МахIачкъалалив Лениннул комсомолданул цIанийсса паркраву хьунни щаллагу дунияллул халкьуннал дянивсса «КIяла Кьурукьирттал байран», Расул ХIамзатовлул литературалул фестивальданул дайдихьу.

Гьашину фестиваль 38-мур хъанай дур, цурдагу хас дурну дия Дагъусттаннал Чичултрал союз хIасул хьуну 90 шинан. Шаэрнан 101 шин хъанахъисса кьини ванал бюхттулсса цIанил хIурмат буван бувкцириннавух бия ХIукуматрал хъунама Аьбдулмуслим Аьбдулмуслимов, Аьрасатнал Чичултрал союзрал хъунама Николай Иванов, Дагъусттаннал БакIчинал ва ХIукуматрал Администрациялул хъунама МахIач Оьмаров, МахIачкъалаллал мэр Юсуп Умавов, къуллугъчитал, чичулт, жяматийсса ишккаккулт.
Фестиваль тIитIлай, премьер-министрнал кIицI лавгуна паркравусса Сал­латIнал гьайкалданучIа фестивальданул дайдихьу дуваву аьдат­равун дагьну душиву.
– Расул ХIамзатовлул цалла цIакь дурсса аьдатрайн бувну, гьар шинах сентябрь зуруй жува шаэрнал дустал, уртакьтал кьамул бувару жула аьрщарай. Ва фестиваль Аьрасатнал Чичултрал дахIаву цIакь дуллалисса, чIяву миллатру бусса литература хьхьичIуннай дуллалисса даву шай», – увкуна ванал. Николай Ивановлулгу кIицI лавгуна, Аьра­сатнал чичултран личIинура ххирашиву ва фестиваль, гъирарай бучIайшиву Дагъусттаннайн. Дагъусттаннал Чичултрал союзрал председатель Марина Колюбакинал, Расуллул ва Аьрасатнал цIарду мяъна гъансса махърур, Расуллул аманат бувссар Аьрасат буруччин, ппухълуннал ва ттаттахъал кунма буруччин жагьилтуралгу буржри, так душман зул дакIурдичIан гъан къахьуннав, куну. Палестиннал ПаччахIлугърал вакилханалул маслихIатчи ва шаэр Абдалла Иссал Аьрасатнавусса Палестиннал вакилнал цIанияту барчаллагь увкуна республикалул хъуниминнахь, иширайну цалва агьулданул чIарав бацIаврихлу. Непаллаясса шаэр Сантош Кумар Покхареллул бувсуна Непаллал Катманду хъуншагьрулий Расул ХIамзатовлул бюст бацIан бувантIишиву. Вара кьини Аьбдулмуслим Аьбдулмуслимов, Зарема Буттаева, Николай Иванов, шаэрнал душ, Изобразительный искусствардал музейрал директор СалихIат ХIамзатова хIаласса делегациялул Расул ХIамзатовлул гьаттайгу, гьайкалдануцIгу тIутIив дирхьуна.
Вара кьини МахIач­къа­ла­ливсса Поэзиялул театрдануву Аьрасатнал поэзиялул вечер хьуна.
Хъирив кьини Москавлия, Донецкалия, Калугалия, Белоруссиянава, Непаллая, Азирбижаннава, Астраханная, гьаннайсса, чIявусса шагьрурдая ва кьатIаллил билаятирттая бувкIсса хъамал бивуна Хъунзахъиял, Гъуниннал районнайн ва Дарбантлив. Шаэрнал ватандалийн ЦIадав хъамал бивуна ХIамзат ЦIадассал цIанийсса Музей-къатлувунгу. ЦIадавсса мероприятиярттай гьуртту хьуна Дагъусттаннал Чичултрал союзрал лакрал литературалул секциялул хъунама Супиян Оьмаровгу.