Къадал душ Оьмарова Багзанат
Вай гьантрай, цIуцIаврища ххассал къавхьуну, дунияллия лавгунни Къяннал шяравасса ххаллилсса хъамитайпа, Къадал душ Оьмарова Багзанат. Ва бувну бур 1955-ку шинал май зуруй. 1978-ку шиная 1990-ку шинайн бияннин зий бивкIун бур Буйнакскаллал консерварду дай заводрал хъунама технологну.
1990 шинал цила шяравучунан, ПирмахIаммадлул арснан, Яхпардун щар хьуну, Къизлярдайн бивзссия. Вайннал кулпатрал хъуннасса сий дуссия цала жяматрал ва Къизлярдал агьалинал дянив.
Багзанат узданну хъамал кьамул байсса, дакI-аьмал ххуйсса, хасиятрал хъинсса, агьалинащал хIал бавкьусса, хIалимсса, гъанминнай дакI цIуцIисса хъамитайпа буссия. Мудангу чялишну хIала буххайва жяматрал оьрмулуву хъанахъисса иширттавух, хъинмур, ххуймур буван анавар буккайминнавух мудан вагу бикIайва. Дугъришиврул бутIа лавайну буллусса ласнащал архIал ххуйсса тарбия дуллуна арснан ва душвавран.
Ва дунияллия лагаврил кьурчIишиву кIидачIлай, жижара буллай буру ласнахь Яхпардухь, арснахь Оьмардухь, душваврахь Хамислухь ва ХIабибатлухь, вайннал наслулухь, уссурваврахь Марсельлухь ва Артурдухь, ссурваврахь Нураниятлухь ва Минажатлухь, ласнал ляхъиндалухь, цинявппагу гъан-маччацириннахь.
Бунагьирттал аьпа баннав, гьав нурданул дуцIиннав, рухI рахIатний дишиннав, махънал оьрмурду лахъи баннав. Амин!
Къяннал жямат
Дуснал аьпалунсса ххару
Августрай апатIрайнусса бивкIулул аьпалухьхьун лавгунни ххаллилсса зунттал чув, бювхъусса чурххал, иминсса хасиятрал заллу, 2-мур ЦIувкIуллал шяраваллил бакIчи, Аьвдуллал арс Аьбдулкаримов Казбек. Ванал бивкIулул кьурчIишиву кIидачIлай, жижара буллай ура арсурваврахь, щарссанихь, ссурахъихь Сяидлухь, Туказманнухь, цинявппагу маччанахь, шяраваллил жяматрахь. Ванан къабуллумур оьрму зун булуннав. Ххирасса дуснал аьпалун чичлай ура вай зумалул ххару.
ЗахIматрал кьини дучIайсса
Чувтурал бакIрачIанни,
Чувтал хъинми кIул шайсса
Мукунсса кьинирдайри.
ЗахIматсса кьини лахъан
Къашайссар гьарцаннаща.
Инарив му лархъунни
Жяматгу махIрун бувну.
Казбек, ина, жун ххива
КIилчинмур бюхттул зунтту.
Дуниял сукку къархьун,
Левкьуну циван лавгра?
Ххуллулссаннан бигьа бан
Хъун ламу бан бувнахха,
Винмамур шагьра ххуллу
Банма къалявкъуннихха.
Тийх ЦIувкIуллал вацIраву
Ххявхсса чинарданул мурхь,
Гъинттул бувк тIюъпандалул
Мархрава личин бувсса.
Пирдавс алжан булуннав,
РухI ххариний дишиннав,
Винма къабуллу оьрму
Булуннав арсурвавран.
МахIмуд Аьлилов,
ш. СунбатIул
Аьзизсса арснал аьпалун
Августрал 25-нний 2 шин хьунни ГьунчIукьатIрал шяравасса Мусаев Марат МахIмудлул арс ахиратрал хьуну.
ЧIумул хьхьара
къадайсса къюву
ЧIун лаглай, аьрщи лаллай,
Къюву хьхьара шайссар чай,
Ттул дакIнилмур къювурив
ТачIав хьхьара къахьунссар.
Марат, ттул мусил каруй,
Ккаркмур дурну дишайсса.
Щих ялугьлай унугу,
Пиш тIий, хъяйнмасса яруй.
Вил дукъаххай каругу
Тти паракьат хьухьунссар,
Вил дакъацIай ликригу
Дигьаларгун духьунссар.
ЩинчIав нясив къаданнав
Лякьлул оьрчIал дард духIан.
Арснал бивкIу кьюлтIа тIий,
Яру къявхъатIий личIан.
Нину, уссу, ссу
Хъуннасса кьурчIишиву кIидачIлай, жижара буллай буру жула бусравсса шяравучу Аьбдулвагьаб Шяпиевичлухь, ванал ххирасса уссу
МухIад Магьдиев
аьпалул шаврийн бувну.
Имандалий лавгун хьуннав, гьав нурданул дуцIиннав. Махъсса цинявннал оьрмурду лахъи баннав.
Ккурккуллал школалул учительтал
