Вай гьантрай МахIачкъалалив, «Единая Россия» партиялул Жяматийсса штабрай, хьунни хасъсса аьралий операциялул гьурттучитурал ва вайннал кулпатирттал реабилитациялул социал проектрал хIасиллу дуллалисса ккуркки стол.
Ванил даву дайдирхьуна Дагъусттаннал лайкь хьусса хIакин МахIаммад Загьидов лахъа-хъун аврийну. Штабрал чулуха ванан буллуна Барчаллагьрал чагъар.
КIицI лавгсса проектрал лагрулий хIакинтурал ва цаймигу пишакартурал дуллалисса даврия жу хьхьичIвагу бувсъссия.
Ва проектрал сиптачи хъанай бур Москавливсса Лазерный хирургиялул клиникалул хъунмур хIакин, невролог, Профессионал остеопатътурал медициналул ассоциациялул член Тутубава Кьурбановна Башанаева. Москавлия бувкIун, цила отпускалул гьантри ванил гьан бувна хасъсса аьралий операциялул гьурттучитуран, аьралий иширттал ветерантуран ва миннал кулпатирттан уква реабилитациялул кумаг буллай. ХIакиннал дуллалимунил чIарав бавцIуна Аьралий элмурдал академик Арсен Буйдалаевичлул каялувшиннаралусса Москавуллал культуралул центр «Дагъусттан».
Тутубава Башанаевал Лучевой диагностикалул центрданул хъунмур хIакин Аьйшат Къараеващал (ванил клиникалийри пациентътал кьамул буллай бивкIсса) ва клиникалул зузалт: психолог Калинина Александращал, функционал диагностикалул хIакин Жаннат Одамановащал, проектрал давриву гьуртту хьусса кардиолог ПатIима ХIамидоващал медициналул ва диагностикалул кумаг бувна ххюцIалуннийн бивсса кIицI лавгсса категориялул инсантуран.
Даврил хIасиллу дуллалисса ккуркки столданий гьуртту хьуна Жяматийсса штабрал вакил Заур Амираьлиев, Дагъусттаннал Халкьуннал Мажлисрал депутат, шагьрулул 1-мур азарханалул хъунама хIакин ХIажимурад Малаев, проектрал куратор, СВО-лий цалчин Аьрасатнал Виричунал цIа ларсъсса НурмахIаммад ХIажимахIаммадовлул нину Сапижат Мазаева, Дагъусттаннал Жяматийсса палаталучIасса Жагьилтурал советрал председательнал хъиривмур Саида Абакарова, хасъсса аьралий операциялул гьурттучи, паччахIлугърал чIярусса наградарттал заллу Динислам Къарагишиев.
КIицI лаган, Тутубава Кьурбановнал Москавливра дайдирхьусса ва ххаллилсса даврил чIарав ххуйну бавцIуна жяматийсса ишккаккулт, Медициналул зузалтрал ассоциациялул каялувчи, «Дагестан» МЦК-лул президиумрал член Гулизар Башанаева, «Дагестан» МЦК-лул президиумрал член СалихIат Валиева ва «Дараччи» фондрал Москавливсса филиалданул каялувчи Мариян Кьаландарова. Вайннал хIарачатрайну ва СМИ-дайхчин нанисса акциялия ччяни баян бан ва кумаг бан бювхъуна кIицI ларгсса категориялул чIявусса инсантурайн.
– Так ца нава бувну бур уква 640 азарда къурушран бацIлацIисса неврологнал ва остеопатнал кумаг. ДакIниву ххаришиву дур ва даву дузрайн дуккан дан бювхъуну тIий. Барчаллагьрай бура ккуркки столданул даврин кабакьу бувсса Жяматийсса штабрал каялувчитурайн ва зузалтрайн, цинявппагу гьуртту хьуминнайн, – тIий бур Тутубава Башанаева.
Штабрал чулуха ва кьини хIакинтуран буллуна Барчаллагьрал чагъарду.
Андриана Аьбдуллаева
