Сентябрьданул 7-нний ДР-лул ХIукуматрал председатель Аьбдулмуслим Аьбдулмуслимовлул дайдирхьунни ДР-лул БакIчинал завардансса хIукуматрал идарарттал дянивсса мини- футболданул турнир. Бяст-ччаллу най бия МахIачкъалалив «Труд» стадиондалий 2 кьини.
Сентябрьданул 7-нний ДР-лул ХIукуматрал председатель Аьбдулмуслим Аьбдулмуслимовлул дайдирхьунни ДР-лул БакIчинал завардансса хIукуматрал идарарттал дянивсса мини- футболданул турнир. Бяст-ччаллу най бия МахIачкъалалив «Труд» стадиондалий 2 кьини.
Цалчинмур кьини хьуна командарттал отборочный тIуркIурду, кIилчинмур кьини хьуна бачIифиналданул тIуркIурду, финалданул тIуркIу ва ххув хьуминнан наградартту дулаву.
Турнир дайдишин хьхьичI вичIи дирхьуна Аьрасатнал ва Дагъусттаннал гимнардах.
Яла бяст-ччаллах тамаша бан бувкIминнахь ва гьурттучитурахь аьла- ссалам бувна Дагъусттаннал премьер-министр Аьбдулмуслим Аьбдулмуслимовлул:
– Дагъусттан Республикалул бакIчи Сергей Меликовлул, ХIукуматрал ва Халкьуннал Мажлисрал цIанияту аьла-ссалам буллай ура циняв бавтIминнахь. Физкультуралул ва спортрал инсантал цачIун буллалиссар. Футбол тIурча, хъанахъиссар ца яла чIявусса инсантал гьуртту шайсса тIуркIуну, ванил хъуннасса социал мяъна дуссар инсантал цIуллу-сагъсса оьрмулийн кIункIу буллалисса, – куна Аьбдулмуслимовлул.
Ванал мукунма бувсуна Дагъусттаннай спорт лядуккан даврих муданна хъуннасса къулагъас дуллай бивкIшиву. Ва турнирданий командарттал дянивсса бяст-ччаллаяр ххишала дия оьрчIан дялахърулул программа.
Аьбдулмуслим Аьбдулмуслимовул тIимунийну, турнир хьуна лавайсса даражалий.
– КIулли ва турнирданийн оьвкуну бушиву СВО-лул гьурттучитурайн ва вайннал кулпатирттайн. На вайннахьгу аьла-ссалам буллай ура, барчаллагьгу тIий ура хIакьину вай жущала бушиврухлу, – куна премьернал.
Региондалул премьер-министрнал барчаллагь куна турнирданул сакиншинначитурахь – ДР-лул Экономикалул министерствалухь ва Спортрал министерствалухь, гьурттучитуран чIа куна тIайлабацIу. — Яла гуж бумур команда ххув хьуннав! – куна ванал.
Сайки 20 команда дарчIуна 4 группалийх, вайннан ккаккан бувна муттаэтал, тIуркIурдал чIун ва майданну.
Хъиривмур кьини, сентябрьданул 8-нний, хьуна финалданул тIуркIу. Ххув хьуминнан ва призертуран наградартту дуллуна Аьбдулмуслим Аьбдулмуслимовлул.
Турнирданий ххув хьуна Аьрщарал ва хъус-хъиншиврул министерствалул команда. Ванил капитан ур министрнал хъиривчу, Хъусращиял шяравасса Эмил Ттаттаев. КIилчинмур кIану бувгьуна ТIабиаьтрал луртаннал ва экологиялул министерствалул командалул. Шамилчинмур кIану – ДР-лул БакIчинал ва ХIукуматрал Администрациялул командалул.
ХI. Аьдилов.
