«Илчи» кказитрал редакциялул ва ЦIуссалакрал райондалул «Возрождение Родины» тIисса ихIсандалул фондрал баян буллалиссар ЦIуссалакрал аьрщарайн ххярхсса террористътурал кьюкьри ххит дурну 25 шин шаврин хас дурсса суратирттал конкурс.
Конкурсрайн гьан дурсса суратру 30х40 см. дуциндараяр (А3 формат) ххишаласса дикIан къабучIиссар. Суратру кьамул дуллалиссар ноябрь зурул 1-ннийн бияннин (ва кьинигу хIисавну).
Давуртту гьан дан бучIиссар цифровой журалий ва электрон адресрай: ilchi@etnomediadag.ru ягу редакциялул адресрай: 367018, ш. МахIачкъала, пр. Насрудинова, 1а, «Илчи» кказитрал редакция, суратирттал конкурс тIий ккаккангу дурну.
Ккаккан дан аьркинссар мукунна авторнал цIа, фамилия, буттал цIа, шяравалу, цими шин дуссарив. Шагьрулул школардай дуклакисса бухьурча, ккаккан бан аьркинссар цумур школа буссарив.
Конкурсрайн дуркIсса суратру дишинтIиссар «Илчилул» телеграм каналданий.
Давурттан кьимат бищунтIиссар кIира номинациялий:
1. Авторнал магьиршиву, усттаршиву.
Кьимат бищунтIиссар профессионал художниктурая сакин хьусса жюрилул.
Цалчинмур кIану бувгьуманан дулунтIиссар 10 азарда къуруш;
КIилчинмур кIанттух – 5 азарда къуруш;
Шамилчинмуних – 3 азарда къуруш.
2.Тамашачинан асар шаву.
Ва номинациялий кIанттурду булунтIиссар «Илчи» кказитрал телеграм-каналданий (ilchi_info) тамашачитурал бивщусса кьиматирттайн бувну.
Цалчинмур кIану бувгьуманан – 10 азарда къуруш;
КIилчинмур кIанттух – 5 азарда къуруш;
Шамилчинмуних – 3 азарда къуруш.
Мукунна дикIантIиссар конкурсрал сакиншинначитурал чулухасса хасъсса призгу (10 азарда къуруш).
Ххув хьуминнал суратру дишинтIиссар Дагъусттаннал Жяматийсса штабрал галереялуву.
Суаллу булун бюхъайссар Илчилул телеграм-каналданий (https://t.me/ilchi_info_bot)
