Вай гьантрай ХьурукIуллал шяравасса Жабраиллул арс Кутиев Гъазил хьунадаркьунни 90 шинал юбилей.
Кутиев Гъази Жабраиллул арс увссар 1934 шинал августрал 25-нний. Цал буттал шяраву, хъирив Гъумук дуклай, ларсъссар дянивмур даражалул кIулшиву. Яла къуллугъ бувссар Совет аьралуннал кьюкьраву. ОьрчIнияцIа бигьа бакъасса оьрмулуву давуртту дуллай тарбия хьусса оьрчI спортрахун машхулну уссия. Шяраву, райондалий хъанахъисса спортрал бяст-ччаллаву Гъазинал чялишсса гьурттушинна дайссия.
Цалнияр цал спортрах гъира гьаз хъанахъисса Гъазинан цала оьрмулул язимур ххуллунугу спорт чIалан диркIувкун, Москавлив Тренертурал хасъсса спортрал школа къуртал бувну бур.
Мунияр махъри Гъази айивхьусса Избербаш шагьрулий спортрал давурттай зий. Шагьрулул жагьилтал лагма лаган бувну, спорт хьхьичIуннай дувансса бюхъу-пагьму ванаву чIалай, шагьрулул горкомрал ва ивтссар атлетикалул тренерну, муницIуна школардай физкультуралул дарсругу дихьлай ивкIссар.
1953-1969 шиннардий ванал спортраву хъунисса хьхьичIуннайшивуртту дурссар. Тай шиннардий ванал цимилагу цалчинми кIанттурду бувгьуссар СССР-данул лагрулий дуллалисса, волейболданул, чIатIаракI ритаврил, ттупанг битаврил хъунисса бяст-ччаллаву, Дагъусттаннал призер хьуссар цимилагу. Гъази лайкь хьуссар «СССР-данул спортрал мастер», «Дагъусттаннал физкультуралул лайкь хьусса зузала», «Дагъусттаннал лайкь хьусса авчи» тIисса цIардан.
Пенсиялийн укканнин ва зий уссия Избербаш шагьрулул администрациялучIасса Жагьилтурал, спортрал, туризмалул иширтталсса байсса комитетрал председательну.
Дуллалисса давурттаву хIарачат бусса, бакIрайн лавсмур бартбигьайсса Гъази мудангу хъиншиврийн, тIайлашиврийн кIункIу тIий ур.
Гъазинал спортраву бувсса хIарачатрахлу дуллусса бахшиширттал сияхI хъуннар. Ва Лакку билаятгу, буттал шяравалугу, миллатрал мазгу хъинну ххирасса лаккучу ур. Ванал «Илчи» кказитращалгу дахIаву дур.
Ванал, хъиривлаявуртту дурну, итабавкьунни «Хурукра и хурукринцы» тIисса ххаллилсса шанма лу.
Гъази яла хъунама арс ур кулпатраву, ва эбратран ивхьуну хъуни хьуну бур 2 ссу ва 2 уссу. Уссурвал аьпалул хьуну бур, ссурвал Избербаш шагьрулий яхъанай бур.
Ванал уссу Казбек зий уссия Буйнакскалив, хирургиялул отделениялул хъунаману. Яла ва ивзуна МахIачкъалалив, шиккугу ххуйсса къуллугърай уссия. ЧIивима уссу Зурпукьал Избербашрай физкультуралул учительну, яла школалул директорну зий уссия хъунмасса хIаллай.
Инсаннал оьрмулуву яла агьаммурну бур кулпат. Гъазинал кулпат Сабират бур хъинну ххуйсса инсан. Вайннал бур 4 арс, 1 душ, вайнналгу бур оьрчIру. Вай оьрчIругу, ххуйсса тарбиягу дуллуну, тIайласса ххуллийн буккан бунни. Шама арс ур яхъанай Избербашрай, ца – Ставропольлай, душ бур зий Москавлив. Гъазиная ва ванал кулпатрая бусларча, 10 луттирансса хаварду хьунссар, цIуллу бивухъул.
Жун, мачча-гъаннан, зу хъинну ххирассару. Дак1нийхтуну барча т1ий буру Гъазинахь увсса кьини, чIа тIий буру цIуллушиву ва тIайлабацIу.
ХьурукIуллал жямат
