Рабиоь-л-аввал МухIаммад Идавс (с.аь.с.) увсса барзри, аьдатрайн бувну, бусурман агьулданул ва барз гьан байссар мавлудру дуллай, Аллагьнал Илчинаха санаъру дуллай.

Рабиоь-л-аввал гьашину тIай­лабавцIунни сентябрь зурул мукьуннийн.
Ва цуппагу бусурманнал календарьданул шамилчинмур барзри, хъинну агьамсса, ххирасса барзну ккаллиссар. Рабиоь-л-авваль зурул ялагу хасшивуртту дуссар: Идавсил (с.аь.с.) Маккалия Мадиналив гьижра баву, цалчинмур мизит баву, цалчинмур нюжмар-чак баву ва цаймигу.
Аллагьнал халкьунначIан гьан увсса Идавс (с.аь.с.) увссар рабиуль-авваль зурул 12-мур кьини, 571 шинал, аьрабначIа хъинну сийлийсса Кьурайштурал тухумраву, исламрал диндалул дякюрулун ккалли­сса Маккалив.
Циняв билаятирттайсса бусурманнал ва барз гьан бувай цивппа МухIаммад Идавсил (с.аь.с.) умматрава лявхъуну тIий Аллагьнайн щукру буллай, Идавсил (с.аь.с.) оьр­мулия, хасиятирттая буслай, мавлудру дуллай. Дагъусттаннал муфти АхIмад Апаннинал, республикалул агьали барча буллай, кIицI лавгуна ва мубараксса зуруй МухIаммад Идавс (с.аь.с) бюхттул уллалисса мероприятияртту дуллантIишиву ва Дагъусттан, Аьрасат, щалла дуниял питнардая, оьзрурдая ва балардая буручча тIий Аллагьнайн лабизлантIишиву.
Аллагьнал жула дакIурдивун Идавсихсса (с.аь.с.) ччаву дутIиннав, цIакь дуваннав, Мунал (с.аь.с.) ккаккан бувсса ххуллийх бачин каши дулуннав. Амин!
ПатIимат Рамазанова