«Илчи» кказитрал редакциялул ва ххуллухьсса хъамалудуш хьунни Москавуллал Н.И. Пироговлул цIанийсса медициналул университетрал лечебный факультетрал 5-мур курсрал студентка, университетраву сакин дурсса Студентътурал союзрал вакилханалул председательнал хъиривмур, ХIамидлул душ Камила Исякьова.

Камила бувну бур ТIулиз­матусса ХIамидлул ва Ваччатусса Зулайхал кулпатраву. Ванил ни­ттил ппу Давди ур Ва­ччиял шяраву ххишала бакъа бусравсса Увайсхъал тухумраясса инсан. Камилан лайкьсса тарбия дулавривугу ванал хъуннасса хъар лархъун дур.

ЧIивинияцIава хIакиннал пиша язи бугьансса хияллай бивкIсса душ, лицейраву 7 класс къуртал байхту, дуклай бивкIун бур химиялул ва биологиялул куртIсса кIулшивуртту дулайсса хасъсса классраву. Мах1ачкъалаллал Астемировлул цIанийсса 39-мур лицей мусил медальданий къуртал бувсса, ЕГЭ-рду лавайсса баллай дуллусса Камилал хьхьичI ччимур вузравун буххансса ххуллу тIивтIуну бур. Лицейраву хьхьичIунну дуклай бивхьусса захIмат бакIуйн буккан бувну, дуклан бувххун бур цуппа хияллай бивкIсса Н.И. Пироговлул цIанийсса Миллатрал ахттаршиннарду даврил медициналул университетравун.
Камила лицейраву дуклакисса чIумалгу гьарица чулуха итххявхсса душ бивкIун бур. Республикалул лагрулийсса олимпиадар­ттай, конкурсирттай гьуртту хьуну, ванил цимилгу хьхьичIунсса кIанттурду бувгьуну бур.

Дуклан буххайхтува Камилал ккаккан бувну бур цуппа кIул­шивурттах мюхтажсса, захIмат ххирасса душ бушиву. Университетраву дуклакисса хIаллайгу ванил цурда ца минутI оьнна гьан къадайсса дур. Вузравугу Камила бур хьхьичIунсса студентътурал сияхIрай. Дарсру лахьхьаврий гьашиву къадурну, куртIну лахьлай ва ахттар дуллай бур медициналул элму. Камила кьамул бувну бур университетравусса элмийсса ккурандалувун. ЦIана ванийн вихшала дурну дур элмийсса публикацияртту ххал дигьаврил даву. Му бакъассагу, ва чялишну гьуртту хъанай бур элмийсса конференциярттай, олимпиадарттай ва чичлай бур элмийсса макьалартту.

Москавливсса Н. В. Склифосовскийл цIанийсса Анавар кумаграл азарханалийн дежурствардайн занай, лахьлай бур хIакиннал пиша. Шиккугу ванил цуппа унгу-унгусса хIакин хьун ччай бушиву ккаккан бунни. Камила буслай бур цалсса цила дакIнил лавсмур пиша хIакин-флеболог бушиву.

– Флебологнал пиша дакIнил лавсуна ттун нава цалчинмур курсрай дуклакисса ппурттуву, сосудирттал хирург, флеболог Сабир Аьйдаевлул клиникалийн практика лахьхьин заназисса чIумал. Сабир Салимовичлул жун ккаккан байва туннурдай магьирну буллалисса личIи-личIисса журалул операцияртту, дайва консультацияртту. Цаппара операциярттай на хIакиннан ассистентшивугума дурссия. Тания шийнмай ттун флебологнал пиша дакIнил лавсуна, – буслай бур Камила.
Цалчинмур курсирая байбивхьуну Камила чялишну гьур­тту хъанай бур университетраву­сса Дагъусттаннал диаспоралул иширттавух ва вузраву дуллалисса цинярдагу мероприятиярттавух.

– Жул университетраву бур 26-хъул вакилхана (землячество), миннувасса ца – Дагъусттаннал диаспора. Дуклан бувхсса, цIубутIуй нитти-буттах, уссур-ссуннах, Ватандалух мякь бувксса, бизар хъанахъисса студентътуран диаспоралул кулпатрал кIану бугьай. Гьарица шинал диаспоралул дайссар университетраву дуклакисса студентътал цачIун баву, миллатрал культура ядаву мурадрайсса личIи-личIисса мероприятияртту, ярмаркарду ва фестивальлу. Гьашинусса шинал жу хIукму бувссия миллатирттал культура, аьдат-эбадатру машгьур даву мурадрайсса собранияртту дуллансса, – буслай бур Камила.

Ванил сипталийну университетраву дуллалисса собраниярттал лагрулийсса цалчин­сса мажлисгу хьуссар лакку мазран, лакрал тарихран, вирттавран, аьда­тирттан, багьу-бизулун хас був­сса. Камила бакIчисса лакрал студентътурал хIасул дурсса лакку мазран хас дурсса байрандалий гьурттушинна дурссар «Дагъус­ттан» тIисса Москавуллал Культуралул центрданул президент Арсен ХIусайновлул, Москавливсса жула оьрчIахь лакку мазрал дарсру дихьлахьисса Ххадижат ЦIаххаевал ва ММОЛ «Лакия» ккурандалул вакилтурал. Мероприятие лавайсса даражалий тIайла дуккан хIарачат баврихлу Москавливсса Дагъус­ттаннал культуралул центрданул Барчаллагь баян бувссар Камила Исякьован ва ванищал байран хIадур дуллай бивкIсса лакрал студентътуран.
Вакилханалул дуллалисса мероприятиярттай чялишсса гьур­ттушинна даву дакъассагу, Камила бур волонтер ва доноргу. Цалчинмур курсрайва бувххун бур волонтер-доноршиврул суккушиннаравун.

– Ттунна оьрмулул 18 шин шайхту, на бувхра донортурал ккурандалувун. Волонтер хIи­сав­рай, кумаг бара университетраву донортурал акциярду сакин дан. Мукунма навагу гьуртту шара ши­кку дуллалисса донортурал цинярда акциярдавух. БувчIлай бур донортурал хъуннасса агьамшиву дусса даву дуллай бушиву, – тIий бур Камила.
ДакIнийхтуну ххирар ванин лакку мазгу, буттал кIанугу. Каникуллай биривсса гьантригу ванил цуппа лявхъусса, хъунма хьусса Ватандалий, цила буттал ва ниттил агьулданучIа гьан бай.
Хъуннасса вихшала дур жагьилсса никирал лайкь дантIисса чIяруми наградар­тту хьхьичI душиврий ва вайнная миллатрал цIа-кьини бюхттул дансса хьхьичIунсса пишакартал хьунтIишиврий.

ЧIа учинну Камилан гихун­майсса оьрмулуву хъунисса тIай­лабацIуртту!
Имара Саидова