ЦIуссалакрал аьрщи террористътурацIа тархъан дурну гьашину 25 шин хъанай дур. Та ппурттуву чансса къавхьуна виричушивуртту данмигу. Тания махъсса виричушивурттал ххуттаву хъунмасса кIану бувгьунни ссурхIиричу МахIанмад НурбахIандовлулгу. ВацIлувун гъан-маччанащал игьалаган лавгсса полициялул лейтенант лажин лажиндарай авцIуну ия лавмартсса къачагътурайн.
Дагъусттан хъун бувсса ванацIунсса видео виричунал ас-намусрал кодексну хIисав хьунну дунияллул лагма дурккуна. Цайнна дурксса кьинилулсса къабувну, цайминнал кьадарданулсса, Ватандалулсса буллай, цала даврил уртакьтурахь ва ялун нанисса никирахь: «Зузияра, уссурвал!» куна ванал, зулмулухьхьун цува иривну чIалай унува.
Ва видеолийну дурчIуна виричусса жагьилнал аькьлулул тархъаншиву, дакIнил марцIшиву, жуйнмагу, жулла хъирив нанисса никирайнгу оьвтIисса леххаврил чIугу, зунтталчунал кьянкьасса хасиятрал барашингу.
Жула паракьатсса оьрмулухлу жан дуллусса Виричу къахъамаитаврил ххуллийсса ца чIивисса бутIа хIисаврай чичав ва назму.
Иттархъенну липI-липI тIий,
Жан дия зурзу бюкьлай,
БухIлай, кIухIлай, ккурухIлай
Жалладтурал зулмурду.
ХIасрат духIан хIадурсса
БакIгу лахIан къадурну,
ЧIуллай бия къюкIливу
Инсаншиврулмур буржгу.
Оьсса ххурххуппалухьхьун
Иривну ухьурчагу,
Къачагътурахь лергъ чаяр,
БивкIу кьамулну ия.
Виричусса лейтенант,
Чаннан куна, кьянкьасса,
Ца лахIзалул мутталий
Дунъяллийн тапшур хьуна.
Гъазиталлу тIутIисса,
Гъарачитурал кьюкьри
Ца аслансса жагьилнал
Кьюкьалдаран дирхьуна.
ЧIарах жегъирххуллугу,
ЧIалай бия, аьш кунма,
Лечлай лагмава марчгу,
БивкIу байщин бан кунма.
ХIасратсса кьуру хIачIлай,
Зурзу тIий дия аьрщи.
Чувнал яхIгу, хъюлчугу
Аьсивну кьамул буллай.
«Уча махъ, ина уча,
Уча, ва цIана уча,
Навагу къазуннача,
Зугу мазурду, уча».
ЦIарал кавзливу кунма,
КьацIа бихьлай ккарччайнгу,
ЛяпI чинвагу къабувна,
Бярду бавцIсса яругу.
Зунттуяргу бюхттулну
Гьаз дурну хъачI ва бакIгу,
Паща тIисса дакIнива
Ливчуна цIарал махъру.
Зурзу чин бувна зунтту
Виричунал мукъурттил,
Экьилавгуна оьтту
Урттун тарту аьрщарайх.
КIюла-лахъи чурххал хъит
Оьттул бярав багьаннин,
Левххун бавчуна махъру
«Зузияра, уссурвал!».
Автоматрал ккуллардал
ЩатIи бивщу ссятраву,
ЛухIи хъюруврал яру
Лавагу-къалавкьуна.
Къучагънал хIакьсса гьавас
Лещан буван къашайссар.
Асландалул рухI ласун
Ас бакъуща къашайссар.
Зий буссар органнаву
Зур бусса арсру ттигу,
Халкьуннал ас-намусну
Аьдлу-низам дуручлай.
ЦIарал хха хьусса махъру
ДакIнияту къалаглай,
Гьарнал къюкIливух бухлай
Буссар ттигу лехлайнма.
Зунтталчунал къирият
Зунттавара ласайссар,
ХIасратругу дурхIуну,
Тархъаншиврийн уккайссар.
Булбул Оьмариева
