Вай гьантрай Ц1уминалийсса ТIюхчардал школалий хьунни ххаллилсса педагог ва тарбиячи, ДАССР-нул лайкь хьусса учитель, ТIюхчардал шяравасса цалчинсса учитель Минажат Оьмаровал аьпа абад буллалисса мажлис. ТIюхчардал школалул лажин чIирайн лархъунни ванин мармарчарил ула.

Мажлисрай гьуртту хьуна школалул дуклаки оьрчIру ва учительтал, гъан-маччами, шяраваллил жямат, бусравсса хъамал. Цила оьрмулул хъунмур бутIа оьрчIан кIулшивуртту дулаврин ва ми тарбия баврин хас бувсса Минажат Магьдиевна дакIнин бутлатисса ихтилатру бувна АьФ-лул Конституциялул судрал судья, юридий элмурдал доктор, профессор ХIадис ХIажиевлул, Дагъусттаннал Халкьуннал Мажлисрал КIанттул цила каялувшиннарал комитетрал председатель Артур Исрапиловлул, ЦIуссалакрал райондалул бакIчи МаматIи ХIамзатовлул, техникалул элмурдал доктор, профессор АьвдурахIман Халиловлул. Сайки циняв ихтилатчитурал мукунма хIурматрай дакIнин бувтунни ва даврил сиптачину бувксса, амма цила пикри дузрайн буккан баннин къаливчIсса, Минажатлул душ Къайсаргу.
– Ганиннин учительталну хъами къабивкIсса Дагъусттаннай 30-ку шиннардий цалчинсса учительница буккаву ккалли бансса иш бивкIссар. Му бакъассагу, 1936-ку шинал Минажат Оьмарован дуллуну диркIссар ДАССР-данул Верховный Советрал ХIурматрал грамота. Та чIумал ва диркIссар учительтурансса яла лахъмур награда, махъсса шиннардийсса Социалист захIматрал Виричунал цIанищал архIалсса, – увкуна ХIадис ХIажиевлул.
– На ххарира цIусса дуккаврил шин зул школалий укун ххаллилсса мероприятиялийну дайдишаврия. Минажат Магьдиевнал хъунмасса захIмат бивхьуссар ТIюхчардал шяраву, ЦIуссалакрал райондалий, щалагу республикалий кIулшивуртту дулаврил даража гьаз бан. Дагъусттан гуж бусса инсантурал билаят бур. Миннал гужгу лавгмур дакIний битавривур, буттал буттахъал ирс ябавривур бусса.
Минажат Оьмарова кунма лайкьсса инсантурал аьпа абад баву, минная ялун нанисса никирахь бусаву жула буржри. Ттун кIулссия Минажат Магьдиевна. Га бия дурккусса, аькьилсса хъамитайпа, хIакьсса учитель, – увкуна Артур Исрапиловлул.
АьвдурахIман Халиловлул бувсуна цала кулпатгу, Оьмаровхъулгу 70 шинал лажиндарай хIала-гьурттуну бивкIшиву ва цала кулпатраву Аьбдулманаплул ва Минажатлул цIарду нукIура уттара дурну душиву, цала чIивима уссичIа ва ганал кулпатрачIа душиву миннал цIарду.
Минажатлул оьрмулия ва захIматрал ххуллия бувсуна ванил ученица ва гъанчу Умамат ХIусмановал.
Ахирданий ва мероприятиялий гьуртту хьун, цала кьини хъун дан, чIарав бацIан бувкIминнахь дакIнийхтунусса барчаллагь тIисса ихтилатру бувна Минажатлул душваврал Мисидул ва Ханзадал.
Ихтилатру къуртал хьуну махъ мармарчарил ула тIитIин вихшала дурна ХIадис ХIажиевлуйн ва Артур Исрапиловлуйн.
Дирхьуна тIутIив, баян бувна минут1райсса пахъ багьаву.
Хъирив дуклаки оьрчIал бувккуна учительнахасса шеърирду, увкуна балайрду, ккаккан дурна къавтIавуртту.
Бувну бур Минажат Оьмарова 1918-ку шинал февраль зурул 15-нний ТIюхчардал шяраву, ятIул партизан Магьди Худайнатовлул кулпатраву. 1924-ку шинал лавгун бур дуклан Хъурхъиял школалийн. Ва бивкIун бур дуккавриву итххявхсса, школалул жяматийсса давурттаву чялишну гьуртту шайсса душ. Райондалий цалчин комсомолданул кьюкьравун бувхсса душвавравух Минажатгу бивкIун бур.
1934-ку шинал Гъумучиял педучилищагу къуртал бувну, буттал шяравун ТIюхчарав бувкIун, дахьва тIивтIусса байбихьулул школалул заведующийну зун бивкIун бур. 1944-ку шинал, Лакрал ва Ккуллал цаппара районнал шяраваллу Аухуллал райондалийн дизан дуллалисса чIумал, чIярусса захIматшивурттугу ккарккун, вайннал кулпатрангу бизан багьну бур. ЦIуссалакрал райондалийсса ТIюхчардал школалийгу ва учительну, завучну зун бивкIун бур. Ялун нанисса никиран кIулшивуртту ва тарбия дулаврил ххуллий бивхьусса захIматрахлу Минажатлун дуллуну дур «ДАССР-нул лайкь хьусса учитель» тIисса бусравсса цIа, ДАССР-нул Верховный Советрал чулухасса ХIурматрал грамота. Минажат бивкIун бур Дагъусттаннал Хъаннил цалчинмур съездрал делегатну. Цимилгу бувчIуну бур шяраваллил, райондалул Депутатътурал советравун. Аьпалухьхьун лавгун бур 2005-ку шинал оьрмулул 87 шинаву.

Андриана Аьбдуллаева