![](https://ilchi.info/wp-content/uploads/sites/11/sites/11/2024/08/img_0691.jpg)
Уттигъанну Москавлив хьусса Cтритлифтинграл дунияллул первенствалий
цалчинсса кIану бувгьунни ЧIурттащиял шяравасса Зубайр Хасаевлул.
Уттигъанну Москавлив хьусса Cтритлифтинграл дунияллул первенствалий цалчинсса кIану бувгьунни Къабардин-Балкьарнал Виваллил иширттал министерствалул жагьилсса зузала Зубайр Хасаевлул. Ва Къабардин-Балкьарнаву ялапар хъанахъисса жула лаккуоьрчIри. ЧIурттащиял шяравасса Маликлул ва Маринал арсри. 29 билаятраясса 3600 спортсмен гьуртту хьусса бяст-ччалливу жула лаккуоьрчIал цалчинсса кIану бугьаву хъунмасса ишри. Зубайр ххув хьунни 23 шинал оьрмулувун бияннинсса спортсментурал дянив. Перекладиналий гьаз шавриву (25 килорал кIушиврущал) ванащал лаянсса къавхьунни.
Зубайрдуя жу хьхьичIвагу чивчуссия. Ванал ва цалчинсса ххувшаву дакъар. Виваллил иширттал органнаву лайкьну къуллугъ буллалаврицIун, ва спортравугу хьхьичIунну уссар.
Зубайр цалчин увкIун ур Баксаннал олимпий резерврал школалийн 2011-ку шинал декабрь зуруй лачIун буккаврил спортрахун агьан ччай. Аьрасатнал лайкь хьусса тренер Николай ЗакураевлучIа вардиш хъанай чIирисса чIумул дянив личIи-личIисса турнирдай ва чемпионатирттай ххув хьуну, оьрмулул 13 шинаву спортрал мастер хьунсса нормативру щаллу дурну дур. Стритлифтинграхун Зубайр агьну ур 2021-ку шинал ахирданий.
– Сайки гьарица хIаятраву, спортплощадкалий дикIай турникру. Хасну залданувун, тренерначIан къазанайна, ттуйнува нава вардиш хьун шайсса бунутIий ххуй бивзунни ттун ва спортрал жура. Ттула хIал ххал бан куна вардиш хъанай ивкIра. Му чIумал соревнованиярттай гьуртту хьунсса пикривагу бакъая, – тIий ур спортсмен.
Ларгсса шинал март зуруй республикалул турнирданий ххув хьуну, ва цалчин агьну ур Ставропольлай хьусса Аьрасатнал чемпионатрайн. Шиккугу цалла кIушиву дусса спортсментурал дянив цалчинсса кIану бувгьуну, стрифлинграл Дунияллул халкьуннал дянивсса федерациялул оьвкуну бур Зубайрдуйн Дунияллул первенствалий гьуртту хьун. Шиччагу ххувшаврищал занахьуну ур. Уттигъанну ванан дуллунни «Международный классрал спортрал мастер» тIисса бусравсса цIагу.
Зубайр ххувшаврищал барча унни Къабардин-Балкьарнал виваллил иширттал министрнал. Дуллунни ванан арцуйнусса бахшишгу. Зубайрдул сурат лархъунни республикалул МВД-лул ХIурматрал улттуйн.
Спортраву акъассагу, цала пишалул ххуллийгу ва хьхьичIунну ва бусравну ур. Полициялул органнаву зунсса хиял ванан оьрчIнийва бивкIун бур. Мусил медальданий школагу къуртал бувну, увххун ур Краснодардал Виваллил иширттал академиялувун. Вагу ЯтIул дипломрай къуртал бувну, 2022-ку шинал зун ивкIун ур участковый уполномоченныйну. Зубайр ур ва пиша цанма агьалинащал хIала-гьурттусса, инсантуран кумаг бан шайсса бунутIий ххуй бизайва тIий. Зий хъунма хIал къавхьунугу, цала биялдарайсса Атажукино тIисса шяравусса 3 азарунния ливчусса инсантурал дянив ва бусраврай ва хIурматрай ур. Давриягу, спортрал иширттаягу мажал биривсса чIумал, Зубайрдун ххирар психологиялул темалийсса луттирду ккалан. – Полициялул зузалан инсаннал хасият, тIул-тIабиаьт дурчIин, ганащал гъалгъа тIун кIулну бикIан аьркинссар, – тIий ур полициялул лейтенант.
Шиккува кIицI лаган, Зубайрдул мюрщими уссурвалгу ва цува кунма спортраву итххявхсса бур. Салим ур армрестлинграл чемпион, цувагу кIирагу ка дирхьуну ххув хьуну ур. ЧIина-чIивима уссу Муталис Зубайрдул цала вардиш уллай ур. Ванал оьрмулул 9 шинаву Аьрасатнал чемпионатрай ххув хьуну, чIивисса оьрмулуву спортрал мастер хьунсса кандидатнал цIа ларсун дур.
Ва хъинну итххявхсса оьрчI ур. Ваная жунма уттигу чIявуну баянссар тIий бура. ТIайлабацIу баннав гъурбатрай лакрал цIа гьаз дуллалисса жула оьрчIан.
Андриана Аьбдуллаева