайма

Башир ХIажиевлун

Ина ухьунссара яхIлув ниттил оьрчI,
Ччаннай бацIан бувсса ххюва
лякьлул оьрчI.
Вил чувнал дакIниву –
­асландалул къюкI,
ТакIуй къабуххайсса ццахлил
кьанкьсса хIучI.
НахIу-кьуцIу дуллай, хьхьара къадуллай,
Хъурссул дукра, нагь, нис
хьхьичI нани дуллай,
ХIакьсса зунттал чувнал тарбия дуллай,
Сасан увсса ура ниттил захIматрай.

Вил буттагу цIакьсса лачIунуккуя,
Лагма щархъайх кIулсса чарил усттаръя,
Яручу унугу, га вихьличуя,
ЧIявуми вихьуллан къатри дурмая.

Ина вила хушрай талан лавгунав,
Дяъвилул цIу гужнийн бакIрайн агьунав.
АцIлийну чIявусса душмантурал вив
Вила дустуращал талай ливчIунав.

Сагъну бакъахьунссар тIий бия циняв,
Шаппай ливтIушиву баян буван ччай.
Кару личин дурсса дуснащал хъарай
Ина зана хьунав частьравун хьхьувай.

Бунугу базурду махру ядуллай,
Ура ина ттигу дяъвилийн гьан ччай.
Буссаксса чурххаву оьттул кIунтI щарай,
ХIакьсса дустуращал улукьин талай.

Ися Аьбдуллаев,
ш. Вихьул

* * *

Кьуния ххюра шин ккуркки ларгунни
Къачагъттал ххявххуну жула аьрщарайн.
Цуксса хIал хьурчагу, ццах бувтусса чIун
ДакIния къадуккай лакрал миллатран.

КIюрххил гъили шаний шанай бунува,
Биту-ххитул чIукIрал чантI чин бувуна.
Къашавайми чавай, мюрщулт учавай,
Минарду кьадиртун, бачин бувуна.

Оьрмулухун датIлай, цачIу дирхьусса
Кьай-кьуйрду лирчIуна ду-дуний циняв.
Маз къакIул гъаттара, ятту-аьнакIив
Язугъну ливчIуна хъирив буруглай.

Дяъвилий буттахъул ливтIун ливчIусса
Мюрщи оьрчIру утти хъунив хьуну бур.
Хъамадитан къашай та захIматсса чIун,
ЦIуссалакрал аьрщи цIу ларчIун
найсса.
Къабаяннав жунма дяъвилул чIурду,
Къаккакканнав жунна душманнал
лажин.
Ккакканнав гьарцаннан дарусса
ссавний
Пар-партIисса цIуртти чанна лавхъусса.

Нуцалай Султанова

Дагъусттан
ххассал бан

Жагьилсса оьрмурдай
Зу хIайп къакуна,
Дагъусттан ххассал бан
Данди бавцIуну.

Жиндралсса аьтарттул
ХьхьичI бару бувну,
ЧIявусса оьрмурду
Зу ххассал бувссар.

Ца лахIзалийвагу
Зу хIучI къакунав,
Махъаллил къавхьунав,
Ццах къаувкунав.

Хьхьу-чани хьун талай,
ЦIу кIиен дурну,
Ццахханну руртуна
Зу душманнавун.

ХьхьичI дарцIухьунссия
Зулла оьрчIшиву,
Зува хъуни бувсса
Нинухъру, ппухълу.

Шайссияв цукунчIав
Махъаллил хьунгу,
Уххан-итан къушлийн
Оькъавку душман.

Зу дурсса чувшиву
Абадлий ядан
Буру жу махъ буллай,
Заннайн икрамрай!

Арсен Аьбдуллаев,
ш. ЧIяйми