Сепараторный посёлокрай бугьараминнансса ва мушакъатминнансса «Ветеран» интернатрай (ГБУ РД «Дом-интернат для престарелых и инвалидов) хъунмур медсестрану зузисса Асият Дукиевал оьрмулул ххуллиясса хъуннасса макьала дурккунни «Народная энциклопедия» тIисса журналданий. Ттул шяравудуш, архIал ца классраву дуклай бивкIсса Асият асар хьунну буслай бур буттал шяраваллия, цилва кулпатрая, оьрмулул ххуллия. Асар хьунсса дур ванил дунияллий хъанахъимунихсса ябитавугу.

Кьурбаннул душ Асият Дукиева бувну бур 1967 шинал июль зурул 19-нний Цалчинмур ЦIувкIрав. Ппу, Рамазаннул арс Кьурбан, ссяткар, чIярусса шиннардий зий ивкIун ур Туркманнаву Ташаузскаллал областьрайсса «Рембыттехника» тIисса идаралул хъунаману. Нину, МахIаммадлул душ Соня, ичIаллилсса, оьрчIалсса буллай бивкIун бур, арулва оьрчI бусса, хъунмасса кулпат бухьувкун. Буттал шяраву 8 классгу къуртал бувну, Асият дуклан бувххун бур Ташаузскаллал медициналул училищалувун. 1987 шинал, училище къуртал байхту, Дагъусттаннайнмай занахьуну, ванил захIматрал ххуллу байбивхьуну бур Къизлярдал стоматологиялул поликлиникалий. 1987- 1991 шинал Украиннавун бивзун ласнащал, Харьковрай медсестрану зий бивкIун бур. 1991 шинал Дагъусттаннайнмай занахьуну, МахIачкъалалив 8-мур поликлиникалий зий бивкIун бур, 1994 шинал «Ветеран» тIисса бугьараминнан­сса ва мушакъатминнансса къатлуву медсестрану зун бивкIун бур, цаппара шиннардива – хъунмур медсестрану. ХIакьинусса кьинигу вара даврий зий бур, лараймур категориялул медсестра бур.

Тарбия бувну бур душ Камила, вагу эксперт-криминалистну зий бур. « Пагьламантурал шярава­сса бухьувкун, чIявуссаннан шяравуцири хьхьуттайх лахъаврил магьирлугърахун багьсса ххан бикIай. Ттул ппу, масалдаран,ссяткар ия. Ва лакрал пишари. Хъуннасса ссавургу, ца кIанай щяикIавугу аьркинсса давур. Жул халкьуннаву машгьурну дия хIалтIухъаншиву. Ттул буттангу, хIалтIилий лавгун, Туркманнаву зун багьуна. Инсантуращал авкьусса, бюхъу-бажар бусса ухьувкун, ссяткарная ччя­сса мутталий «Рембыттехникалул» хъунама хьун бювхъуна. ЦIанакул жура китайнал ширпотреб зия шайхту, ци -дунугу гъагъайхту, дард дакъа экьи- личару. Дакьин дуван ххирану дацIансса кIулну. Совет заманнай, техника, багьлул ххиранугу, цIакьсса дикIайва. Инсантуралгу думур аякьалий ядувайва, цIусса машан ласаяр дакьин дуван чялишну бикIайва. Буттангу даву чан дакъая, 7 бакI бусса кулпатраву жу циняв ччаннай бацIан буван, чивун буккан буван хIарачат буллай ия. Утти, чIярусса шинну ларгун мукьах, навагу дуклай бивкIсса, оьрмулухун ппугу зий ивкIсса Туркманисттан, тасса-тарив Дагъус­ттан кунма, ххирасса бивкIшиву ттунмагума макIра кунмасса ишну ливчIунни, бигьану гьангу-бучIангу шайсса билаятнугу къаливчIунни.

Мукунма Украиннаву, Харьковрай хъанахъисса иширттах гьарца кьини вичIи дишара телевизорданух. Нава зий бивкIсса шагьрулий тукун кьурчIисса ишру хъанай бушиврул дакI зия хъанан дикIай. Жулва ппухълуннал захIматрай гьаз хьусса, бюхттулсса державану бивкIсса Совет билаят пасса-пархари бунни, дусшиву дусса, чIявусса агьлу бавкьуну, нахIуну яхъанахъисса билаят иттав къалану чIалай бивкIминнал мурдалсса мурад щаллу хьунни.
На чIярусса шиннардий зий бура кумаграх мюхтажсса, ялгъуз­сса, мачча-гъаннал кьабивтсса агьали яхъанахъисса идаралий. Цуксса жул коллектив лавай бавцIуну, хIурматрай бухьурчагу, ичIаллил кьанкь личIиссар, ичIаллил гъилишиврул хIахIлищал цичIав къалаяйссар. ЦукунчIав къаччива ца билаятну бивкIсса, тарихраву цашиву ккаккан дурсса ва цIакьну бавцIусса СССР-данул кьадаргу жул идаралувун багьминнал кунмасса хьуну!» – чичлай бур Асият.
«Курскаллал чулух аьратталсса ишру бур вай гьантрай. Дагъусттаннай, хасну МахIачкъалаливгу, махъ ппурттуву къаххуйсса ишру хьунни, терактру, питнарду, къалма­къаллу. Куннан кув къабувчIавуртту дур дин дуллалиминнал дянивгу. Жува яхъанай буру жулва вирттал­сса ппухълуннал, ттаттахъал жунна аманат дурсса бюхттулсса, цIакьсса, цIа дурксса билаятрай.

Билаятрал ялун бучIантIимур хъарну бур цIанасса никираща жулва билаят кьатIату жула ялун дучIан бюхъайсса ва билаятрай яхъанахъиминнал чулухасса нигьачIавурттая буруччин бюхъаврия, жущава цинявннаща цачIу жула жагьилсса ник буттал кIану, буттал билаят, аьрщи, тIабиаьт ххирану тарбия дуван бюхъаврия. Жулва щалвагу билаятрай жула наслулул гихунмайгу оьрму бутланшиврул, мукунсса мурад жущава бартбигьин багьлай бур, кьянкьану бацIан аьркинсса чIунну дуркIун дур. Гьарма цува зузисса кIанай хIарачатрай зун багьлай бур».

Ванил мудангу кIицI лагай, «Ветеран» идаралул директор Мажид Мирзаев бюхъу-хIарачат бусса, цувагу жаваблувшинна дусса, тIалавшинна дуну зузисса каялувчи ушивугу. «Гьарцагу жучIавасса инсаннал дакIнивун бухханну, гьарманан цува учIину ушиву асар хьунну зун хIарачатрай буру. Оьрму му яла хъунмур ххазинар. Вай чарабакъул жучIан бувкIсса, ичIувацирив сававну багьсса агьлу бур. Жу вайннал дакIру тирх учинмур буллан аьркинссару, ца мурцIувагу вайннан тIивтIусса бикIаншиврул», – тIий бур Асият.
Асиятлущал жу ччя-ччяни хьунабакьару, ккаккару, жун кIулссар чIявуми ванил къари-къужри, хIатта дунияллия лавгмигума. КIулссар цума ци гьунарданул ва ци хасиятрал заллу уссарив. Циван чирча, Асиятлул хаварду бикIайсса чIявуну цачIавасса къари-къужраяр. Ца-цал жу ванийн дяъвангуру бикIайсса, вилва къари-къужраха дуниял хъамадиртнува бикIаннав, цайми хавардугу буси тIий. Хаснува кьурчIи бизлай бикIай ванин лак цачIанма багьарча. Ваца къабикIан багьлагьисса иш кунма кьутIай учай. Гьай-гьай, ванил биялсса хIарачатгу бувайссар оьрчIал ва нитти-буттахъал дянивсса нахIу дакъашиву духлаган дуван, маслихIат буван. Ваних вичIидирхьукуннив буниялттунгу бувчIлан бикIай, цукун дакI ххуйсса, чумартсса инсантал бикIан аьркинссарив ялгъузсса, инжитсса инсантурал къайгъурдал гьиву хIура къадурну ва кIу къадирзун зузими ва яхъанахъими. Учарухха, цIуцIи шанийн къабагьаннав, багьувкуннив, цIимилул чувначIан багьаннав, куну.
Жул Асият ва ванищал ар­хIал зузими багьай ххуллий укун­минначIан багьаннав куну щукру буванми бур. Ва ялагу, Асият цу­ппагу гьарца чулуха итххявхсса, дунияллул литература, тарих ххуйну кIулсса, гьармуния хавар бусса, чантI увкусса душ бур, мяйжаннугу миллатгу ххирасса, миллатрал бучIантIимунийгу дакIцIуцIаву дусса. Ванищал ихтилат буваврийну дакIурдил дуниял авадан дуван, ванил бусласимуних вичIи дишин мякьнува бикIару. «Ветеран» интернатрай архIал зузимигу, кьадарданул ва интернатрайн бувцумигу жу кунма тIий бур.

ПатIимат Рамазанова