Уттигъанну ЦIуссалакрал райондалий лахъа-хъунну кIицI ларгунни жула аьрщарайн ххявхсса дунияллул террористътал ххит бувну 25 шин хьусса кьини. Жунма цинявннан кIулссар тай дяъвилул иширттаву хъуннасса хъар лархъшиву Муслим Даххаев бакIчисса райондалул виваллил отделданул зузалтрал. 33 зузалал къучагъшиврий жанну дуллуссар. Вай гьантрайсса жул редакциялул бусравсса хъамаличувгу бусалдаравун агьсса Дагъусттаннал халкьуннал виричув, генерал Муслим Даххаев ия.
Муслим МахIаммадович Даххаев увну ур 1962-ку шинал апрель зурул 10-нний.
1995-ку шинал къуртал бувну бур Аьрасатнал МВД-лул Ставрополлал юридий институт. 1983-ку шиная айивхьуну зий ивкIун ур виваллил иширттал органнаву, 1998-2004 шиннардий — ЦIуссалакрал РОВД-лул хъунаману.
2011-2017 шиннардий ивкIун ур Дагъусттаннал ФСИН-далул управлениялул хъунаману. 2018-2020 шиннардий – Ростовуллал областьрал ФСИН-далул агьаммур управлениялул хъунаману.
2012-ку шинал дуллуну дур виваллил къуллугърал генерал-майорнал чин. Лайкь хьуну ур личIи-личIисса паччахIлугърал наградарттан. 1999-ку шиналсса дяъвилул иширттаву ккаккан дурсса къучагъшиврухлу дуллуну дур Чувшиврул орден.
– Муслим МахIаммадович, цими шин гьарчагу, тай ишру вин хъамакъабитанссар. Ци учин ччива хIакьину, тай чIунну дакIнин дичлай?
– ХьхьичIра-хьхьичI кIицI лагавияв Дагъусттаннал халкьуннал чувшиву ва дугъришиву. Тай аьратталсса гьантрай Дагъусттаннал жямат ца хьуну, Аьрасатнал президент В.Путиннул ва Дагъусттаннал Госсоветрал председатель М. МахIаммадовлул каялувшиннаралу жува бурувччуссар Дагъусттан, къабивтссар кIибищун бан Аьрасат. Та цIуссалакрал агьулданийх кьини дурксса чIумал, жула чIарав бавцIуна цинявппагу миллатирттал агьлу, жула халкьуннал ккаккан дурна цашиву, цал ттигу чIалачIи бувна иш багьний чIарав бацIан хIадуршиву. Аьрасатнал виваллил аьрал, райондалул виваллил иширттал отделданул зузалт, Липецкаллал ОМОН, ополчентал – цинявппагу ца хьуну душманнайн данди бавцIуна. Муниятур жущава душмангу ххит увну, Конституциялул низам дишин бювхъусса.
Гьай-гьай, ххувшаву жунна ххирану дарцIунни. Зувинния ливчусса ттул зузалтрал жанну дуллунни Дагъусттаннай, Ухссавнил Ккавкказнаву, щалагу Аьрасатнаву дакьаву дуруччаврил цIаний. Жунма тачIав хъамабитан къабучIиссар тайннал кулпатру, оьрчIру, гъан-маччами.
Юбилей дакъасса чIумалгу, гьарица шинах ияйссара на гихун гай ттула зузалтрал гьайкалдануцI тIутIив дишин, гайннал нину-ппу, оьрчIру ккаккан, гъанчувнащал хьунаакьин. Гай циняв ттун ца кулпат кунмасса оьрчIруя.
Та ЦIуссалакрал райондалий хьусса мажлисрай ттунма тIааьн къабивзсса зат му хьуна, тай иширттаву жанну дуллусса ттула зузалт дакIнин къабичаву, тайннал нитти-буттахь, гъан-маччанахь барчаллагь къаучаву.
КIицI лаган бучIиссия дяъвилул цалчинсса гьантрай мугьлат бакъа лак бавтIун, лагма лаган бувну, ополчентурал кьюкьри сакин дурну, хъуннасса даву дурсса ополчентурал кьюкьрал каялувчи Амучи Амуттиновлул ва мунал хъиривчуну ивкIсса Арсен Каммаевлул цIарду. Дяъвилул цалчинсса гьантрай мийри гьарица чулуха оборона дургьуну бавцIуну бивкIсса.
Дяъвилул ишру нанисса чIумал на ттула зузалтращал тамансса инсантурал оьрмурду ххассал бан хIарачат бувссия. Буцирив ябан къавхьунни. Мунияту дакIниву пашманшиву дикIай. Дяъви бур дяъви. ЛивтIусса къавхьуну къабикIай. Гьарицагу ттул зузалал къучагънал кунна жан дулуссар душманнайн данди бавцIуну. Жула лакрал чиваркI тачIаввагу кьянкьасса, къучагъсса бивкIссар. ЦIумадиял райондалий боевиктурайн данди авцIуну жан дуллусса аьралий хIакин Берцинаевгу лаккучуври. Ттун пахру бикIай буттал буттахъая шихуннай лакрал арамтуннал дурсса чувшивурттая. Жува Сурхай-ханнул наслуру. Укунсса вирттавран лайкьну тарбия дан аьркинссар ялун нанисса никгу.
– Боевиктал ххяххан хьхьичI гьантрай цичIав щуркIалшиву къархьунав?
– Мудан баллай бия ххяххан бюхъайссар тIисса хаварду. Дазуй паракьатшиву дакъая. КIива-шанма барз хьуна гуж дурсса низамрай къуллугъ буллай. Нава лагайссияв ччя-ччяни обход дан, постру цукун зий бурив ккаккан.
Душман ххяххан хьхьичI кьини, сентябрьданул 4-нний, хьхьуниву, ца укунсса ишгу хьуна. Аьралуннал щин духхай машина бувххун бия ЦIуссалакрал пострайн. ДучIив нанисса Аьрасатнал аьралуннал колонналия аьйкьусса саллатI ия. Мугу кIиккува кьаивтун, лавгра обходрай. ЧIурттащиял шяраваллил чIарав бакIрайн агьра 500-600 машина, БТР-ду, танкру нанисса колонналийн. Ссят хьхьунил 2 хьусса чIун духьунссия. БувчIунни вай жучIанма гьан бувсса инсантал бушиву. ДучIив нанисса колонна дяйкьуну, Аьхъарав диявай дия. Аьхъардал, Шушиннал шяраваллаву 80% мичиххичнал бия. Вай тиккун тIайла бацIарча, иш ххуйну къабагьаншиву бувчIлай, колонналул хъирив лавну, хьхьичI машина бацIан бувну, ххуллу кьукьав. Бусав нава цу уссарав, бувчIин бав ми, ДучIия хъинну архну лавгун, дазул чулийнмай най бушиву, тийх нигьачIаву душиву. ВичIи дихьлай бакъая, миннан зат бувчIин бан хъинну захIмат хьуна. Ахиргу, цукун-бунугу вих бан бювхъуну, зана бивтун, ДучIиннал шяравун тIайла буккав.
Яла кIул хьуна Аьхъарав ва Шушияв миннах боевиктал ялугьлай бивкIшиву. Ттуйнма тIайла къабавцIуссания, вай боевиктурал луркIанналухьхьун бириян най бия. Азарахъул инсан ухьунссия колонналуву, тивун бувхния, оьккисса ччар хьунссия. Гайксса инсантал бивкIулия арх бан бювхъуну дакIниву ххаришиву дия. ХьхьичI най бивкIсса ЗИЛ Аьхъарав бучIлачIисса кIанттурдай боевиктурахьхьун биривну, циняв ливтIуну бия.
Учин ччимур вари, та чIумал аьралитурал цаннал цаннащалсса дахIаву ххуйсса дакъая. Райондалийн тукунсса колонна нанийни кIанттул милицанал отделданийн баян бан аьркинссар, миннан кумаг бан, дайшишру хьун къаритан. Хаварбакъулий нава тIайла авцIуну миннан бахтти хьуссар.
– Инагу, вил каялувшиннаралусса милицанал зузалтралгу мукунма ххассал бувна душманнал шалклувун багьсса Липецкаллал ОМОН-лул аьралиталгу.
– Нюжмар хьуна ми райондалийн бувкIун, 25 инсан ия. Дагъусттанная, жула халкьунная, миллатирттая, аьдатирттая цичIав кIулну бакъая. Гикку буссаксса хIаллай миннахь жува ца буссарув, цукунсса буссарув буслай ивкIра. Липецкаллал аьралитал кьянкьа-кьурчIисса оьрчIру бия. ЦIубутIуй вихшала къадуллай бивкIхьурчагу, яла цахъис хIала бувххуна. Ми бия жу цивппа кьабивтун гьанссаххай нигьабувсун. – Так жул жаназардал ялттур тай зучIан гъан хьунтIисса, – куну, паракьат бувссия. ЦIуссалакрал райотделданул милицалтрал, мяйжаннугу, хъуннасса даву дурссар тай шалклува буккан бан. Липецкаллал аьралитал бакъассагу, жущал бивкIссар Чапаевкаллал пострая буккан бувсса 24 виваллил аьралуннал аьралиталгу. КIива БМП. КIия ополченец ва кIия милицанал зузала гьан бувну, буккан бувссия ми Чачаннал Гиляны тIисса шяраваллил ва Чапаевкаллал дянивсса пострая. Мугу хъунмасса бахтти хьусса иширан ккалли бара. Чапаевкаллал шяравалу боевиктурал дурцIуну дия. Къабигьану бивкIссар кIичча буккан. КIивагу БМП райотделданул чIарав бацIан бувну буссия. Ми яла жун бучIи лявкъуна щавурду дирсса ОМОН-лул зузалт буккан бан.
ХIасил, 8-9 ссятрай нигьал ва хьуллил дянив буккан буллай бивкIссару Липецкаллал ОМОН-лул зузалт. Бигьану бакъая. 7-8 инсан захIматсса щавурду дирсса ия. Тагьар муксса захIматсса дия, циняв оьрмурдацIа хьун бюхъайсса. Цамур чаран бакъая. Таваккул бувтун буклан багьлай бия. Ттула хъиривчувтуращалгу маслихIат ккавккун, Чачаннал чулухунмай лихъансса пикри хьуна. Яла бувчIуна жува тIайласса хIукму бувну бивкIшиву.
Щавурду дирсса 7-8 инсан, кIай кIивагу БМП-лий щяивтун, кIюрххицIунай, дахьра чани хъяхъатIисса чIумал, шяравух тIайла уккарду. Мугу хъуннасса нигьачIаву дусса ша бия, сагъ-саламатну буккансса вихшалагу чансса дия, амма цамур чаран бакъая. Щавурду дирми жущала буцин хьун най бакъая. Ттун бувчIлай бия ва ишираву ттуйра хъуннасса жаваблувшинна душиву.
– Цанная ца арх къабувцун, бусса гужирай леххан бувну насияра, личинтIиссару, – куну, тIайла буккав. Ца-ца чIумал жун, Заннал ка бавкьуну, къахьун кунма чIалачIисса кIанайгу тIайлабацIу шайва. Мукун хьуна ва иширавугу. Хаттаблул ва Басаевлул штаб бусса кIанттурдайх, дяххуллийх шярава личин бювхъуна кIивагу БМП-луща.
Му чIумал, ясирну агьну, Хаттаблул ва Басаевлул штабраву ивкIсса ттула зузала Къуркъиев Аьлил тархъан хьуну махъ бувсуна та чIумал штабраву ци иш бивкIссарив. КIюрххицIунмай, леххан бувну нанисса БМП-дал аьлагъужа баяйхту, боевиктурал штабраву гьанавиххишиву хьуну дур. Оьруснал аьрал бувхссаххай, Хаттаблул ва Басаевлул амру бувну бур 300-400 метралул манзилданий арх хьун. Хьумур бувчIукун, ми хъирив битлан бивкIун бур, амма БМП-ду арх бувцун бур. Та чIумал, райондалул ФСБ-лул хъунаману ивкIсса МаматIи ХIамзатовлущал, ттула хъиривчувтуращал маслихIат ккавккун, тIайласса хIукму бувну, цинявнналсса къахьурчагу, чIявуминнал оьрмурду хассал бан бюхъаврия ххарину икIара. Яла махъ жувагу бувкру Казбековуллал райондалийхчIин ЦIуссаккуллал шяравун. Му чIумал тикку Амучи Михайлович бакIчисса штаб бия.
– Дяъви нанисса гьантрай захIматсса хIукму кьамул байний ина республикалул хъуниминнащал дахIаву дайссияв?
– Цал-кIийлва ттуйн оьвкуна республикалул виваллил иширттал министр Адильгирей МахIаммадтIагьировлул.
Яла ттущал дахIаву дайва мунал хъиривчув Оленченкол. ХъунмурчIин, тагьарданух бурувгун, хIукму жува кьамул байссия.
– Дяъви байбишин хьхьичI, цала оьрмулунгу нигьачIаву дуна, боевиктал райондалийн ххяххан най бушиву бусан, хIадур хьияра учин ЦIуссалакрал райондалийн увкIссия Надиршагь Хачилаев.
– Ххуйну дакIний дур нава къуллугърацIа шавай ливчIсса му кьини (хъян икIай).
Цияв ца байран дуллай, ЦIуссалакрал шяраваллил майданнив бавтIун бия жямат. Му цурдагу Надиршагь международный розыск баян бувну лаикIлакIисса, Колесниковлул ва Адильгирей МахIаммадтIагьировлул, ина му та угьантIиссар тIий, на авара уллалисса чIун дия.
Трибуналий бавцIуну буру райондалул каялувчигу, прокуроргу, нагу. Тива шихунай най ур Надир. Агь, ина къаувкIун ивкIссания цIана, учав ттухьва нава. Ттун бувчIлай бия ганан хъуннасса нигьачIаву душиву. Хаттаблул ва Басаевлул, цала тIимур къабувну тIий, му ивчIан хIукму бувну бивкIссар. КъакIулнангу кIулну бикIан, бусанна, та чIумал Хаттаблун ва Басаевлун, 2000 инсанная хьусса аьралгу, ярагъгу буллуну, Надир Хасаврал чулухунай ачин ан ччай бивкIссар. «На ттула ватандалийн дяъвилий къауккайссара», – кьянкьану баян бувссар Надирдул. Ялар му бат ансса хIукму бувсса. Му ппурттуву му дазуйсса Гиляны тIисса чачаннал шяраву кIучI хъанай ия.
ХIасил, лавхъун трибуналийн, ттул чIаравгу авцIуну, жяматрахь увкунни:
«Тагьар захIматсса дур. Ттун ххуйну кIулли. Махъгу, хьхьичIгу райондалийн ххяххан най бур. Дахху-дихху дурну, ярагъ машан ласияра. Казбековуллал райондалул жямат мукун зий бур. ЗучIа ярагъ бухьурча, нигьабувсун, махъаллил хьун бюхъайссар. Цаннал чIарав ца бацIияра». Мукун, нигьачIаву душивугу бувсун, лавгуна. Та чIумал ванал увкумуних жяматрал къулагъас къадурна.
Надир къаувгьуну тIий на РОВД-лул хъунаманал къуллугърая укьансса аьрзагу чичин увну ивкIссара.
Махъ яла Надирдул цалагу хъярч байва: «Утти ЦIуссалакрал райондалийн къаучIанна, на сававну ина къуллугърацIа шавай ливчIунна», – куну.
– Муслим МахIаммадович, цIана Гъунив 1999-ку шинал сентябрьданий ЦIуссалакрал райондалий най бивкIсса дяъвилул иширттая кино ласлай бур. Режиссер, сценарист вийн къабувкрив, цIухху-бусу къабуврив?
– КIира шинал хьхьичIва байбивхьуссар му фильм ласлай. Мунилсса буллалисса вице-премьер Телякавовлул увкуну бия, ДаххаевлучIан лавгун, мунахь цIуххияра тай иширттая, куну. Шин ва дачIиннул хьхьичI на му группалущал хьунаавкьуссияв. Ттун бувчIлай бур му документал фильм дакъашиву, амма художественный фильмгу чанссарагу мяйжанмуничIан гъансса дикIан аьркинни. — На ци учин аьркинссар тай иширттаву гьуртту хьусса, Липецкаллал ОМОН ххассал буллай бивкIсса ттула зузалтрахь? Ттун сценарийлуву миннал лархъсса хъар чIалай дакъар. Балики ттул цIа дахчилай духьурча, на ккаккан маувару, амма милицанал зузалтрал ва ополчентурал лархъсса хъар ккаккан дан аьркинссар увкуссия. Мунияр махъ ми ттуйн къабувккуна.
Махъ дурксса «Холодное лето — 1999 года. Новолакский рубеж» тIисса ЦIуссалакрал райондалий хьусса дяъвилул иширттаясса документал фильмравугу ттунна дакI къадаркьусса кIанттурду бур. Микку гъалгъа тIутIи бувну бакъар жула лакрал жямат, ополчентурал кьюкьраву бивкIми, къуллугъчитал. Лакрал, цIуссалакрал роль чанну ккаккан дурну дур, гайксса жула зузалтрал ва ополчентурал жанну дуллуну дунура. Цимигу азара лакрал ополчентал бавтIун бивкIссар тай аьратталсса гьантрай та байранну дайсса авлахърай, майданнив, гьарица шяраву. Миннахь цанни къацIувххусса, цанни миннаясса цучIав гъалгъа къатIутIисса ва фильмраву. ЦIуссалакрал район гумбетовцынал дуручлай бивкIсса кунмасса иш бур. Му зат ттун къащи хьунни. Фильм тарихраву личIантIиссар, жула оьрчIал оьрчIал ххал дуллантIиссар. Цукунни яла миннан бувчIин бантIисса тай иширттаву лакрал лархъшиву хъунмур хъар. Ттун ччива жула къуллугъчитурал му иширах къулагъас дурну, ци бан шайрив ккавккун, лакралмур биялалия, жула чиваркIуннал чувшиврия бусансса куц лявкъуну.
– Шинну ларгун махъгу Дагъусттаннал хъунама МахIаммадаьли МахIаммадович вин Виричувнал цIа дулун бакI цIуцIаву дуллай ивкIссар тIий бавссар…
– На Ростоврай зузисса чIумал Хизри Шихсаидовлул бувсуна ттухь му хавар. В. Путин Дагъусттаннайн увкIун, танащал хьунаавкьусса чIумал, МахIаммадаьли МахIаммадовичлул увкуну бия: «Тай иширттаву чувшиву ккаккан дурсса Муслим Даххаевлун Виричувнал цIа къадулаву лялиян бан хъанай акъара, ттуйра аьй хьусса кунма чIалай, бюхъарча, му зат щаллу бувну ччива», – куну. Миккува президентнал Песковлуйн тапшур бувна мунилсса бан. Ца зуруватурив ттул суд-диваннал ишру байбивхьуна. Му ппурттуву ттун лейтенантнал цIагу дулун аьркинссия.
– Ина ччя-ччяни хасъсса аьралий операция нанисса кIанттурдайн ияйссар тIий бавунни?
– Донецкалийн, Луганскалийн, Запорожьелийн ивра. Тийхсса ттула гьалмахтурачIан увкIун, маслихIатрайну, консультациялийну кумаг бара, дяъвилул опыт кIибачIара.
ХIасил, шайсса кумаг буллай ура.
Андриана Аьбдуллаева
