Ххирасса гьалмахтал!

Жулва ппухълуннал лакку маз азардахъул шиннардий никирая никирайн тапшур буллай ябувну бур. Ниттил мазраву дуссар жулва миллатрал хасшиву ва ляличIишиву. Ниттил маз жулла рухIри, ссихIри, аькьлулул камилшивур! Жулва мазравур дусса рувхIанийсса инсанлугъгу, щаллара дуниялгу!

Лакрал, яни лакку мазрай гъалгъа тIий бивкIминнал, чивчуссар инсаниятрал тарихраву ликъаххайсса ххару. Ниттил маз – му Аллагьнал аманатри, ссаврунная ливксса ххазинар.

Лакрал дакIру мудангу тIир­тIуну диркIссар дунияллул цIу-цIусса элмурду лахьхьаврийн, личIи-личIисса дуниявий­сса кIулшивуртту ласаврийн. ДакIничIан гъанну кьамул дай­сса диркIссар цайми халкьуннал маданиятгу, магьирлугъгу, амма къуццу бай­сса бивкIссар цалла хасшивугу, ляличIишивугу ядурну.

ЦIанасса заманалул циняв­ппагу мюрщи миллатирттал хьхьичI мазурдил хIакъиравусса къабигьасса масъалартту бивхьунни. Гьалбатта, му мазрацIун бавхIусса щавщи лакрал чIарахгу къабувккунни. Жущава, цуксса хIайпнугу, хIакьинусса кьини ми масъалартту бартбигьин­сса чаранну лякъин бюхълай ба­къар. Гьантта бувккуну хъамабитлай бур жунма ниттил маз. Къа­хъунмасса мутта ливчIун бур жува манкьуртътурайн (манкурты) кIура баен. Ва тагьар даххана дуван къахьурча, нааьналухун бишинссару ппухълуннал жува. Бухлавгун нанисса мазрал чулухуннайсса баччибакъашиву – му миллатрайн лархъсса азарди, инсан мархрацIа шавур, я лавгмунил, я бучIанмунил, я инсантурал, я цалла хьхьичI цащара жаваб тIалав дуллан къашавур, халкьуннал цашаву дяйкьавур!

Жу оьвтIий буру гьаричувнайн, миллатрал мархрацIа къавхьусса лаккучувнайн: «Ххассал буллалияра ниттил маз!» – тIий. Байбишин аьркинссару агьаммуния: оьрчIан лахьхьин буллан ниттил маз, ичIува, кулпатирттаву гъалгъа буллан лакку мазрай.

Гьаричувнал гьантлул бакIрах жаваб дуллан аьркинссар укун­сса суалланухьхьун: «Ци дурссар нара хIакьину ниттил маз буруччиншиврул?». Жавабгу укунсса дикIан аьркинссар: «ХIакьину гъалгъа тIий ивкIра лакку мазрай, лахьхьав ниттил мазрай­сса цIусса махъру, лакку мазрай чивчусса асарду буккин хIарачат буллай ивкIра, миллатрал кказит чичав, лакку кказит ккалай ивкIра кулпатрахь, оьрчIахь лакрал вирттаврая бусав…».

Жул леххаврих, оьвчаврих къулагъас къадурма манкьуртри, лакку мазрал муттаэри.
Жу дакI дарцIуну буру – жул лабизаву зулгу дакIнива нанишиврий. ХIакьину, марцIсса гьава кунма, миллатрал цашиву аьркинни! ХIакьину жунна аслийсса лакку сиппат, жулла хасшиву ядан багьлай бур! Жува Аллагьналгу, жула ппухълунналгу хьхьичI лажин кIялану бацIан аьркинну!
Ххазинардалгу ххазина – ниттил маз, Аллагьнал аманат, ттаттахъал васижат, оьвтIий бур хIакьину жуйнма.

Миясат Муслимова, педагогикалул элмурдал
кандидат Лакку мазрайн бувцуссар ХIадис ХIадисовлул