Ттигъанну жул редакциялий уссия полковник, Чачаннал аьрщарая Дагъусттаннайн ярагъуннил балгусса къачагътал ххявхсса ппурттуву рес­публикалул МВД-лул дазурдал управлениялул («Дагестанская граница») хъунаманал хъиривчуну зий ивкIсса, ва тай цIаран лавхъсса гьантрай ЦIуссалаккуй сакин бувну бивкIсса Координациялул штабрал хъунаману ивкIсса, Чувшиврул ордендалун лайкь хьусса, Ттурч1иял шяравасса Оьмар­дул арс Сулайманов Амжад. Да­гъусттаннал ПаччахIлугърал советрал хIукмулийн бувну сакин бувсса Координационный центр бивкIссар ЦIуссаккулув. Ванил хъунаману ивк1ссар ХIукуматрал хъунаманал хъиривчу, аьпа биву, Амучи Амуттинов. Полковник Амжад Сулаймановлуйн тапшур бувну бивкIссар федерал гужирдал, дагъусттаннал милицалтрал ва ополчентурал даврил дахIаврил ялув ацIаву дуван. Дяъвилул мусиватраву ва хъуннасса жаваблувшинна дусса даву диркIссар, мюрш-кьюршсса затралгума хIисав ласун аьркин­сса. Тай аьратталсса чIуннугу, ишругу дакIнин бичин оьвку­ссия жу ванайн редакциялийн. Хъунама редакторнал цалчинмур суалгу ЦIуссалаккуйсса дяъвилуцIун бавхIусса бия.
– Амжад Оьмарович, буси та вас-ццахлийсса кьинилия, цукун кIул хьуна вин къачагътал ЦIуссалаккуйн ххявхшиву, цукун дайдирхьуна тайннащалсса талатаву?
– Сентябрь зурул 5-нний ттуйн жулва штабрал дежурствалийсса оперативникнал оьвкуна, ЦIуссалаккуйн террористътал ххявххун бур, укун­сса тагьар дур куну. 540 километра дазурдал ядуллай бу­ссия 54 пост, вай хъинну чан­ссия. На гацIана управлениялия увкра, Къизлярдайсса аэродромрайн лавгра. Шикку вертолетру дуссия. ХIаписартурал кьюкьлущал архIал жу вертолетрай ЦIуссалакрал райондалул чулийнмай левхру. Вертолет Гьамиящиял шяраваллил зума-къирагърай щяриртуна. Халкь шярава буклай бия. Пострай 59 инсан зий ия, террористътал – 2000, миннащал цIакь лаяйссияв. Шяраваллил зума-къирагърай милицалт, ополчентал бия. Бия лагма-ялттусса шяраваллаву яхъанахъисса милицалтгу, минная кьюкьа сакин дурну дия. Балаллул хьхьичI бацIан багьлай бия. На хасъсса рациялул кумаграйну таний ЦIуссалакрал райондалул отделданул хъунаману ивкIсса Муслим Даххаевлуйн оьвкуссия. Бувсуна Муслимлул ци тагьар дуссарив. Липецкаллал ОМОН дяъвилул цIарава буккан буван багьлай бия. Муслимлул ярагъ чанну бушиву бувсуна. На гацIана Хасавюрт шагьрулул отделданул хъунаманайн оьвкуну, ярагъ аьркинну бушиву бувсъссия. Ярагъуннил хъирив инсантал гьан бувара увкуна, 9 инсан тIайла увкссия. Яла Муслимлул бувсуна ярагъуннил луртан дусса склад тIитIин хьушиву, дузал хьушиву. Чапаево шяраваллил тийх, Зандакьуллал къирагърай виваллил аьралуннал застава дуссия, 40-нния ливчусса хIаписартал ва саллатI. Ми цинявгу райондалул отделдануву бавтIссия. Икьрал дур­ссия Муслимлущал, ссят 4-нний кIюрххицIун чIумал буккан буван щаву дирсса ОМОН. БМП-дал кумаграцIух буккан був­ссия, ца БМП дагьуна, мяйжанссар, мугу дуккан дуван хьуна. ЦIуссалакрал РОВД дусса кIаная арх дакъа дуссия ФСБ-лул отдел, мунил хъунаманугу уссия МаматIи ХIамзатов. Липецкаллал ОМОН ххассал бавриву ваналгу бутIа буссар, гаксса къизгъинсса цIаравату ОМОН буккан буван бигьану къабивкIссар, кьянкьану бавцIуну, буккан був­ссар.
– БоевиктурачIа ярагъ ххуйсса бушиврувагу чIалай бия тай ххуйну хIадур хьуну бивкIшиву. Балгуну бияв ярагъуннил?
– Балгуну бия ярагъуннил вичIахун бияннин. Гьарца чулуха щаллуну балгусса аьрал бушивруцIун, миннал кумагчиталгу бия, низам дуруччай органнал зузалт яхъанахъисса къатрай аьшру дурну дия, мукунма РОВД-лул, ФСБ-лул ва Липецкаллал ОМОН бусса Культуралул къатрайгу.
– Жулами цукун дузал бувна ярагъуннил?
– Ттуршва карабин бавчIуна ополчентурайх Хасавюртуллал военкоматрая бучIан бувсса. Бия цалва ярагъуннищал бувкIссагу. Сентябрь зурул 14-нний генерал-полковник В. Казанцевлул (ва уссия та ппурттуву Ухссавнил Ккавкказнавусса аьралуннал командирну) буюр бувна, шяраваллавун зачистка дуван буххансса. Зачисткагу дурну, минардацIа марцI дурну шяраваллурду, мурахас бувссар ЦIуссалак.
– Тай иширттаву хъунна­сса чувшиву ккаккан дурсса Муслим Даххаевлун Виричунал цIагу, ЦIукугу къабуллунни. ГъалатI тIайла бацIан бувара тIий хъирив буклай бивкIун бунува.
– Дяъвилул цIу лерщун арулва гьантлува ттуйнгу, Муслимлуйнгу оьвкуна МВД-лийн. Ттунгу, Муслимлунгу архIал дуллуна Чувшиврул орденну. Багьайссия Муслимлун Мусил ЦIуку. Булунгу аьркинссия. Таний МахIаммад Оьмаров уссия МВД-лул министрнал хъиривчуну. Та ия ца гьунарданухлу кIира награда къадулайссар тIий. Муслим лайкьссия Виричувнал цIанин, ванащал архIал хъар дургьуну ивкIсса МаматIи Бижаевичгу лайкьссия. КIинналвагу гьунарди Липецкаллал ОМОН дяъвилул цIарава буккан баву.
– Буси вилва оьрмулия, аьраличунал пиша язи бугьаву цукун хьуна?
– На школа къуртал бувссар ЦIуссалаккуй 1966-ку шинал, яла Орджоникидзелив – Аьралий училище. Ростоврай, Волгоградрай аьралий даврий зий ­уссияв, взводрал командирнал даврия, полкрал хъунаманал къуллугърайн ияннин. 1984-ку шинал Фрунзеливсса Аьралий академиялувун дуклан увххун, 1988-ку шинал къуртал бувссия. Шанна шин ва дачIиннуй Бакуйгу зий ивкIра аьралий частьрал командирну. Союз ппив хьувкун, тиккува ацIу тIий бунугу, занахьуссияв. МВД-лийн зун оьвкуна. ОМОН-далул командирнал хъиривману зий ивкIра. Яла — дазурдал управлениялул хъунаманал хъиривману. МВД-лия лавгун махъ 19 шинай зий ивкIра МЧС-рай, отделданул хъунаману. Аьралий пиша язи бугьавумур, ттул буттауссу Сагим Сулайманов аьраличу ия. Ва ххуй ивзун кIункIу хьунав. Цамур пиша язи бугьан дакIнинмагу къабагьуна. Пашманнугу акъара.
– Буси кулпатраягу.
– КIива душ, ца арс бур. Ппу колхозрал председательну зий икIайссия, ччяни лавгуна дунияллия, 54 шинаву. Нинугу сагъну дакъассар. Ссу Астраханнай бур. Ца уссу Новолакрай, ккар­ччал хIакинни. Дянивма уссу, лачIун уклакисса кIанай оьзру хьуну, ивкIуссар.
– Ина ТтурчIиял шяравун ивссарав?
– Ивссара цал, самолётрай. Шяраваллил лагма увкссияв. Жу ттигъанну, ТтурчIиял делегация, бивру Лакрал райондалул хъунама Юсуп МахIаммадовлучIан, ТтурчIиял шяравалу Дагъусттаннал культуралул ирс-ххазиналул сияхIравун дутансса даву дува тIисса тавакъю буван. Ва жул мурад барлаганхьуви тIий ура.
– МВД-лул бак1читурава винна цуманай дакI дакьайва?
– Генерал-лейтенант Ма­хIаммад Аьбдуразакьов ия лахъсса культура дусса, хIалим­сса, хIатта сержант кабинетра­вун уххарчагума, лавай ивзун хьунаакьайсса. Адил­герей МахIаммадтIагьировлуя ххуйсса бакъа учин къахьунссар, чувшиву дусса ия, сивсусса, вас-ццах ба­къасса. КIинналлагу дия кьиматрайсса хасиятру.
– СВО-лул хIакъираву ци учинна?
– ТIайламур бусан, СВО байбишайхту, ттун ччяни къуртал хьунсса ххива, нюжмардул дянив ххит буван ххива тай. Арс зий уссар Москавлив ккарччал хIакинну, таналгу цIувххуна, на аьралий инсан ухьувкун: «Цуксса лахъи лаганссар?», – куну. Ца нюжмардул дянив тIулуйн буцинтIиссар учав. Арсгу икIай утти: «Чун дирну дур тти му вил нюжмар?» – тIий. Лахъи лавгунни, жунма чIалай бурхха чIявусса кьатIаллил билаятру, тайннал чул бувгьуну, кумаг буллай бушиву. Амма букъавну битан шайсса иш бакъая му спецоперация, Аьрасат кьянкьану бацIлай аьдатссар.

Ихтилат чивчуссар
ПатIимат Рамазановал