ЦIуминалий хьунни исламрал дин лахьхьин заназисса оьрчIал гъинттулсса курсру къуртал шаврицIун дархIусса байран.

– Жулва оьрму наниссар оьрчIаха аякьа дуллай, жулва оьрчIру талихI буну хъуни хъананшиврул ва яхъананшиврул жущава шаймур буллай. ХьхьичI ирглий жунна кIулну дикIан аьркинссар оьрчIру исламрал ххуллу-ххуттайх нанисса тарбия дулаврил агьамшиву. Гъинттул­сса курсругу, цайми журалул мероприятиярттугу жува дуллалиссару оьрчIан ххуйсса тарбия дулаву мурадрай. Тарбиямур цIакь дуллан аьркинссару ичIура. Нитти-буттахъал чара бакъа цIуххаван аьркинссар оьрчIахь, зун ци лахьхьин буври, ци лахьхьарду куну, – увкуна оьрчIан Барчаллагьрал чагъарду буллай ЦIуминалийсса имам Мансур Хаваевлул.

ДакIнин бутанна, гъинттулсса оьрчIансса курсру Ла­ккуйсса циняв мизитирттавугу бивкIшиву, июнь зурул 3-нния август зурул 15-нийн бияннин. Нюжмардий 5 кьини – Гъумук, ШавкIрав, Ваччав, цаймигу шяраваллаву, ЦIуссалаккуйсса мизитирттаву оьрчIру диндалул гьанурду лахьлай бивкIшиву.

ПатIимат Рамазанова