Августрал 10-нний Дагъусттаннал хъуншагьрулий дунни Щалагу Аьрасатнал Физкультурникнал кьинилун хас дурсса «ЦIуллусса нация» тIисса Cпортрал фестиваль. Мероприятиялул сакиншинначиталну бия МахIачкъалаллал администрация ва ДР-лул Физкультуралул ва спортрал министерство.
Спортрал фестиваль тIитIаврий гьуртту хьуна ДР-лул спортрал министрнал хъиривчу, Олимпий тIуркIурдал чемпион ХIайдарбаг ХIайдарбагов, МахIачкъалаллал шагьрулул Депутатътурал собраниялул председатель Марис Илиясов ва цаймигу.
Марис Илиясовлул бавтIминнахь барча дурна Физкультурникнал кьини МахIакъалаллал мэр Юсуп Умавовлул цIанияту.
Фестиваль дайдирхьуна шагьрулул пляжрай кIюрххил дайсса зарядкалия, къуртал хьуна хъунмур майданнив.
Зарядка дурна бавтIминнащал архIал ММА-лул ию (боец) Мансур Малачиевлул. Муния махъ байбивхьуна спортрал тIуркIурду: пляжрал волейбол, ка дишаву (армрестлинг), гьузузаву, гребной спорт, виндсерфинг, тIанкI учаву, пляжрал футбол ва цаймигу. ТIуркIурдавух хIала бувххуна шагьрулул ялапарлувтал ва хъуншагьрулул хъамал.
Вара кьини дурна мухIулттай лачIун буккавугу (борьба на поясах). Укунсса журалул лачIун буккаврил сиптачи ва сакиншинначи хьуна ДР-лул МухIулттай лачIун буккаврил федерация. Бяст-ччаллавух гьуртту хьуна СКФО-лул республикарттал вакилтал.
МаркIачIан чIумал шадлугъру лахъи ларгуна Дагъусттаннал хъунмур майданнив.
ХI. Аьдилов
