ЦIуссалаккуй хьусса дяъвилул инсантурайн, гайннал ужа­гъирттайн ва хъус-кьинилийн биян бувсса щавщилул лахъаву цукун дуллай бурив, лихъачултран кумаг цукун хъанай бурив кIул бан, уттигъанну жу хьунабавкьуру Дагъусттан Республикалул Халкьуннал Мажлисрал председательнал заместитель Каммаев Арсен Оьмарил арснащал.

-Арсен, дяъвилул биян бувсса зараллу лахъансса арцу итадакьинтIиссар хъус-кьини дяъвилу­хьхьун дирирсса гьарцагу инсаннан куну баян бунниАьрасатнал ХIукуматрал вакилтурал. Ми арцу дуллай бурив, дуллан тIий бурив, юхссагу му ирглийсса оьванма буллусса махърив, тагьар цукунсса дур?
-Дяъвилул биян бувсса заралданул лагру кIул дан, кумаг бан аьркинсса инсантуралгу, лахъаву дан аьркинсса хъуслилгу ккал дан, сияхIрайн ласун, ва цинявппа му иширацIун бавхIусса масъалартталсса буллан, Дагъусттан Республикалул паччахIлугърал комиссия сакин бувну буссар.

Му комиссиялул ЦIусса­лаккуй, дяъвилул цIарахьхьун дирирсса цинярада щархъавух бувккун, ххал бувссар дяъвилул биян бувсса зарал. Му заралданул лагругу кIул дурну, аьркин­сса документругу щаллу бувну Москавлив гьан бувссар. Москавлия бувкIун буссия Аьрасатнал ХIукуматрал комиссия, жура дурсса даву тIайлану дурив ккаккан, жура тIалав дуллалисса арцунсса зарал бивну бурив ягу бакъарив ккаккан. Москавуллал комиссия жура дурсса жямирдай рязий хьунни ва жура тIалав дуллалисса арцу дулун ккаккан дунни.

-Ци чIалачIи буври комиссиялул?
-Комиссиялул чIалачIи бунни 1000 къатта бомбардал ва ттупал ххит бувну, бухва лаган бувну бушиву ва бакьин бан шайсса даражалий бакъашиву, 2000 къатта бур капиталнайну, ягу дянивну бакьин бувну заллухъру ялапар хъанан бюхъансса. Хъунмасса зарал бивну бур газрал хозяйствалун, токран, ххуллурдан, щинал ххуллурдан, хъу-лухччинун, ризкьи-кьинилун, агьалинал хъуслин, кьай-кьуйлин, ливтIуну бур инсантал. Вайннухгу гьарзадрах багьа булун аьркинни, вай цIуницIа ччаннай дацIан дан аьркинни. ЦIана цалсса дяъвилул биян бувсса заралданун Дагъусттаннал ХIукуматрал чулуха 25 азарда къуруш кулпатран хIисаврай дуллан ккаккан бувну буссар. ЧIал къавхьуну Аьрасатнавасса арцугу дачинссар.

-Дяъвилуву, апатIраву яла къия дияйми, яла аьзият шайми мюрщи оьрчIру бикIай. Ва ххуллухгу хъунмур къия мюрщултрай дия. Ми бия яла язухъну ливчIми. Цукунсса дур цIана ЦIуссалакрал оьрчIал тагьар, зун бивкIрив щархъаву школарду?
-Райондалийсса ряхва школалун хъунисса зараллу бивунни. Яла хъунмур зарал Гьамиящиял шяравусса школалун бивунни. КIива школа башттан лекьа-пIякьу хьуну бур, Аьхъаравсса школа ччувччуну бур, Новолакрайсса ца школа лекьа-пIякьу хьуну бур. Анаварсса мутталий тIаннул щитIирттая батIайсса школа бацIан бувну, оьрчIру дарсирдайн занази бан багьлай бур. Зарал бивсса ряхвагу школа октябрь зурул бачIи хьуннин чара бакъа капиталнайну цIу лаган бан аьркинссар. Новолакрайсса ца школагу , Чапаевкалийсса школагу ччяни бакьин бан бюхъансса тагьарданий бур. Миккун кIира сменалий бю­хъайссаксса ччяни оьрчIру занази бансса чаранну ляхълай бу­ссар. 800 оьрчI Новостройрай­сса школалийн дарсирайн занази бантIиссар. Миккун циняв шяраваллава дуклаки оьрчIру биян буллан Дагтрансуправлениялул автобус буллунни. ХIасил, оьрчIал дарсру къаличIан шай­сса хIарачатру буллай буссар.

Школардалсса баврицIун, мадарасса даву щириркIуну дуссар дяъвилул хIахI щусса шяраваллаву кIинттулнинсса хIадуршинна дуллай. Райондалий циняв идарартту зий бу­ссар. Ток бакьин бувну, райондалул циняр щархъаву чани бу­ссар. Газрал бургъурдугу бакьин буллай буссар, амма газралмур тагьар захIматну дур, бюхъай кIи дучIаннин газ бакьин бан къахьунгу. Мунияту райондалийн балоннайсса газ ххилаххи бувну буссар, кIинттул инсантурал ужагъру гъели буллан тIама, хъуручI тIалав буллай буссар. Дяъвилул хъунмасса щавщи биян бувунни райондалул транспортрангу. Тамансса машинартту, ччувччуну ккуллардал ккутIа-вярчIари бувну зия хьунни, цаппара машинартту дяъвикартурал бувцуну лавгсса ишругу хьунни. Мунияту район транспортрал щаллу даврил масъалагу буссар хIукуматрал я-итталу. Райондалул больницалун кIива машина буллуссар, мукунма буллуссар машинартту милицанан ва собесран.

-Больница зун бивкIс­сарив?
-КIулсса куццуй, ЦIуссалак­рал райбольницалул хIаят лекьа-пIякьу дурну дур, дакьин дан къахьунсса журалий. Лахъай азардал корпус бюхъай бакьин бан бюхъангу. ЦIанасса мутталий зузи бувну буссар поликлиника. Му зий буссар бытовой комбинатрал къатраву. Аьркинссаксса даруртту бур, дакъамур анаварну щаллу дуллай бур, мунил чулухунмай буруккин бакъар. Больница тIурча, зун бувар. Вай гьантрай хIукму бантIиссар мунин сагъну лирчIсса хIаят дакьин дан дурив ягу цIусса дуллан дурив. Мунин аьркинсса 100 койкалунсса кьай-кьуй хIадурну дуссар. Вай гьарзадрал хъирив бизлай, вай щаллу дан кумаг буллай тамансса инсантал буссар. Цумур идаралий, цума къуллугъчиначIан гьарчагу, анаварсса мутталий гьаз був­сса масъала щаллу бан цинявннал хIарачат бай, барчаллагь хьуннав цинявннан. На ляличIинува кIицI бавияв Амуттинов Амучи Михайловичлул буллалисса бази хъиривсса хIарачат. Амучи Амуттинов хIукуматрал чулуха ЦIуссалакрал масъалартту щаллу буллан ккаккан увсса жаваблуври. Мунал хъунмасса захIмат ва хIарачат бивхьунни дяъвилул лиян дурмур анавар­сса мутталий дакьин дан, ччаннай дацIан дан. Республикалул хъуниминнал хьхьичI кьянкьану масъала бишай ва му щаллу бувансса чаранну лякъай Амучи Амуттиновлул. Дяъви хьусса гьантрайгу Амучи гийх, ЦIуссаккулув, штабрал хъунаману уссия. Гийхгу дяъвилул цIараву сивсуну ва кьянкьану штабрай каялувшиву дунни мунал. «Илчи» кказитрайхчин на Амуттинов Амучихь щала ЦIуссалакрал жяматрал чулухату хъунмасса барчаллагь учин ччай ура.

-Цинявннан кIулли чIяву-чIявусса инсантурал ва идарарттал, хаснува жула лакрал, республикалиягу, республикалул кьатIатугу дяъвилул щавщи бивминнан тамансса кумаг бувшиву ва буллайнма бушиву. Амма лихъачултращал гъалгъа булларча, ми кумагран дукIлакIимур гайнначIан къадиллалисса кунна чIалачIисса тагьар дур?
-ТIайламур бусан, хаснува цалчинсса гьантрай, кумагран дукIлакIисса хъуслин кьянкьасса низамрайсса хIисав дачин дурну дакъая. КьюлтI къабанна, ми кумаграл сияхI дуллай, жям дуллай, миннуя бутIа-бачIу буллай дакI ва кару къамарцIссагу инсантал хIала бувххун бия. ТIайласса хIисав-ккал дачин дурну дакъая. Инсантурал оькьи­нилий авадан хьун ччиссагу бивкIун бия. Гийхсса дяъвилулсса буллай, кумагиртталсса буллан, ми аьркинначIан диян дуллан ка хъирив лаллай дакъая. ЦIана му масъала низамрайн бувцуну буссар, райондалул администрация ,гьарца дукIлакIимунил хIисав-ккал дурну, ми аьркиннайх дачIлай буссар. Минная кьянкьану дурмунил жаваб тIалав дайссар. Бур цаппара инсантал ,циксса тIайлану бутIа-бачIу булларчагу, цуксса хъунмасса бутIа цанма бириярчагу, таманалмур хъунману чIалай, рязий бакъассагу. Ми тачIав рязий къашайсса хасиятрал заллухърур, ми гьарца кIанттайгу чан къашай. Кумаг хъунмасса най бунугу, цинявннал гьарца тIалавшинна щаллу дансса, цинявннан диял хьун­сса хъус жучIара дакъар. Мугу бувчIин аьркинни. Дяъвилу­хьхьун биривсса, думуницIа хьуну ливчIсса, ца гьантлул мутталий ачIа-кIачIана ливчIсса инсаннайгу аьй цукун данссар, миннайсса къия ва оькьини жунна чIалай дур. Амма ссавур дан аьркинни. Оькьини дуркминнал тIалавшинна щаллу дан Республикалул ПаччахIлугърал совет, ХIукумат, Халкьуннал Мажлис шайсса хIарачат буллай буссар. Мури хIакьину яла хъунмур масъала.
Кумагирттая гъалгъа багьувкун, на барчаллагь учин ччай ура цащава бюхъайсса кумаг бувну, чIарав бавцIусса цинявппа лакрахь. Цу ци тIурчагу, лакрал ккаккан бувссар ва ишираву жува оькьини дурккукун цачIу бацIангу кIулсса, цаннал ца бувгьусса миллат бушиву. Хъуни-хъунисса кумагру бувунни Аьра­сатнавасса лакрал ишбажаранчитурал. Масъала, Къюллул ЦIувкIратусса Москавлив ялапар хъанахъисса ишбажаранчи МахIарамов Аьбдуллул кIива миллион цIусса арцунсса кумаг бунни. Хъунисса кумагру бунни Санкт-Петербургливсса НицIавкIратусса Исмяиллул, ПаччахIлугърал Думалул депутат МахIаммадов Станиславлул, ЦIалакъяниясса Маммаев Мяммал, Донецк шагьрулийсса, Ростоврайсса лакрал. Ростоврайсса Абачараев Заурдул ва тамансса цаймигу духIин дусса лакрал арамтурал. Райондалий цIусса связь дишин бакIрайн лавсунни жула лакрал генерал ПирмахIаммадовлул, мунинсса харжлугъ Москавливсса лакрал дуллунни кунни. Хъунмасса барчаллагь зун. Зу муданмагу чIарав бацIан бюхълай личIаннав!

-ЦIуссалаккуйсса тагьардания ина бувсунни. Ссайн дирну дур Новостройрайсса давуртту?
-Дяъвилул хIасул дурсса тагьар сававну Новостройрайсса давурттугу анавар дуккан дурссар.
Октябрь зурул ахирданийнин Новостройрайсса цинярда щархъавун газ буцинтIиссар, щин сайки дурцуну дуссар. Ва шинал ахирданийнин ттинин бувминнуцIун цIуну шанттуршва къатта бувну, инсантурахьхьун булун аьркинссар. Ми бувансса арцу тIалав дуллай буссар, тIалав дуван хьунсса умуд бур. Азарва кулпат бур ЦIуссалаккуй къатри лекьа-пIякьу хьуну ливчIсса, ми хъанахъиссар 3-4 азара инсан. Новостройрай миннан кIи рутансса шартIру чара бакъа дузал дан аьркинссар. Новостройрай школа зий буссар. ОьрчIру, нукIува увкусса куццуй, автобусрай буцайссар дарсирдайн.

-Чачаннал чулуха дуркIсса кьюкьрал чап­ххун савав хьуну, ЦIу­ссалаккуй чачан- аьккиял ва лакрал дянив дагьну дур. Вил пикрилий, цукунсса дикIанссар вания тихуннайсса лакрал ва чачан-аьккиял дянивсса ара?
-ЦIуссалаккуйсса агьалинава сайки 25% чачан-аьккиял буссия. Лак ва аькки нахIуну, бавкьуну ялапар хъанай буссия. Дяъвилул ми кIивагу миллатрал дянивун энад бувтунни. Мунин, гьай-гьай, сававрттугу дур. Цалчин, чапхунчитал чачаннал аьрщарая бучIаву, чIявуми дяъвикартал чачаннал миллатрая­сса бикIаву. КIилчин, Ичкериянал хIукуматрал чулуха, парламентрал чулуха, Масхадовлул чулуха оьри-хъинни, бучIир-къабучIир, рязира-къарязира, хъина-къахъина тIисса чIитI, калима къабаяву, ливтIусса инсантурах, Щурагь къатта пIякь учин бувну ливтIуминнахвагу бусурман аьдатрай жижара къабаву. Укунсса ишру хьувкун захIматри дакI тIайла дан, захIматри сси лялиян бан. Амма муданма дяъвигу, муданма зид ва энадгу къабикIайссар, чIун дакIнин малхIанни, гьарзад цила кIанайн багьантIиссар. Цаппара бучIибакъулт сававну щаллу­сса миллатрай аьй-бювкьу дуллан къабучIиссар. Амма уссу, арс ивкIунан му бувчIин бан бигьа бакъар. Чапхунчитуран кумаг буллалиссагу бия чачан-аьккияву тIий бур. БивкIун бур мукунссагу. Му хъуннасса хаиншивур щалва Дагъусттаннайн дурсса. Ми душмантурал кумагчитал кIул бувну, бувгьуну, миннан кьянкьасса танмихI буван аьркинссар. Амма тIайланма учин, жуламиннавагу бивкIун бур ччарча душмантурал кумагчитал, ччарчагу хъямалашинначитал. Цибанну туну, вацIлуву чакъал чан къашайссар учайхха. ЧIявуминнал тIурча, ккаккан бувссар лакраву талангу кIулсса, нигь дакъасса, виртталсса чиваркI бушиву. Ва ишираву лакрал сий мадара лахъ хьуссар.

Ихтилат бувссар
ХIасан КIуруховлул
№41 «Илчи», 1999 ш.