Чагуртъталгу, Жасмингу, оьрчIи фонтаннугу

Мукьва гьантлул дянив, сентябрьданул 12-15-нний, Дарбантлив Низами Гянджевил цIанийсса паркраву най дия халкьуннал художествалул сянатирттал Дунияллул халкьуннал дянивсса «Хранители традиций» цIанилусса фестиваль. Ва сакин дурну дия Дагъусттан Республикалул Туризмалул ва халкьуннал художествалул сянатирттал министерствалул, «Аьрасатнал халкьуннал художествалул сянатру» Ассоциациялул чIарав бацIаврийну ва «Синергия» корпорациягу уртакьну.
Фестиваль тIитIлатIисса ихтилат бувна Дагъусттан Республикалул ХIукуматрал председатель Аьбдулмуслим Аьбдулмуслимовлул.
Цалва ихтилатраву ванал чIурчIав дурна жулва гьунар бу­сса усттартал, ляличIисса луртанну ва щихачIав къалархьхьусса культура, халкьуннал канил пишарду бушиврий, вай, жулла аьдатру чIалачIи даврицIун, ттизаманнул брендирттал гьануну хьун бюхъайшиврий. Премьер-министрнал кIицI лавгуна Да­гъусттан халкьуннал художествалул сянатирттал заповедникран ккаллишивугу.

Официал бутIа щаллу хьуну махъ жулла республикалул паччахIлугърал ва фольклорданул коллективирттал, таксса балайчитурал концерт ккаккан дурна.
Мукьва гьантлул дянив Аьра­сатнал ца яла хьхьи­чIавамур шагьру кIура бавну бия ца хъунмасса дуссукъатлуйн. Шикку бакъасса журалул усттартал бакъая: Аьрасатнал 20 региондалиясса ва Белоруссиянавасса, Узбакисттаннавасса, Къиргъизнавасса. Мукьвагу гьантлул дянив Низами Гянджевил цIанийсса паркраву хьуна личIи-личIисса выставкарду-ярмаркарду, мастер-классру, миллатирттал яннарду ккаккан даву, лекциярду, концертру ва чIярусса цаймигу шадлугъру.
Шикку ккаккан бюхълай бия укуннасса кьинирдай итталун нажагь дакъа къадагьаймур ягу дурагу къадагьаймур. Мисалдаран, муххал усттарнал пурш бишлашисса куц ххал баврицIун, ччинаща бюхълай бия чагуртшиву дувангу. Мукун, табасаран миллатраясса муххал усттар Кьасим Абасов цалва майданнив гъирарай кьамул буллай ия ва давривух гьуртту хьун ччими, ва буслай ия укунна лахIан дуван къашайсса мах кIири дуркун цуксса мютIи шайссарив.
Цал архIал библиотеканугу, рестораннугу, Низами Гянджевил паркрал ца чIюлушиннанугу хъанахъисса «Noon» заведениялуву цIа дурксса искусствоведтурал, тарихчитурал, этнографтурал ккалай бия лекциярду, хъанай дия цаймигу мюнпатсса ва хIазсса батIавуртту.

Фестивальданий гьуртту хъанахъисса усттартуравух къачанъя лакгу. Вайннавух бия цIа дурксса дизайнер, Да­гъусттаннал региондалул жяматийсса «Гильдия дизайнеров» организациялул хъунмур, СунбатIуллал шяравасса Минажат ХIасановагу:
– На ва фестивальдания хъинну рязину ливчIра, яла гуж­сса асарду биян бувуна фестивальданул кIилчинмур кьини хьусса креатив индустрия сакин даврицIун бавхIусса сессиялул. Аьрасатнал хьхьичIунсса регионнаясса модераторталгу гьурттусса, ххишала дакъа мюнпатсса даву хьунни, хъинну хIазсса проектру дия. Шикку на кIул хьура ттулва пишалуцIун хъунмасса мюнпат хьунсса цIу-цIусса инсантуращал. Фестивальданийн дагьайсса цимурца щаллу дурну дия лавайсса даражалий. Хъинну ччива ва фестиваль гьарца шинах дуллансса аьдатравун дагьну, – тIий бур Минажат.
Фестивальданий мукунма гьуртту хъанай бия «DIANA&­SABI» брендрал автор, Кьукуннал шяравасса Диана Мужаидова, Бархъаллал шяравасса Магьият Даудова ва ванил арс Камил ХIаммаев ва м.ц.
ЦIа дурксса пагьламан, 1-мур ЦIувкIратусса Камил Маммаевлул паркрал дязаннив, фонтаннал чулух ккаккан дурсса шоулул бавтIминнал дакIурдийн яргсса асарду биян бувна.
Фестивальданий хьусса давурттавух дия нардырдал ва спортрал программированиялул чемпионатругу.
Фестивальданул лагрулий­сса шадлугъру мукьрагу кьини най дия хьхьудяризаннин, щаллугу хъанай дия Аьрасатнаву яла хъуннамур чаннал ва музыкалул фонтандалун ккалли­сса Дарбантуллал фонтандалул шоулийну.
Фестивальданий хьуна хъи­нну чIявусса туристъталгу. Вайннавух бия, ва фестиваль дикIансса хьхьичIва кIул хьуну, хасну ванийн биянну бувкIссагу. Укунминнавух бия Иваново шагьрулия бувкIсса Татьяна Аксенова, ванил дус, вава шагьрулиясса, амма сайки 20 шинай Чехословакиянаву ялапар хъанахъисса Наталья Мерзлякова ва Челябинскалия бувкIсса Елена Петрова. Вай буслай бусан шавай бакъая жулла тIабиаьтрал, жулва инсантурал, Дарбант шагьрулул ххуйшиврия, жулла дукрардал нахIушиврия.
Фестивальданул шамилчинмур кьини ахттакьунмай Низами Гянджевил паркраву мяйжаннугу ххалаххи багьансса кIану бакъая – ва кьини шикку дия Аьрасатнал цIа дурксса балайчи, Дарбант шагьрулий хъунма хьусса Жасминнул концерт. Хъиривмур кьини тIурча, Жасмин фестивальданул лагрулий хъанахъисса выставка-ярмаркалийнгу бивуна.
ЛичIи-личIисса халкьуннал дянивсса дусшиврул ва уртакьшиврул арарду цIакь дуллали­сса фестиваль лакьлакьисса шадлугъ тIайла дарцIуна Дагъусттаннал халкьуннал Цашиврул кьинилийн. СахIналия фестивальданул мукьрагу кьинисса гьурттучитурахь ва хъамаллурахь барчаллагь тIутIисса махъ лавхъуна Дагъусттан Республикалул туризмалул ва НХП-дал министрнал хъиривмур Анна Безруковал.
– Ва фестивальданул, жулва хъунмасса билаятрал культуралул авадансса ирс ккаккан баврицIун, гьурттучитал кIул бунни цIу-цIусса хъин-хъинсса инсантуращал. Ва хьунни личIи-личIисса миллатирттал дянив­сса дусшиврул ламуну, – увкуна ванил.
Туризмалул ва НХП-лул министрнал хъиривчу МахIаммад ХIабибуллаевлул спортрал программированиялул бяст-ччаллай ххув хьуминнан дуллуна грамотартту.
Официал бутIа щаллу хьуну махъ чIяву миллатру бусса жулла республикалул цIа дурксса артистътурал ккаккан дуруна ххаллилсса концерт. Ваний тамаша бувминнавух хъинну чIявусса туристъталгу бия. Буссияв нагу.

Бадрижамал Аьлиева