Дагъусттаннайн шанна кьинисса гастроллащал бувкIун бур Кострома шагьрулул А. Островскийл цIанийсса паччахIлугърал драмалул театр. Вайва гьантрай мукунма Кострома шагьрулий буссар А. Къапиевлул цIанийсса Лакрал паччахIлугърал музыкалул ва драмалул театргу.
Кострома шагьрулул А. Островскийл цIанийсса паччахIлугърал драмалул театрданул тIитIлай бусса бур 216-чинсса сезон. Гьарца сезон тIитIайсса дур А. Островскийл пьесалийну.
Вай хъанахъиссар «Большие гастроли» тIисса Аьрасатнал Культуралул министерствалул программалул лагрулий, «Росконцерт» тIисса культуралул идаралул кабакьаврийну.
Ва программалул лагрулий Лакрал театр уттинин гастроллай лавгссар Къалмукьнал, Ухссавнил АьсатIиннал, Къабардин-Балкьарнал, Адыгейнал, Чачаннал Республикарттайн ва Пятигорск, Ярославль, Къазан шагьрурдайн. Кострома шагьрулул театрданул тIурча, жула театрдануяр оьрмулул цукссагу хъунмасса бухьурчагу, ва программалул лагрулий цалчинсса гастроллу дусса дур вай, хIатта гастроллал география вайнналгу хъунмасса бухьурчагу.
Дагъусттаннайн Кострома шагьрулул театр лавсун бувкIун бур шанма спектакль: А. Пушкиннул «Капитаннал душ», В. Паниннул «Фронтрал альбом» ва А. Островскийл «Жиндралсса арцу». Лакрал театрданул труппалул тIурча, Кострома шагьрулий ккаккан бантIиссар У. Шекспирдул «МютIи бакъу мютIи баву», А. Островскийл «Сунчи дакъу» ва А. Арбузовлул «Ттул мискин, Марат».
Гастроллал лагрулий «Дагестан» РИА-лий хьунни хъамаллуращалсса пресс-конференция. Ва дачин дурну бия ДР-лул Печатьрал ва информациялул агентствалул каялувчинал хъиривчу Наида МахIаммадова.
Театрданул каялувчи Сергей Кузьмичлул бусаврийн бувну, Кострома шагьрулул паччахIлугърал драмалул театр ккаллину бусса бур Аьрасатнал ца яла оьрмулул хъунмамур театрданун, бусса бур яла хьхьичIунсса театрдал сияхIрайгу. Театрданул къатри цирдагу дусса дур Александрийский театрданул куц бусса.
Гьашину театрданул тIитIлай бусса бур 216-чинсса сезон. Гьарца сезон тIитIайсса дур А. Островскийл пьесалийну.
«Дагъусттаннай жу аьчухну хьунабавкьунну. Гьарца кIанттай хIурматрай буру, хъихъи лавсун буру. ЖучIан гастроллай къалавгун шихва ливчIсса Лакрал театрданул зузалт жул лавай бавцIуну бур: гьарма бюхъайкун чIарав ацIлай ур. Лахьхьу жун ххаллилсса экскурсия сакин бунни», – тIий ур Сергей Кузьмич.
Театрданул хьхьичIунсса актриса Алена Голубевал бусаврийн бувну, «Фронтрал альбом» тIисса спектакль бишиншиврул ваниву гьурттусса цума-цагу актернал лавхьхьуну бур музыкалул инструментрай руцин.
«Театрданул ца яла цIакьсса ттарцI – тамашачири, жула тамашачи жун ххуйну кIулссар, ганан ци журалул спектакль кьамул хьунтIиссарив, цумур спектакль ххуй бизантIиссарив, цумур спектакльданул ялув щак-щуклий личIантIиссарив.
Ших, зучIа, тIурча, чан-кьанну дакIру гьалак дуклай дур, цанчирча къакIулли цукун кьамул бантIиссарив Дагъусттаннал тамашачинал жул спектакльлу. Амма, ци бухьурчагу, жу макьу дуну буру Дагъусттаннал тамашачинал хьхьичIун буккан», – увкунни «Фронтрал альбом» спектакльданул режиссер-постановщик Александр Кирпичевлул.
Зулайхат Тахакьаева
